| ការផ្ទុះអាវុធថ្មីមួយនៅព្រំដែនខ្មែរ-ថៃៈ ប្រជាពលរដ្ឋ ភ័យខ្លាចមានសង្គ្រាមកើតឡើង |
| ដោយ រស់ ឌីណា និង ស្ទេហ្វានី ហ្សេ | |
| ១៥-១០-២០០៨ |
នៅរសៀល វេលាប្រហែលជាមុនម៉ោង១៤និង៣០ នាថ្ងៃពុធ ទី១៥ តុលានេះ ការផ្ទុះអាវុធថ្មីមួយ ដែលខ្លាំងជាងមុន និងមានរយៈពេលយូរជាងមុន បានកើតមានឡើងរវាងកងកម្លាំងប្រដាប់អាវុធថៃនិងកម្ពុជា ដែលប្រចាំការនៅព្រំដែន ក្បែរប្រាសាទព្រះវិហារ។ ព័ត៌មានថ្មីនេះបានរីកសាយភាយយ៉ាងឆាប់រហ័ស នៅចំណោមប្រជាជនខ្មែរ សារត្រូវបានផ្ញើចេញពីទូរស័ព្ទមួយទៅមួយ ដើម្បីប្រកាសថាប្រទេសទាំងពីរធ្វើសង្គ្រាមនឹងគ្នា។ ខណៈពេលនេះ ការចរចាត្រូវធ្វើឡើងនៅលើសមរភូមិ បន្ទាប់ពីការផ្ទុះអាវុធបានស្ងប់ស្ងាត់ និងមានកិច្ចប្រជុំជាបន្ទាន់នៅទីក្រុងភ្នំពេញ។ ប៉ុន្តែ កាលពីព្រឹកថ្ងៃដដែលនេះ លោករដ្ឋមន្រ្តីការបរទេសកម្ពុជាបានអះអាង នៅឯព្រលានយន្តហោះពោធិតុងអំពីស្ថានភាពនៅតាមព្រំដែន។
នៅពាក់កណ្តាលរសៀល ការផ្ទុះអាវុធរវាងកងទ័ពទាំងសងខាងបានស្ងប់ស្ងាត់ឡើងវិញ ដើម្បីទុកឱកាសអោយមេបញ្ជាការនៃប្រទេសទាំងពីរចរចាគ្នា។ លោកខៀវ កាញារីទ្ធ អ្នកនាំពាក្យរដ្ឋាភិបាលកម្ពុជា ដែលបានធ្វើដំណើរទៅចូលរួមកិច្ចប្រជុំកំពូលអាស៊ាន បានរាយការណ៍ពីប្រទេសចិន ដោយយោងតាមព័ត៌មានដែលលោកទទួលបានថា ទាហានថៃបានធ្វើការបាញ់ប្រហារលើទាហាខ្មែរ បន្ទាប់ពីពួកគេបានលឺការផ្ទុះមួយ ដែលពួកគេយល់ឃើញថាជាការវាយប្រហារ។ ក្រោយមក ភាគីទាំងសងខាងក៏បានធ្វើការបាញ់ប្រហារលើគ្នាទៅវិញទៅមក។
ទាហាន ខ្មែរម្នាក់ដែលប្រចាំការនៅត្រង់ចំណុចរសើបនៃព្រំដែននេះ បានរាយការណ៍ដោយសុំមិនបញ្ចេញឈ្មោះថា វេលាប្រហែលជាថ្ងៃត្រង់ ភាគីថៃបានមកប្រាប់ទាហានខ្មែរថាពួកគេនឹងធ្វើការផ្លាស់ប្តូរទាហាន ។ លោកបានធ្វើការថ្កោលទោសថា «មុនដំបូង ជាទាហានឈុតខ្មៅ ប៉ុន្តែ ឥឡូវនេះ គឺជាទាហានចម្បាំងដែលស្លៀកឯកសណ្ឋាន។ ពួកគេដាក់ពង្រាយកងទ័ព៥០០នាក់ នៅតំបន់វាលឥន្រ្ទី និងប្រាសាទព្រះវិហារ។ ថៃគឺជាអ្នកចាប់ផ្តើមមុន»។ លោកបានបន្ថែមទៀតថា លោកបានលឺថាមានទាហាខ្មែររងរបួសពីរនាក់។
ទាហាន រូបនោះបានលើកឡើងថា «ទាហានអនុវត្តតាមបញ្ជារបស់សម្តេចនាយរដ្ឋមន្រ្តីហ៊ុន សែន»។ លោកបានមានប្រសាសន៍ថាបានឃើញយន្តហោះចម្បាំងរបស់ថៃ ហោះនៅលើមេឃ នៅព្រឹកថ្ងៃដដែលនេះ។ កាលពីថ្ងៃច័ន្ទ ទី១៣ តុលា ប្រមុខរដ្ឋាភិបាលបានព្រមានថា ប្រសិនជាទាហានថៃនៅតែជ្រៀតចូលទឹកដីកម្ពុជា និងឆ្លងកាត់ពីតំបន់ព្រលានឥន្ទ្រី ឆ្ពោះទៅតំបន់ «៥ មករា» ដែលស្ថិតនៅពាក់កណ្តាលផ្លូវឆ្ពោះទៅកាន់ប្រាសាទព្រះវិហារ «សង្គ្រាមនឹងកើតមានឡើង ហើយនឹងមានមនុស្សស្លាប់»។
បើតាម ប្រសាសន៍របស់មន្រ្តីអាជ្ញាធរព្រះវិហារមួយរូប ប្រជាពលរដ្ឋជាង១០នាក់ ដែលរស់នៅតំបន់នោះ បានរត់ភៀសខ្លួនមកនៅក្រោយប្រាសាទព្រះវិហារ ចំណែកអ្នកផ្សេងទៀតបានចាកចេញពីកន្លែង តាំងពីថ្ងៃអង្គារ ទី១៤មកម្ល៉េះ។
សម្តេចនាយករដ្ឋមន្រ្តីហ៊ុន សែន និងប្រមុខការទូត ត្រូវរៀបចំសន្និសីទកាសែត នៅល្ងាចនេះ។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
