| លោកហោ ណាំហុងៈ ទំនាក់ទំនងការទូតនៃ ប្រទេសកម្ពុជានិងថៃនៅរក្សាដដែល |
| ដោយ ដួង សុខា ជាមួយ ស្ទេហ្វានី ហ្សេ | |
| ១៥-១០-២០០៨ |
នៅរសៀលថ្ងៃពុធ ទី១៥ តុលា វេលាម៉ោង១៤និង១៥ ការប៉ះទង្គិចដោយអាវុធមួយ បានកើតមានឡើងរវាងកងកម្លាំងប្រដាប់អាវុធថៃនិងកម្ពុជា ដែលឈរជើងនៅព្រំដែន ក្បែរប្រាសាទព្រះវិហារ។ ទាហានថៃបានបន្តបង្កើនកម្លាំងរបស់ខ្លួន ប្រជាជនថៃបង្កអំពើហឹង្សា ជម្លោះទឹកដី ... កត្តាទាំងនេះបានបង្កើតអោយមានការផ្ទុះអាវុធ។ នៅល្ងាចថ្ងៃនេះ ប្រជាពលរដ្ឋកម្ពុជាបានបង្ហាញពីការព្រួយបារម្ភមានការផ្ទុះ សង្គ្រាមកើតឡើង។ ក្រោយមក រាជរដ្ឋាភិបាលបានធ្វើអោយស្ថានការណ៍ធូរស្បើយ ដោយបានបង្ហាញឆន្ទៈ សង្គ្រាម ដែលមិនបានផ្តល់ប្រយោជន៍អ្វីដល់ប្រទេសជាតិ។ នៅក្នុងសន្និសីទកាសែតមួយ នៅល្ងាចថ្ងៃពុធនេះ រដ្ឋមន្រ្តីការបរទេសកម្ពុជាបានប្រកាសថាទំនាក់ទំនងការទូតនៃ ប្រទេសកម្ពុជានិងថៃមិនត្រូវបានកាត់ផ្តាច់នោះទេ ហើយការចរចានៅតែធ្វើឡើង។ នៅល្ងាចថ្ងៃពុធនេះ លោកហោ ណាំហុង រដ្ឋមន្រ្តីការបរទេសនៃព្រះរាជាណាចក្រកម្ពុជាបាន កោះអញ្ជើញឯកអគ្គរដ្ឋទូត ឯកអគ្គរាជទូតប្រចាំនៅទីក្រុងភ្នំពេញទាំងអស់ មកចូលរួមកិច្ចប្រជុំបន្ទាន់មួយ។ ឯកអគ្គរដ្ឋទូត ឯកអគ្គរាជទូតនៃ២២ប្រទេសមានវត្តមាន។ បើតាមប្រភពព័ត៌មានមួយ ឯកអគ្គរាជទូតថៃប្រហែលមិនត្រូវបានអញ្ជើញអោយចូលរួមនោះទេ។
ការវាយប្រហារពីសំណាក់កងទ័ពថៃ
លោក ហោ ណាំហុង បានលំអិតថា «ដើម្បីប្រកាសអោយដឹងពីឧប្បតិ្តហេតុនេះ ខ្ញុំមិនប្រើពាក្យថា «ឈ្លានពាន»នោះទេ។ ទាហានថៃបានវាយប្រហារដោយអាវុធ មកលើទាហានកម្ពុជា ដែលកំពុងយាមការនៅចំណុច បីកន្លែង គឺនៅក្បែរវត្តកែវសិក្ខាគិរស្វារៈ ស្ថិតនៅចម្ងាយ៣០០ម៉ែត្រពីប្រាសាទព្រះវិហារ និងចម្ងាយ៧០០ម៉ែត្រពីព្រំដែន នៅតំបន់វាលឥន្រ្ទី ស្ថិតនៅចម្ងាយ១,១គីឡូម៉ែត្រពីព្រំដែន និងនៅភ្នំទ្រព្យ ស្ថិតនៅចម្ងាយ១,៦គីឡូម៉ែត្រពីព្រំដែន»។ លោកបានបញ្ជាក់ថាទាហានថៃគឺជាអ្នកចាប់ផ្តើមបាញ់ប្រហារមុនមកលើកង ទ័ពកម្ពុជា។
លោកបានកត់សម្គាល់ថាប្រទេសថៃបានបង្កើន កម្លាំងទាហានរបស់ខ្លួន នៅតមតំបន់ផ្សេងទៀត នៅព្រំដែន ដោយបានដាក់ពង្រាយប្រដាប់អាវុធសង្គ្រាមធ្ងន់ធំ រួមទាំងរថក្រោះជាច្រើនគ្រឿង។ កំណត់ការទូតមួយ ដែលចែកអោយទៅអ្នកយកព័ត៌មាន បានសរសេរថា «រដ្ឋាភិបាលកម្ពុជាតវ៉ាយ៉ាងដាច់អហង្ការ ប្រឆាំងនឹងការបង្ករឿងប្រដាប់អាវុធដដែលៗទាំងនេះ ពីសំណាក់ទាហានថៃ ដែលទង្វើដ៏គឃ្លើននេះបណ្តាលអោយមានភាពប្រទូសរ៉ាយប្រដាប់អាវុធ ទ្រង់ទ្រាយធំ រវាងប្រទេសទាំងពីរ»។
ផែនទីខុសគ្នា ទស្សនះវិស័យខុសគ្នា
លោក រដ្ឋមន្រ្តីការបរទេសបានរម្លឹកថា «ភាគីថៃបានអះអាងថាតំបន់ទាំងនេះស្ថិតនៅលើទឹកដីរបស់ខ្លួន ដោយសំអាងទៅលើផែនទីមួយ ដែលគូសដោយឯកតោភាគី ដែលគ្មានតម្លៃតាមផ្លូវច្បាប់នោះទេ។ ប៉ុន្តែ យើងផ្អែកលើផែនទីមួយ ដែលគូសដោយប្រទេសបារាំង (ពេលជាអាណានិគម) និងសៀម ចន្លោះឆ្នាំ១៩០៤ និង១៩០៩។ ប្រទេសថៃទទួលស្គាល់ផែនទីនេះ រហូតដល់ថ្ងៃទី១៥ កក្កដា ឆ្នាំ២០០៨ (ថ្ងៃដែលទាហានថៃចូលឈ្លានពានជាលើកដំបូងនៅលើទឹកដីកម្ពុជា)។ ម្យ៉ាងវិញទៀត នៅឆ្នាំ២០០០ ប្រទេសយើងទាំងពីរបានចុះអនុស្សារណៈយោគយល់មួយ ដែលទទួលស្គាល់គំនូសផែនទីនេះ»។ លោកក៏បានលើកឡើងផងដែរទៀតថាការរំលោភបំពានរបស់ទាហានថៃមកលើទឹក ដីកម្ពុជាទាំងនេះ គឺផ្ទុយទៅនឹងធម្មនុញ្ញរបស់អង្គការសហប្រជាជាតិ ដែលប្រទេសទាំងពីរគឺជាសមាជិក និងផ្ទុយទៅនឹងសន្ធិសញ្ញាសន្តិភាពទីក្រុងប៉ារីស ថ្ងៃទី២៣ តុលា ១៩៩១ ដែលធានាបូរណភាពទឹកដីនៃប្រទេសកម្ពុជា។
ឆន្ទៈដោះស្រាយដោយសន្តិវិធី
លោក ហោ ណាំហុង បានចោទជាសំណួរថា «យើងមិននិយាយថាការផ្ទុះអាវុធនេះមានលក្ខណៈទ្រង់ទ្រាយធំ ប៉ុន្តែ យើងរក្សាឆន្ទៈដោះស្រាយបញ្ហានេះដោយសន្តិវិធី។ នាយករដ្ឋមន្រ្តីថៃធ្លាប់បានប្រកាសថាប្រទេសរបស់ខ្លួននឹងមិនឈ្លាន ពានទឹកដីកម្ពុជានោះទេ ហើយគ្មានការប្រើប្រាស់កម្លាំងប្រដាប់អាវុធ មកលើប្រទេសកម្ពុជា។ ខ្ញុំសង្ឃឹមថាភាគីថៃនឹងគោរពប្រសាសន៍របស់នាយករដ្ឋមន្រ្តីរបស់ ខ្លួន! សូម្បីតែរដ្ឋមន្រ្តីការបរទេសថៃ បាននិយាយថាចង់អោយមានដំណោះស្រាយដោយសន្តិវិធី។ គាត់បានសុំអោយយើងយល់ពីការលំបាករបស់ពួកគេ នាពេលបច្ចុប្បន្ននេះ។ ប៉ុន្តែ នរណាជាអ្នកបញ្ជាអោយបញ្ជូនទាហានមក!» ។ លោកបានគូសបញ្ជាក់ថា នៅព្រឹកថ្ងៃដដែលនេះ សម្តេចនាយរដ្ឋមន្រ្តីហ៊ុន សែន បានមានប្រសាសន៍តាមទូរស័ព្ទ ជាមួយប្រធានាធិបតីឥណ្ឌូណេស៊ី។ ប្រធានាធិបតីឥណ្ឌូណេស៊ីបានស្នើសុំសម្តេចអោយចរចាជាលក្ខណៈទ្វេភាគី ។
អំណត់អត់ធ្មត់ «មានដែនកំណត់»
លោក បានសង្កត់ធ្ងន់ថា កម្ពុជានឹងធ្វើការ អត់ធ្មត់«អោយដល់ទីបំផុត» ប៉ុន្តែ កម្ពុជារក្សាសិទ្ធិ ការពារបូរណភាពទឹកដី និងអធិបតីភាពកម្ពុជា។ រដ្ឋាភិបាលកម្ពុជានឹងមិនព្រមអោយបាត់បង់មួយចំណែកណាមួយឡើយ ចិត្តអំណត់របស់កម្ពុជាមានដែនកំណត់។ លោកហោ ណាំហុងបានបន្ថែមទៀតថា ពួកគេមិនទុកអោយស្ថានភាពបែបនេះអូសបន្លាយ រហូតដល់៣ ទៅ៥ឆ្នាំនោះទេ។ ថ្ងៃស្អែក ថ្ងៃព្រហស្បតិ៍ ទី១៦ តុលា មេបញ្ជាការយោធិភូមិភាគ៤នៃប្រទេសកម្ពុជា និងភាគីថៃ នឹងជួបចរចាគ្នា។ «យើងសុទ្ធចិត្តទៅចរចានៅប្រទេសថៃ»។
ទាហានខ្មែរស្លាប់ពីរនាក់ ចំណែកភាគីថៃ?
ការ ប៉ះទង្គិចគ្នានេះបានធ្វើអោយភាគីកម្ពុជា ស្លាប់ទាហានពីរនាក់ និងរងរបួសពីរនាក់។ ចំណែកភាគីថៃ បាននិយាយថាមិនមានចំនួនជនរងគ្រោះនោះទេ។ លោកហោ ណាំហុងបានអះអាងថា «ប៉ុន្តែ ខាងភាគីថៃ ប្រហែលជាមានច្រើន! ម្យ៉ាងវិញទៀត ទាហានថៃដប់នាក់ត្រូវបានចាប់ខ្លួន និងស្ថិតនៅក្នុងការឃ្លាំមើលរបស់កម្ពុជា។ ប្រសិនជាភាគីថៃសុំយកទាហានទាំងនោះត្រឡប់ទៅវិញ យើងនឹងប្រគល់អោយគេវិញ»។
ជូនព័ត៌មានទៅកាន់ក្រុមប្រឹក្សាសន្តិសុខ នៃអង្គការសហប្រជាជាតិ (អ.ស.ប)
ប្រមុខ ការទូតកម្ពុជាបានអះអាងថានៅយប់នេះ លោកនឹងទាក់ទងទៅឯកអគ្គរាជទូតកម្ពុជាប្រចាំអ.ស.ប ដើម្បីស្នើអោយគាត់ជូនព័ត៌មានទៅកាន់សមាជិកទាំង១៥ ប្រទេស នៃក្រុមប្រឹក្សាសន្តិសុខ អំពីព្រឹត្តិការណ៍ចុងក្រោយនេះ។ «យើងមិនសុំអោយមានការកោះប្រជុំ មួយនោះទេ ប៉ុន្តែ យើងគ្រាន់តែចង់ផ្តល់ដំណឹងដែលបានកើតឡើងប៉ុណ្ណោះ...»។
ការជម្លៀសប្រជាជនថៃចេញពីប្រទេសកម្ពុជា?
អត្ថបទ នៃសារព័ត៌មានជាច្រើនបានរាយការណ៍អោយដឹង នៅថ្ងៃពុធ ទី១៥ តុលានេះថាប្រទេសថៃបានបញ្ជាអោយជម្លៀសប្រជាជនថៃដែលរស់នៅកម្ពុជា ចេញពីប្រទេស។ លោកហោ ណាំហុង មិនបានទទួលព័ត៌មាននេះនោះទេ។ លោកបានបញ្ជាក់ថាស្ថានទូតកម្ពុជាប្រចាំទីក្រុងបាងកកត្រូវស្ថិត នៅក្រោមការការពាររបស់នគរបាលថៃ។ ចំណែកនៅស្ថានទូតថៃប្រចាំទីក្រុងភ្នំពេញ គេសង្កេតឃើញថាកម្លាំងនគរបាលកម្ពុជាក៏ត្រូវបានដាក់ពង្រាយផងដែរ ដើម្បីការពារសុវត្ថិភាពស្ថានទូតថៃ។ លោក Chaturont Chaiyakham លេខាធិការទីមួយនៃស្ថានទូតថៃ បានអះអាងនៅល្ងាចថ្ងៃនេះថា មិនមានការបញ្ជាណាមួយ អោយជម្លៀសប្រជាជនថៃចេញពីប្រទេសកម្ពុជានោះទេ ប៉ុន្តែ ប្រជាជនថៃប្រុងជើងការរួចជាស្រេចហើយ។
លោកហោ ណាំហុង បានសន្និដ្ឋានថា «យើងនឹងរក្សាទំនាក់ទំនងការទូតជាមួយថៃ។ ប៉ុន្តែ ប្រសិនជាយើងចង់ធ្វើសង្គ្រាម គឺជារឿងងាយស្រួលណាស់ យើងអាចចាប់ផ្តើមនិងអនុវត្តភ្លាម [...] សូមអស់លោកមានទំនុចចិត្តទៅលើរដ្ឋាភិបាល ដែលដឹកនាំដោយសម្តេចនាយករដ្ឋមន្រ្តីហ៊ុន សែន»។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
