| លោកហុក ឡងឌី អគ្គស្នងការនគរបាលជាតិ បានបាត់បង់ជីវិតនៅក្នុងគ្រោះថ្នាក់ឧទ្ធម្ភាគចក្រ |
| ដោយ ដួង សុខា និងស្ទេហ្វានី ហ្សេ | |
| ១០-១១-២០០៨ |
ភ្នំពេញ (ប្រទេសកម្ពុជា) ថ្ងៃទី២៦ មិថុនា ២០០៨៖ លោកហុក ឡងឌី មេប៉ូលីសជាតិ ចុះពីឧទ្ធម្ភាគចក្ររបស់លោក បន្ទាប់ពីពិនិត្យកន្លែងកើតហេតុធ្លាក់យន្តហោះ ក្រុមហ៊ុន PMT Air នៅខេត្តកំពត © បណ្ណសារ Stringer លោក ហុក ឡងឌី អគ្គស្នងការនគរបាលជាតិ ដែលកាន់មុខតំណែងនេះតាំងពីឆ្នាំ១៩៩៤មក ហាក់បីដូចជាគ្មាននរណាម្នាក់អាចជំនួសតំណែងរបស់គាត់បាននោះទេ។ ស្ថិតនៅក្នុងវ័យ៥៨ឆ្នាំ នាយឧត្តមសេនីយផ្កាយមាស៤រូបនេះ បានបាត់បង់ជីវិត នៅក្នុងគ្រោះថ្នាក់ធ្លាក់ឧទ្ធម្ភាគចក្រមួយ កាលពីយប់ថ្ងៃអាទិត្យ ទី៩ ខែវិច្ឆិកា ខណៈពេលលោកធ្វើដំណើរចេញពីរាជធានីភ្នំពេញ ឆ្ពោះសំដៅទៅកាន់ខេត្តស្វាយរៀង ដែលជាស្រុកកំណើតរបស់ លោក ស្ថិតនៅភាគអាគ្នេយ៍នៃប្រទេសកម្ពុជា។ អ្នកធ្វើដំណើរលើឧទ្ធម្ភាចក្រទាំងបួននាក់ រួមមានលោកហុក ឡងឌី លោកសុខ សាអែម មេបញ្ជាការរងកងទ័ពនៃកងយោធពលខេមរភូមិន្ទជើងគោក និងអ្នកបើកបរពីរនាក់ សុទ្ធតែបានបាត់បង់ជីវិតទាំងអស់។ លោកខៀវ កាញារិទ្ធ អ្នកនាំពាក្យរបស់រាជរដ្ឋាភិបាល បានអះអាងនៅថ្ងៃច័ន្ទ ទី១០ ខែវិច្ឆិកានេះថា លោកមិនបានដឹងមូលហេតុនៃការធ្វើដំណើរនេះទេ។ គួរបញ្ជាក់ថា បន្ទាប់ពីលោកហុក ឡងឌី ចូលរួមពិធីបុណ្យឯករាជ្យជាតិនៃប្រទេសកម្ពុជា គំរប់ខួបលើកទី៥៥ ដែលរៀបចំធ្វើឡើងនៅទីក្រុងភ្នំពេញ លោកក៏បានធ្វើដំណើរចេញពីភ្នំពេញ។ សាកសពរបស់លោកត្រូវបានបញ្ជូនមកកាន់គេហដ្ឋានរបស់គាត់ នាទីក្រុងភ្នំពេញ។ នៅព្រឹកថ្ងៃច័ន្ទ នេះ លោកសុខ ផល អគ្គស្នងការរងនគរបាលជាតិ បានធ្វើដំណើរមកកាន់គេហដ្ឋានរបស់លោកហុក ឡងឌី នាទីក្រុងភ្នំពេញ ដើម្បីចូលរួមមរណៈទុក្ខ។ ។ លោកបានបដិសេធមិនធ្វើអធិប្បាយអ្វីទាំងអស់ជុំវិញបញ្ហានេះ។ លោកបានបញ្ជាក់ថាការស៊ើបអង្កេតមួយកំពុងធ្វើឡើង។ លោកបានបន្ថែមថា លោក ណែត សាវឿន នឹងកាន់មុខតំណែងជាអគ្គស្នងការនគរបាលជាតិបណ្តោះអាសន្ន ដោយរង់ចាំអ្នកបន្តវេនពីលោកហុក ឡងឌី។ ពិធីបុណ្យសពរបស់លោក នឹងប្រព្រឹត្តទៅ នៅខេត្តស្វាយរៀង ដែលជាកន្លែងគាត់បានបាត់បង់ជីវិត ប៉ុន្តែ មិនទាន់បញ្ជាក់ថ្ងៃកំណត់ច្បាស់លាស់ទេ។
លោកគឺជាអ្នកទទួលខុសត្រូវម្នាក់ ដែលតែងតែទទួលរងនូវការរិះគន់ពីសំណាក់សកម្មជនសិទ្ធិមនុស្ស
បន្ទាប់ពី ត្រូវបានតែងតាំងជាអភិបាលខេត្តស្វាយរៀង នៅឆ្នាំ១៩៩៣ លោកហុក ឡងឌី ត្រូវបានតែងតាំងជាអគ្គស្នងការនគរបាលជាតិនៃក្រសួងមហាផ្ទៃ នៅខែវិច្ឆិកា ឆ្នាំ១៩៩៤។ ប៉ុន្តែ គាត់នៅតែសកម្មនៅក្នុងស្រុកកំណើតរបស់គាត់ដដែល ហើយនៅទីនោះ គាត់បានបង្កើតសាកលវិទ្យាល័យឯកជនមួយ។ លោកហុក ឡងឌីគឺជាមនុស្សសិទ្ធិនឹងសម្តេចនាយករដ្ឋមន្រ្តីហ៊ុន សែន ព្រោះអ្នកទាំងពីរ គឺជាដន្លងនឹងគ្នា ប៉ុន្តែ លោកមិនមែនជាមិត្តរបស់ក្រុមអ្នកការពារសិទ្ធិមនុស្សនោះទេ។ ទឡ្ហីករណ៍ជាច្រើនបានបញ្ជាក់ថាលោកប្រហែលមានការជាប់ពាក់ព័ន្ធនឹង អំពើជួញដូរមនុស្ស និងគ្រឿងញៀន រឺអំពើឃាតកម្មលើឥស្សរជនផ្នែកនយោបាយ រឺសារព័ត៌មាន។ ប៉ុន្តែ ទឡ្ហីករណ៍ទាំងនេះមិនអាចធ្វើអោយតំណែងរបស់គាត់រង្គោះរង្គើឡើយ។ នៅក្នុងបទសំភាស៍ដ៏កំរជាច្រើន ជាមួយអ្នកសារព័ត៌មាន លោកចូលចិត្តនិយាយពាក្យដដែលថា លោកគ្មានអ្វីដែលត្រូវបន្ទោសនោះទេ លោកគ្រាន់តែទាមទារអោយអ្នកចោទប្រកាន់លើរូបគាត់ បង្ហាញភស្តុតាងរបស់ពួកគេ។
ការចោទប្រកាន់របស់លោកហេង ពៅ
យោងតាម ការលើកឡើងរបស់អតីតស្នងការនគរបាលក្រុងភ្នំពេញ ហេង ពៅ ប្រាប់ដល់សារព័ត៌មាន L’express នៅពេលគាត់រត់ភៀសខ្លួននៅបរទេស ឃាតកម្មលើរូបលោកជា វិជ្ជា មេដឹកនាំសហជីព តារាសំដែង ពិសិដ្ឋ ពិលិការ និង រដ្ឋមន្រ្តីហូ សុខ ត្រូវបានបញ្ជាដោយលោកហុក ឡងឌី។ នៅក្នុងកិច្ចពិភាក្សាមួយ ដែលបង្ហាញក្រោមចំណងជើងថា «ស្នាដៃជាន់ទាបរបស់ ហ៊ុន សែន» និងត្រូវបានផ្សព្វផ្សាយដោយសារព័ត៌មានប្រចាំសប្តាហ៍បារាំង នៅខែសីហា ឆ្នាំ២០០៦ លោកហេង ពៅ ក៏បានចោទប្រកាន់មេប៉ូលីសរបស់គាត់ ថាជាប់ពាក់ព័ន្ធនៅក្នុងការវាយប្រហារដោយគ្រាប់បែកដៃ កាលពីខែមីនា ឆ្នាំ១៩៩៧ លើក្រុមបាតុកម្មមួយ ដែលដឹកនាំដោយលោកសម រង្ស៊ី និងបានបង្កអោយមានអ្នកស្លាប់ជាង១០នាក់។ លោកហេង ពៅបានចាត់ទុក លោកហុក ឡងឌី ជា«ជនប្រតិបត្តិបទល្មើសខុសច្បាប់» ដែលប្រើប្រាស់ដោយសម្តេចហ៊ុន សែន។ លោកបានបន្ថែមទៀតថា ការសមគំនិតរបស់ពួកគេទាំងពីរ ចាប់ផើ្តមឡើងនៅពេលពួកគេបានជួបគ្នា កាលពីឆ្នាំ១៩៧៩ នៅប្រទេសវៀតណាម។ បន្តិចក្រោយមក ដានរបស់លោកហេង ពៅត្រូវបានគេស្វែងរកឃើញ។ គាត់ត្រូវបានគេធ្វើបត្យាប័ន បញ្ជូនមកកាន់ប្រទេសកម្ពុជាវិញ ហើយត្រូវបានជាប់ពន្ធនាគារ ពីបទល្មើសជាច្រើន ដែលត្រូវបានជំនុំជម្រះទោសដោយតុលាការកម្ពុជា។
លោកហុក ឡងឌី ត្រូវបាន FBI ផ្តល់មុខមាត់ឡើងវិញ
នៅឆ្នាំ ២០០៧ ការិយាល័យសហព័ន្ធស៊ើបអង្កេត (FBI ) បានអញ្ជើញលោកហុក ឡងឌី មកពិភាក្សានៅទីក្រុងវ៉ាស៊ីនតោន ស្តីពីកិច្ចសហប្រតិបត្តិការរបស់ពួកគេ នៅក្នុងការប្រយុទ្ធប្រឆាំងភេរវករ។ ការអញ្ជើញនេះបានបង្កើតជាប្រតិកម្មពីសំណាក់សកម្មជនសិទ្ធិមនុស្ស ជាពិសេសអង្គការឃ្លាំមើលសិទ្ធិមនុស្ស (Human Rights Watch)។ លោក Brad Adams ប្រធានអង្គការឃ្លាំមើលសិទ្ធិមនុស្សប្រចាំអាស៊ី ធ្លាប់បានប្រឆាំងថា «ការជាប់សង្ស័យរបស់លោកហុក ឡងឌី នៅក្នុងអំពើហឹង្សាផ្នែកនយោបាយ និងឧក្រិដ្ឋកម្មដែលរៀបចំធ្វើឡើងនៅប្រទេសកម្ពុជា គួរតែត្រូវជម្រុញអោយ FBIបើកការស៊ើបអង្កេត លើរូបគាត់ គឺមិនមែនស្វាគមន៍គាត់នោះទេ»។ នេះគឺជាការផ្លាស់ប្តូរចរិតមួយរបស់សហរដ្ឋអាមេរិក ចំពោះមេប៉ូលីសរូបនេះ ខណៈពេលកាលពីឆ្នាំ២០០៦ ក្រសួងការបរទេសអាមេរិកធ្លាប់បានបដិសេធផ្តល់ទិដ្ឋាការអោយគាត់ មកកាន់សហរដ្ឋអាមេរិក ដោយហេតុផលថា «គាត់ជាប់សង្ស័យនៅក្នុងអំពើជួញដូរមនុស្ស»។ ប៉ុន្តែ មួយខែក្រោយមក FBI បានសងជំងឺចិត្តដល់លោកហុក ឡងឌី នូវមេដាយមួយ ដើម្បីគាំទ្រគាត់ នៅក្នុងការប្រយុទ្ធប្រឆាំងភេរវកម្មអន្តរជាតិ។
សំណួរពាក់ព័ន្ធនឹងការស្លាប់
នៅវេលាម៉ោង នេះ សំណួរមួយចំនួនត្រូវបានចោទសួរឡើង៖ តើគ្រោះថ្នាក់អាក្រក់នេះបណ្តាលមកពីអាកាសធាតុមិនល្អ រឺ ដោយសារការគិតក្បត់? សម្រាប់លោកជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា ការស្លាប់មេប៉ូលីសរូបនេះ មានន័យថាចំនួនឃាតកម្មលើអ្នកនយោបាយ សិល្បករ និងអ្នកយកព័ត៌មាននៅកម្ពុជា នឹងថយចុះ។ «ប៉ុន្តែ ខ្ញុំសោកស្តាយថា គាត់មិនត្រូវបានជំនុំជម្រះទោសនៅចំពោះមុខច្បាប់ […]។ នៅពេលគាត់កាន់អំណាច គ្មាននរណាម្នាក់ហ៊ានប្រឆាំងនឹងគាត់ទេ។ សព្វថ្ងៃនេះ ការបាត់បង់ជីវិតរបស់គាត់បានលាក់កំបាំងនូវអ្នកសមគំនិតជាមួយគាត់ »។
សកម្មជនសិទ្ធិមនុស្សផ្សេងទៀត ដែលត្រូវបានសំភាសន៍ បានប្រកាន់គោលជំហរអព្យាក្រឹត្យ។ តាមរយៈលោកច័ន្ទ សុវេត អ្នកស៊ើបអង្កេតរបស់សមាគមការពារសិទ្ធមនុស្សអាដហុក បានចូលរួមសំដែងមរណៈទុក្ខចំពោះគ្រួសារសព នឹងត្រៀមយកកម្រងផ្កាទៅដាក់។ លោកអ៊ូ វីវៈ ប្រធានមជ្ឈមណ្ឌលសិទ្ធិមនុស្សកម្ពុជា បានសំណូមពររដ្ឋាភិបាលកម្ពុជា អោយដឹកនាំការស៊ើបអង្កេតមួយ ដើម្បីបំភ្លឺរាល់ពាក្យចោទប្រកាន់របស់ហេង ពៅ លើរូបលោកហុក ឡងឌី ព្រមទាំងមូលហេតុនៃការធ្លាក់ឧទ្ធម្ភាគចក្ររបស់គាត់ កាលពីថ្ងៃអាទិត្យ ទី៩ ខែវិច្ឆិកានេះ។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
