|
អធិប្បាយចុងក្រោយ
|
| គណបក្សប្រឆាំងបន្តទាមទារអោយមានតួនាទីមួយច្បាស់លាស់នៅក្នុងរដ្ឋសភា |
| ដោយ ដូង សុខា | | | ២០-១១-២០០៨ | 
ភ្នំពេញ (កម្ពុជា) ថ្ងៃទី២៤ កញ្ញា ២០០៨៖ លោកស្រី មួរ សុខហួរ អគ្គលេខាធិការ រងគណបក្សសម រង្ស៊ី ចេញពីរដ្ឋសភា បន្ទាប់ពីកិច្ចប្រជុំសភាលើកដំបូង
© ចន វីង / Magnum នៅក្នុង ឱកាសធ្វើដំណើរទៅកាន់ខេត្តកណ្តាល កាលពីថ្ងៃច័ន្ទ ទី១៧ ខែវិច្ឆិកា សម្តេច ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានបញ្ចប់ក្តីសង្ឃឹមរបស់ គណបក្សប្រឆាំងសម រង្ស៊ី ដែលទាមទារតំណែងសំខាន់មួយចំនួននៅក្នុងអំណាចនីតិបញ្ញត្តិ។ សម្តេចបានចាត់ទុកការទាមទាររបស់តំណាងរាស្រ្តគណបក្សសម រង្ស៊ីនេះថា «ភ្លីភ្លើ» ដែលស្នើសុំធ្វើវិសោធនកម្មវិធានផ្ទៃក្នុងរដ្ឋសភា ដើម្បីទទួលស្គាល់ជាផ្លូវការនូវតួនាទីរបស់គណបក្សប្រឆាំង និងទទួលបាននូវមុខតំណែងសំខាន់ៗនៅរដ្ឋសភាជាតិ។ ទោះបីជាមិនមានតួនាទីអ្វីនៅក្នុងអំណាចនីតិប្រតិបត្តិ ក៏ដូចជាអំណាចនីតិបញ្ញត្តិក៏ដោយ ក៏គណបក្សសម រង្ស៊ី ដែលកំពុងតែជួបបញ្ហា មិនរាថយ និងបន្តធ្វើការទាមទារនូវតួនាទីមួយច្បាស់លាស់នៅក្នុងរដ្ឋសភា សម្រាប់តំណាងរាស្រ្តគណបក្សប្រឆាំង។ សម្តេចហ៊ុន សែនៈ មិនមានតំណែងនៅរដ្ឋសភា សម្រាប់គណបក្សប្រឆាំងទេ
មន្រ្តី គណបក្សប្រឆាំងមួយចំនួនយល់ថាសម្តេចនាយករដ្ឋមន្រ្តីបានបោក ប្រាស់ពួកគេដោយបានជម្រុញអោយពួកគេចូលរួមនៅក្នុងសម័យ ប្រជុំសភាលើកដំបូង កាលពីថ្ងៃទី២៤ ខែកញ្ញា កន្លងទៅនេះ។ ប្រឈមមុខនឹងការរិះគន់ទាំងនេះ សម្តេចហ៊ុន សែនវាយបកវិញថា មិនមានតំណែងណាមួយនៅក្នុងរដ្ឋសភា សម្រាប់តំណាងរាស្រ្តគណបក្សប្រឆាំង សម រង្ស៊ីនោះទេ។ សម្តេចប្តេជ្ញានឹងធ្វើជារនាំង ក្នុងការតែងតាំងអ្នកទាំងនោះ។
«បុរស ខ្លាំង» នៅក្នុងប្រទេសកម្ពុជា ដែលកាន់អំណាចតាំងពីឆ្នាំ១៩៨៥ បានសង្កត់ធ្ងន់ថា «ខ្ញុំមិនបានបោកលោកឯងទេ។ លោកឯង (សម រង្ស៊ី) បានព្យាយាមទូរស័ព្ទមកខ្ញុំ តាមរយៈលោកឧកញ៉ាគិត ម៉េង។ ប៉ុន្តែ ខ្ញុំបដិសេធមិននិយាយជាមួយលោកឯង។ លោកឯងចូលរួមប្រជុំលើកដំបូង រឺអត់ នេះគឺជាបញ្ហារបស់លោកឯង!»។
ក្រោយការបោះឆ្នោត ជ្រើសតាំងតំណាងរាស្រ្តអាណត្តិទីបួន កាលពីថ្ងៃទី២៧ ខែកក្កដា គណបក្សសម រង្ស៊ី ដែលទទួលបានអាសនៈសភាចំនួន២៦ បានបង្ហាញនូវឆន្ទៈធ្វើពហិការជាច្រើនលើកច្រើនសា មិនព្រមចូលរួមពិធីផឹកទឹកសម្បថ។ នៅមួយថ្ងៃមុនពិធីនេះ គណបក្សសម រង្ស៊ី និងគណបក្សសិទ្ធិមនុស្សរបស់លោកកឹម សុខា បានផ្ញើលិខិតមួយច្បាប់ ជូនប្រមុខរដ្ឋាភិបាល ដើម្បីសុំអោយតួនាទីរបស់គណបក្សប្រឆាំង ដែលមិនមានមុខតំណែងនៅក្នុងជួររដ្ឋាភិបាល ត្រូវបានទទួលស្គាល់ជាផ្លូវការដោយរដ្ឋសភាជាតិ ដោយកំណត់លក្ខខណ្ឌច្បាស់លាស់ សម្រាប់ការចូលរួមរបស់ពួកគេនៅក្នុងការងារសភា នាថ្ងៃអនាគត។
សម្តេច មានប្រសាសន៍បែបចំអកថា «តាមពិត អ្នកឯងស្នើសុំកែប្រែ ២៦មាត្រា ក្នុងចំណោម៨២មាត្រា [នៃវិធានផ្ទៃក្នុងរដ្ឋសភា] ដូចជាការកំណត់បែងចែកតំណែងជាអនុប្រធានរដ្ឋសភាមួយ ប្រធានគណៈកម្មការជំនាញមួយចំនួន និងថវិកាដាច់ដោយឡែក (សម្រាប់គណបក្សប្រឆាំង)!។ ទាំងនេះសុទ្ធតែជាចំណុចខ្លាញ់។ អ្នកឯងរង់ចាំជាតិក្រោយចុះ»។ សម្តេចបានចាត់ទុកសំណើនេះ ជាសំណើ «ភ្លីភ្លើ» ហើយសម្តេចបានស្នើអោយលោកសម រង្ស៊ី ដែលបច្ចុប្បន្ន ស្ថិតនៅប្រទេសបារាំង អោយ«ជួយណែនាំសមាជិក» គណបក្សរបស់ខ្លួនផង។
ដើម្បីសមភាពនៃអំណាច
ទោះ ជាយ៉ាងណា គណបក្សសម រង្ស៊ី នៅតែប្រកាសការតស៊ូ ដើម្បីទទួលបានតួនាទីសំខាន់ៗ នៅក្នុងរដ្ឋសភា ដែលត្រូវបែងចែកទៅតាមចំនួនអាសនៈដែលទទួលបាននៅក្នុងការបោះឆ្នោត ។ លោកយឹម សុវណ្ណ តំណាងរាស្រ្តគណបក្សប្រឆាំងបានចាត់ទុកសំណើនេះថា «មិនជ្រុលហួសហេតុពេក»នោះទេ។ អតីតប្រធានគណៈកម្មការមហាផ្ទៃនិងការពារជាតិនៃរដ្ឋសភារូបនេះបាន ពន្យល់ថា «ការទាមទាររបស់យើង គោរពទៅតាមគោលការណ៍ពហុបក្សនិយម។ យើងត្រូវការធ្វើអោយអំណាចទាំងពីរ គឺអំណាចនីតិប្រតិបត្តិ និងអំណាចនីតិបញ្ញត្តិ មានសមភាព»។ លោកបានលើកជាឧទាហរណ៍អំពីប្រព័ន្ធនយោបាយបរទេសថា «នៅសហរដ្ឋអាមេរិក រឺប្រទេសអាល្លឺម៉ង់ ប្រសិនជាគណបក្សដែលមានសម្លេងភាគច្រើនកាន់ក្រសួងសេដ្ឋកិច្ច នោះគណកម្មការសេដ្ឋកិច្ចនិងហិរញ្ញវត្ថុនៃរដ្ឋសភា ត្រូវប្រគល់អោយគណបក្សប្រឆាំង»។
ម្យ៉ាងវិញទៀត តំណាងរាស្រ្តប្រចាំមណ្ឌលភ្នំពេញរូបនេះ បានសំដែងការសោកស្តាយចំពោះភាពទន់ខ្សោយរបស់គណកម្មការជំនាញនានា នៃរដ្ឋសភា ពោលគឺមានចំនួនត្រឹមតែ៩ប៉ុណ្ណោះ ខណៈពេលដែលរដ្ឋាភិបាលមាន២៤ក្រសួង។ គណៈកម្មការខ្លះត្រូវទទួលបន្ទុកត្រួតពិនិត្យការងាររបស់ក្រសួង ពី៥ ទៅ៨ក្រសួង។ លោកយឹម សុវណ្ណ បានវាយតម្លៃថា «វាគឺជាប្រព័ន្ធភ្លីភ្លើ។ គណៈកម្មការនីមួយៗគួរតែត្រួតពិនិត្យក្រសួង១ រឺពីរ យ៉ាងច្រើនបំផុត»។
លោក ជាម យៀប ប្រធានគណៈកម្មការសេដ្ឋកិច្ច ធនាគារ និងសវនកម្មនៃរដ្ឋសភាមកពីគណបក្សប្រជាជនកម្ពុជាយល់ឃើញថា អំណៈអំណាងដែលលើកឡើងដោយតំណាងរាស្រ្តគណបក្សសម រង្ស៊ីរូបនេះគ្រាន់តែជាការទាក់ទាញចំណាប់អារម្មណ៍ប៉ុណ្ណោះ។ លោកបានលើកឧទាហរណ៍មកបញ្ជាក់ថាគណៈកម្មការរបស់លោកទទួលបន្ទុកត្រួត ពិនិត្យ«តែបីស្ថាប័នប៉ុណ្ណោះ» (ក្រសួងសេដ្ឋកិច្ច ធនាគារជាតិ និងអាជ្ញាធរជាតិសវនកម្ម)។ លោកបានលើកឡើងថា នីតិវិធីបច្ចុប្បន្ននេះមិនបានហាមឃាត់រដ្ឋសភាមិនអោយបង្កើត គណៈកម្មការថ្មីនោះទេ។
ថវិកាសម្រាប់គណបក្សដែលមានអាសនៈនៅរដ្ឋសភា?
លោក យឹម សុវណ្ណ បានគូសបញ្ជាក់ថាបញ្ហាក៏ជាបញ្ហាមួយដែរ សម្រាប់គណបក្សលោក។ លោកគាំទ្រចំពោះការពង្រឹងថវិកាសម្រាប់គណបក្សដែលមានអាសនៈនៅរដ្ឋសភា ដែលត្រូវបានបែងចែកតាមមធ្យមភាគនៃចំនួនតំណាងរាស្រ្ត ដោយយោងតាមរូបមន្ត ដែលអនុញ្ញាតអោយគណបក្សប្រឆាំងមានហិរញ្ញប្បទានគ្រប់គ្រាន់ ដើម្បីបំពេញតួនាទីរបស់ខ្លួនអោយបានពេញលេញ។ លោកយឹម សុវណ្ណបានបញ្ជាក់ថា «នៅប្រទេសអាល្លឺម៉ង់ ថវិកាត្រូវបានបែងចែក ទៅតាមចំនួនសម្លេងដែលគណបក្សនីមួយៗទទួលបាន។ ដើម្បីផ្តល់ការប្រឹក្សាដល់រដ្ឋាភិបាល គណបក្សប្រឆាំងដែលជាកញ្ចក់ឆ្លុះរបស់រដ្ឋាភិបាល ត្រូវមានធនធានហិរញ្ញវត្ថុគ្រប់គ្រាន់»។ លោកបានបញ្ជាក់ថា «ធនធានទាំងនេះមិនមែនទុកសម្រាប់ធ្វើជាអ្នកមាន ទិញរថយន្តនោះទេ ប៉ុន្តែ ទុកសម្រាប់ទិញកុំព្យូទ័រ បរិក្ខារការិយាល័យ និងទុកសម្រាប់ចំណាយថ្លៃទឹកនិងភ្លើង»។
ទោះស្ថិតក្នុងការលំបាក គណបក្សប្រឆាំងនៅមានសង្ឃឹមជានិច្ច
គណបក្ស ប្រឆាំងបាននិយាយថាកំពុងស្ថិតនៅក្រោមសំពាធមួយ ដោយសារគ្មានតួនាទីសំខាន់ៗនៅក្នុងរដ្ឋសភា។ គណបក្សនេះបានត្អូញត្អែរអំពីការលំបាកក្នុងការទទួលបានព័ត៌មាន ពាក់ទងនឹងរដ្ឋសភា ជាពិសេស ស្តីពីកិច្ចប្រជុំរបស់គណៈកម្មាធិការអចិន្រ្តៃយ៍នៃរដ្ឋសភា។ «យើងមិនអាចពិភាក្សាសេចក្តីព្រាងច្បាប់ និងផ្តល់មតិយោបល់ ដើម្បីធ្វើការកែសម្រួល មុនសេចក្តីព្រាងច្បាប់ទាំងនេះត្រូវបានបញ្ជូនទៅសម័យប្រជុំសភា។ ដូចនេះ យើងមានការលំបាក ក្នុងការបម្រើប្រជាពលរដ្ឋ»។ តំណាងរាស្រ្តគណបក្សប្រឆាំងបាននិយាយថាខ្លួនគឺជាជនរងគ្រោះ ពីការបដិសេធនេះ ហើយឆ្លើយតបទៅវិញថា ពួកគេបន្តធ្វើពហិការមិនចូលរួមកិច្ចប្រជុំ និងសិក្ខាសាលាដែលរៀបចំធ្វើឡើងនៅរដ្ឋសភា ដែលផ្តួចផ្តើមឡើងដោយអង្គការក្រៅរដ្ឋាភិបាល រឺ សហគមន៍អន្តរជាតិ ដរាបណាតួនាទីរបស់គណបក្សប្រឆាំងមិនត្រូវបានធានាជាផ្លូវការ លើកលែងសម័យប្រជុំសភាចេញ ។
តំណាងរាស្រ្តរបស់គណបក្សប្រឆាំង បានអះអាងថាគណបក្សរបស់ខ្លួនបានប្រើប្រាស់យុទ្ធសាស្រ្តថ្មីមួយ គឺធ្វើការ ក្រៅប្រព័ន្ធសភា ដោយចុះសាកសួរសុខទុក្ខប្រជាជន «ដើម្បីផ្តល់ព័ត៌មានដល់ពួកគាត់ អំពីការវិវត្តន៍របស់ប្រទេសជាតិ»។ លោកយឹម សុវណ្ណ តំណាងរាស្រ្តមណ្ឌលភ្នំពេញ បានសន្និដ្ឋានបែបទស្សនវិទ្យាថា «ពាក្យ ‘អស់សង្ឃឹម’ មិនមាននៅក្នុងវចនានុក្រមរបស់គណបក្សសម រង្ស៊ីឡើយ។ យើងនឹងបន្តការតស៊ូដោយក្តីសង្ឃឹមតទៅទៀត។ យើងនឹងទទួលបាននូវជោគជ័យ នៅថ្ងៃណាមួយ ព្រោះអ្វីគ្រប់យ៉ាងសុទ្ធតែមានទីបញ្ចប់ គ្មានអ្នកណាអមតៈនោះទេ»។
|
|
អត្ថបទបន្ថែមប្រាក់បំណាច់ប្រចាំខែរបស់ប្រធានរដ្ឋសភា និងតំណាងរាស្រ្ត
លោកជាម យៀប តំណាងរាស្រ្តមណ្ឌលព្រៃវែងមកពីគណបក្សប្រជាជនកម្ពុជា និងជាប្រធានគណៈកម្មការសេដ្ឋកិច្ច ធនាគារ និងសវនកម្មនៃរដ្ឋសភា បានប្រាប់វិបសាយ កាសែត អំពីប្រាក់បំណាច់ប្រចាំខែជាផ្លូវការ ដែលផ្តល់ជូនតំណាងរាស្រ្ត តាមមុខតំណែង (១ដុល្លារ ស្មើ៤០០០រៀល)
-ប្រធានរដ្ឋសភា ៥,៥ លានរៀល (១ ៣៧៥ដុល្លារ)
-អនុប្រធានទីមួយ ៥,២លានរៀល (១ ៣០០ដុល្លារ)
-អនុប្រធានទីពីរ ៥លានរៀល (១ ២៥០ដុល្លារ)
-ប្រធានគណៈកម្មការសភា ៥,១លានរៀល (១ ២៧៥ដុល្លារ)
-តំណាងរាស្រ្ត ៤,៨លានរៀល (១ ២០០ដុល្លារ)
តាមប្រភពតែមួយនេះ តំណាងរាស្រ្តទទួលបានទឹកប្រាក់បន្ថែមប្រចាំខែ ២លានរៀល (៥០០ដុល្លារ) ទុកសម្រាប់ទិញរថយន្ត ដើម្បីចុះមូលដ្ឋាន។ លើសពីនេះ ប្រធានគណៈកម្មការទទួលបានប្រេងដោយឥតគិតថ្លឡៃចំនួន ៥០០លីត្រ ក្នុងមួយខែ ចំណែកតំណាងរាស្រ្តទទួលបាន៣០០លីត្រ។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
