|
អធិប្បាយចុងក្រោយ
|
| តើដំណាំកៅស៊ូនៅប្រទេសកម្ពុជានឹងធ្លាក់ចូលទៅក្នុងវិបត្តិដែររឺទេ? |
| ដោយ រស់ ឌីណា | | | ១៨-១២-២០០៨ | 
(កម្ពុជា) ថ្ងៃទី២៦ ធ្នូ ២០០០៖ ក្មេងៗដើរប្រមូលជ័រកៅស៊ូ
© ចន វីង / Magnum នៅ ក្នុងវេទិកាពិភាក្សាលើកចុងក្រោយរវាងសហគ្រិនឯកជន និងតំណាងរដ្ឋាភិបាល កាលពីខែវិច្ឆិកាកន្លងទៅនេះ ផលិតករកៅស៊ូនៅប្រទេសកម្ពុជាបានលើកឡើងអោយដឹងអំពីការព្រួយ បារម្ភរបស់ខ្លួន។ ការធ្លាក់ចុះតម្លៃជ័រកៅស៊ូបានធ្វើអោយអ្នកជំនួញទាំងនោះមានការ ព្រួយបារម្ភយ៉ាងខ្លាំង។ ក្នុងរយៈពេលត្រឹមតែប៉ុន្មានសប្តាហ៍ប៉ុណ្ណោះ ក្រោមផលប៉ះពាល់នៃវិបត្តិហិរញ្ញវត្ថុ តម្លៃកៅស៊ូត្រូវបានថយចុះមួយទ្វេជាបី ជាហេតុជម្រុញអោយផលិតករបានប្រកាសអាសន្ន និងទាមទារអោយកាត់បន្ថយពន្ធនាំចេញដែលបានកំណត់ដោយរដ្ឋ។ សម្រាប់ពេលនេះ រដ្ឋាភិបាលមិនបានឆ្លើយយល់ស្របចំពោះសំណើសុំនេះនៅឡើយទេ ខណៈពេលអ្នកសង្កេតការណ៍បានលើកឡើងថាស្ថានភាពរបស់ក្រុមហ៊ុន កៅស៊ូកម្ពុជាសំខាន់ៗ មិនទាន់ឈានដល់ដំណាក់កាលអស់សង្ឃឹមនោះទេ ទោះបីជាទទួលបានប្រាក់ចំណូលតិចតួចជាងមុន នៅប៉ុន្មានខែចុងក្រោយនេះក៏ដោយ ។ ការដាំក្បាលចុះនៃតម្លៃជ័រកៅស៊ូ
លោកម៉ក់ គីមហុង នាយកក្រុមហ៊ុនអាជីវកម្មដំណាំកៅស៊ូ ជប់ ខេត្តកំពង់ចាម បានបង្ហាញតួលេខខ្លះៗ ដើម្បីបញ្ជាក់អំពីការធ្លាក់ចុះតម្លៃជ័រកៅស៊ូនៅលើទីផ្សារ រយៈពេលប៉ុន្មានសប្តាហ៍ចុងក្រោយនេះ។ នៅខែតុលា តម្លៃកៅស៊ូក្រែប មួយតោន ថ្លៃរហូតដល់៣ ៣០០ដុល្លារ ហើយនៅអំឡុងសប្តាហ៍ទី២នៃខែធ្នូ វាមានតម្លៃត្រឹមតែ៩០០ដុល្លារ។ នៅប្រទេសកម្ពុជា ក៏ដូចជានៅជុំវិញពិភពលោក ការដាំក្បាលចុះនេះបណ្តាលមកពីវិបត្តិហិរញ្ញវត្ថុពិភពលោក និងផលប៉ះពាល់ជាជំហានដំបូង លើការធ្លាក់ចុះនៃអំណាចទិញរបស់អ្នកប្រើប្រាស់។ លោកម៉ក់ គីមហុងបានអះអាងថា ប្រសិនជាស្ថានភាពនេះនៅតែបន្តទៀត សហគ្រិននៃវិស័យនេះនឹងមិនអាចទ្រទ្រង់រួចឡើយ។
លោកនាយកបាន ត្អូញត្អែរថា« ថ្លៃដើមជ័រកៅស៊ូក្នុងមួយតោនប្រែប្រួលចន្លោះពី១២០០ ទៅ១ ៣០០ដុល្លារ។ ទោះបីជាតម្លៃប្រេងឥន្ធនៈធ្លាក់ចុះក៏ដោយ ក៏ផលចំណេញរបស់ក្រុមហ៊ុនយើងមានការថយចុះផងដែរ»។ លោកបានបន្ថែមថា លោក «មិនហ៊ាន» កាត់បន្ថយប្រាក់ខែបុគ្គលិកប្រហែល៤៤០០នាក់ ដែលធ្វើការនៅក្នុងចំការនោះទេ។ ប្រាក់ខែសរុបរបស់បុគ្គលិក គឺ៥០០ ០០០ដុល្លារ (ប្រាក់ខែមធ្យមគឺ១១៣ដុល្លារ)។ លោកបានពន្យល់ថា «ប្រសិនជាយើងកាត់បន្ថយប្រាក់ខែ កម្មករនឹងមិនព្រមធ្វើការអោយយើង។ លទ្ធផល គឺក្រុមហ៊ុនរបស់យើងនឹងខាតបង់ច្រើនជាងមុនទៅទៀត។ ដូចនេះ នៅក្នុងកាលៈទេសៈនេះ យើងគ្មានជម្រើសអ្វីក្រៅពីការខាតបង់នោះទេ»។ លោកបានទទួលស្គាល់ថាក្រុមហ៊ុនរបស់លោកនៅតែអាចទ្រទ្រង់បាន «ព្រោះយើងធ្លាប់ចំណេញប្រាក់គួរសម កាលពីមុន…»។
កាត់បន្ថយពន្ធពី១០% មក៣០ដុល្លារ ក្នុងមួយតោន
ដោយ មានប្រតិកម្មទៅនឹងការធ្លាក់ចុះតម្លៃកៅស៊ូ និងបានគិតទុកអំពីផលប៉ះពាល់នៃវិបត្តិលើវិស័យដំណាំកៅស៊ូ អ្នកជំនួញកៅស៊ូ និងផលិតករជ័រកៅស៊ូកម្ពុជាបានរៀបចំ «សំណើ»មួយ ដោយភ្ជាប់អំណះអំណាងយកមកបង្ហាញប្រាប់រដ្ឋាភិបាល កាលពីចុងខែវិច្ឆិកា ដើម្បីកាត់បន្ថយពន្ធនាំចេញ លើផលិតផលកៅស៊ូ ដោយស្នើសុំអោយកាត់បន្ថយពន្ធនាំចេញកៅស៊ូពី១០%(បច្ចុប្បន្ននេះ កៅស៊ូមួយតោន យកពន្ធ១០០ដុល្លារ) មកត្រឹម៣០ដុល្លារក្នុងមួយតោន។ លោកម៉ក់ គីមហុង បានអះអាងថា រាល់ការលក់ចេញមួយតោនៗ ក្រុមហ៊ុនរបស់លោកបានខាតពី២០០ ទៅ៣០០ដុល្លារ។ ការកាត់បន្ថយពន្ធអាចជាដំណោះស្រាយដ៏មានប្រសិទ្ធភាពមួយ ដើម្បីកាត់បន្ថយផលលំបាកនៃវិស័យនេះ។ លោកបានលើកហេតុផលថា ជាក់ស្តែង រដ្ឋាភិបាលនៃប្រទេសជាសមាជិកអាស៊ាន ដូចជាប្រទេសថៃ និងប្រទេសម៉ាឡេស៊ី បានសម្រេចចិត្តអនុវត្តវិធានការបែបនេះ។
លោក ឧកញ៉ា ម៉ុង ឫទ្ធី អនុប្រធានសភាពាណិជ្ជកម្មកម្ពុជា បានលើកឡើងនូវសំណើនេះនៅចំពោះមុខប្រមុខរដ្ឋាភិបាលកម្ពុជា នាឱកាសកិច្ចប្រជុំកំពូលលើកទី១៤ វិស័យឯកជន-រដ្ឋាភិបាល កាលពីថ្ងៃទី២១ ខែវិច្ឆិកា តាំងនាមជាប្រធានក្រុមការងារវិស័យឯកជនទទួលបន្ទុកវិស័យ កសិកម្មនិងឧស្សាហកម្ម។ ប៉ុន្តែ អ្នកធុរៈកិច្ចកម្ពុជាដ៏មានឥទ្ធិលពលរូបនេះមិនទាន់បានទទួលការ ឆ្លើយតបជាទីគាប់ចិត្តភ្លាមៗនោះទេ ផ្ទុយពីតំណាងរោងចក្រកាត់ដេរដែលបានទទួលបានកាត់បន្ថយពន្ធនាំចេញ ចំនួន១០%លើផលិតផលរបស់ពួកគេ បន្ទាប់ពីបានទាមទារអោយមានការបន្ថយពន្ធ៣០%។
ទោះជាយ៉ាង ណាក៏ដោយ លោកម៉ក់ គីមហុង នាយកក្រុមហ៊ុនជប់ នៅតែទាមទារអោយមានការកាត់បន្ថយនេះ។ បើតាមប្រសាសន៍របស់លោក រដ្ឋបានទទួលផលចំណេញយ៉ាងច្រើនពីពន្ធលើការនាំចេញផលិតផល កៅស៊ូនេះ។ លោកបានបន្ថែមទៀតថា នៅអំឡុងពេលរដូវទទួលទិន្នផលខ្ពស់ រដ្ឋអាចទទួលបានពន្ធនាំចេញលើជ័រកៅស៊ូចំនួន៣០០ដុល្លារក្នុងមួយតោន។ បើតាមប្រសាសន៍របស់លោក ក្រុមហ៊ុនជប់ នាំចេញជ័រកៅស៊ូក្នុងមួយឆ្នាំជិត៩ ០០០តោន។
ខាតបង់ប្រាក់ចំណូល៦០%យ៉ាងតិចបំផុត
លោកប៊ុន វណ្ណៈ ម្ចាស់ចំការកៅស៊ូទំហំ៣០ហិចតា នៅចំការលើ ខេត្តកំពង់ចាម ក៏បានវាយតម្លៃផងដែរអំពីភាពចាំបាច់នៃអន្តរាគមន៍របស់រដ្ឋ។ ការធ្លាក់ចុះតម្លៃជ័រកៅស៊ូបានធ្វើអោយលោកខាតបង់ប្រាក់ចំណូល៦០% បើប្រៀបធៀបទៅនឹងប្រាក់ចំណូលរបស់លោកដែលបានមកពីការលក់ជ័រ កៅស៊ូ កាលពីខែសីហា។ លោកមានប្រសាសន៍ទាំងមួហ្មងថា«សព្វថ្ងៃនេះ ខ្ញុំស្ទើរតែលែងសល់លុយ ទុកអោយគ្រួសារហើយ។ ជ័រកៅស៊ូមួយធុងចំណុះ៣០លីត្រមានតម្លៃត្រឹមតែ២០ ០០០រៀល (៥ដុល្លារ) ទល់នឹង៩០ ០០០រៀល (២២ដុល្លារ) កាលពីពេលមុន។ ប្រាក់ចំណូលសព្វថ្ងៃគ្រប់គ្រាន់សម្រាប់តែបើកប្រាក់ខែអោយកម្មករ ប៉ុណ្ណោះ»។
វិបត្តិមួយសម្រាប់កម្មករចៀរជ័រកៅស៊ូ
ការ ធ្លាក់ចុះតម្លៃជ័រកៅស៊ូមិនត្រឹមតែប៉ះពាល់ដល់ផលិតករប៉ុណ្ណោះទេ ប៉ុន្តែ ក៏ប៉ះពាល់ដល់កម្មករតូចតាចផងដែរ ដូចជាករណីរបស់សីហា កម្មករនៅចំការកៅស៊ូជាលក្ខណៈគ្រួសារមួយ នៅភូមិតាអុង ស្រុកចំការលើ។ លោកទទួលបានប្រាក់ចំណូលត្រឹមតែ២០០រៀល ក្នុងជ័រមួយលីត្រ សរុបមកគាត់ទទួលបានជាមធ្យម១០ ០០០រៀល (២,៥ដុល្លារ) ក្នុងមួយថ្ងៃ។ លោកអាចទទួលប្រាក់ចំណូលបន្ថែមតិចតួចទៀត តាមរយៈការប្រមូលជ័រកៅស៊ូស្ងួត នៅជាប់នឹងចាន និងនៅជាប់ដើម ក្នុងអំឡុងពេលរង់ចាំប្រមូលជ័រ នៅពេលរសៀល។ លោកបានសំដែងការខូចចិត្តថា «ថៅកែរបស់ខ្ញុំអោយខ្ញុំធ្វើដូច្នេះ ដោយចែកផលចំណេញអោយគាត់ពាក់កណ្តាល។ ពីមុន ជ័រស្ងួត១០គីឡូ មានតម្លៃ៤០ ០០០រៀល(១០ដុល្លារ) ពោលគឺ២០ ០០០រៀលសម្រាប់ថៅកែ និង២០ ០០០រៀលសម្រាប់ខ្ញុំ។ បច្ចុប្បន្ន ជ័រស្ងួត១០គីឡូដដែលមានតម្លៃត្រឹមតែ៦ ០០០រៀល (១,២៥ដុល្លារ) ពោលគឺម្នាក់ៗទទួលបាន៣០ ០០០រៀល»។ មិនត្រឹមតែប៉ុណ្ណោះ លោកក៏ត្រូវប្រឈមនឹងការឡើងថ្លៃតម្លៃទំនិញប្រើប្រាស់នាពេលសព្វ ថ្ងៃនេះផងដែរ។
គ្មានការក្ស័យធន នៅក្នុងវិស័យដំណាំកៅស៊ូ?
អ្នក ឯកទេសដំណាំកៅស៊ូកម្ពុជាម្នាក់ សុំមិនបញ្ចេញឈ្មោះ បានច្រានចោលចំពោះពាក្យសំដីប្រកាសអាសន្នទាំងនេះ។ កៅស៊ូមួយតោនមានតម្លៃប្រហែល១ ០០០ដុល្លារ វិស័យនេះនៅឆ្ងាយពីការក្ស័យធន ហើយក្រុមហ៊ុនមិនប្រឈមនឹងការបិទទ្វារនោះទេ…។ បើតាមប្រសាសន៍របស់លោក សហគ្រិនកៅស៊ូនៅតែចំណេញប្រាក់ បើទោះបីជាមានការធ្លាក់ចុះតម្លៃលក់ចេញក៏ដោយ។ អ្នកជំនាញការរូបនេះបានលើកយកបទពិសោធន៍ផ្ទាល់ខ្លួនរបស់លោក មកបញ្ជាក់អះអាងថា នៅឆ្នាំ១៩៩៨ និង១៩៩៩ ជ័រកៅស៊ូមានតម្លៃទាបបំផុតប្រហែលជា៤០០ដុល្លារ ក្នុងមួយតោន ខណៈពេលប្រេងឥន្ធនៈមួយធុង ថ្លៃប្រហែល៦៥ដុល្លារ ក្រុមហ៊ុនអាចទទួលប្រាក់ចំណេញពី២ ទៅ៣%។ លោកបានគូសបញ្ជាក់ថាបើសិនជាគេយកប្រាក់ទៅផ្ញើធនាគារ គេអាចទទួលបានអត្រាការប្រាក់ខ្ពស់ជាងនេះទៅទៀត គឺប្រហែល៥ ទៅ៦% ហើយនឹងគ្មានជួបការលំបាកអ្វីនោះទេ។ លោកបានធ្វើការគណនាថាបច្ចុប្បន្ននេះ តាមរយៈតម្លៃនៃការផលិត និងការធ្លាក់ចុះតម្លៃប្រេងសាំងនៅលើទីផ្សារអន្តរជាតិ ជិតប្រហែល៤៥ដុល្លារ ក្នុងមួយធុង សហគ្រិននៃវិស័យកៅស៊ូអាចគ្រប់គ្រងប្រាក់ចំណេញ ស្ទើរតែសមមាត្រទៅនឹងអត្រាការប្រាក់ធនាគារទៅហើយ។
លោក ច័ន្ទ សារុន រដ្ឋមន្រ្តីក្រសួងកសិកម្មក៏បានធ្វើការគណនាដូចគ្នានេះផងដែរ។ នៅចេញពីសិក្ខាសាលាមួយស្តីពីការបណ្តុះបណ្តាលជនបទ កាលពីថ្ងៃច័ន្ទ ទី១៥ ខែធ្នូ លោកបានវាយតម្លៃថាការធ្លាក់ចុះតម្លៃកៅស៊ូនាពេលបច្ចុប្បន្ន មិនបានគំរាមកំហែងដល់អាយុជីវិតរបស់ក្រុមហ៊ុននានានៅក្នុងប្រទេស កម្ពុជានោះទេ។ លោកបានរម្លឹកថាវិស័យនេះក៏ធ្លាប់ប្រឈមនឹងវិបត្តិកាលពីឆ្នាំ ១៩៩៨ដែរ។ លោករដ្ឋមន្រ្តីបានប្រកាសថា «ក្រុមហ៊ុនមិនបានបិទទ្វារនោះទេ ព្រោះជ័រកៅស៊ូនៅតែហូរចេញពីដើម ទោះបីជាគេមិនចៀរវាក៏ដោយ។ យើងយល់ឃើញថាសព្វថ្ងៃនេះ សហគ្រិនជួបការលំបាក ដោយសារស្ថានភាពពិភពលោក។ ប៉ុន្តែ ខ្ញុំជឿជាក់ថាតម្លៃកៅស៊ូនឹងកើនឡើងសាជាថ្មី ព្រោះតម្រូវការប្រចាំថ្ងៃវត្ថុធាតុដើមប្រភេទនេះមានការ ប្រើប្រាស់ច្រើន នៅលើពិភពលោក»។ ជុំវិញការសុំបញ្ចុះពន្ធនាំចេញ លោកច័ន្ទ សារុន មានប្រសាសន៍ថាលោកមានបំណងពិភាក្សាអោយកាន់តែស៊ីជម្រៅ ជាមួយរដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ ព្រោះនេះមិនមែន«ទំនួលខុសត្រូវ»របស់លោកទេ។
មាន រឺមិនមានការកាត់បន្ថយពន្ធក៏ដោយ ក៏កៅស៊ូកម្ពុជានៅតែអាចស្វែងរកទីផ្សារបាន ជាពិសេសនៅក្នុងតំបន់។ យោងតាមលោកម៉ក់ គីមហុង ប្រទេសចិនស្ថិតនៅក្នុងចំណោមអតិថិជនដ៏សំខាន់ បន្ទាប់មកគឺប្រទេសវៀតណាម ម៉ាឡេស៊ី សិង្ហបុរី និងនៅតាមបណ្តាប្រទេសអឺរុបមួយចំនួនតូច ដូចជាអាល្លឺម៉ង់ និងប៊ែលហ្សិក។ លោកបានវិភាគថា «រាល់ជ័កៅស៊ូទាំងអស់ខ្មែរត្រូវបាននាំចេញទៅកាន់ប្រទេសចិន។ ទោះបីជាយើងលក់អោយទៅប្រទេសវៀតណាមក៏ដោយ ក៏ប្រទេសនេះធ្វើការកែច្នៃជ័រទាំងនេះ រួចនាំចេញទៅកាន់ប្រទេសចិន…។ ចិនគឺជាប្រទេសប្រើប្រាស់កៅស៊ូមួយនៅក្នុងចំណោមប្រទេសប្រើ ប្រាស់កៅស៊ូដ៏ច្រើនបំផុតនៅលើពិភពលោក…»។
ដើម្បីទទួល ផលចំណេញពីតម្រូវការកើនឡើងរបស់ចិន និងទទួលរងផលប៉ះពាល់តិចតួចពីការប្រែប្រួលតម្លៃជ័រកៅស៊ូ វិស័យកៅស៊ូនៅកម្ពុជាអាចនឹងត្រូវឆ្លងកាត់ដំណាក់ផ្សេងៗ ដូចប្រទេសជិតខាងរបស់ខ្លួន៖ ការកែច្នៃជ័រកៅស៊ូជាផលិតផលដែលមានតម្លៃបន្ថែមខ្ពស់ ដែលសហគ្រិនកម្ពុជាមិនបានធ្វើនៅពេលសព្វថ្ងៃនេះ។ បើតាមប្រសាសន៍របស់លោករដ្ឋមន្រ្តីកសិកម្ម ប្រទេសកម្ពុជាអាចនឹងទទួលអត្ថប្រយោជន៍ពីជំនាញបច្ចេកវិទ្យា ដ៏ប៉ិនប្រសប់របស់ក្រុមហ៊ុនបរទេសពីរ គឺក្រុមហ៊ុនចិន និងក្រុមហ៊ុនបារាំង ឈ្មោះ Michelin។ បើតាមលោកច័ន្ទ សារុន ក្រុមហ៊ុនទាំងនេះបានសំដែងការចាប់អារម្មណ៍របស់ពួកគេ ចំពោះប្រទេសកម្ពុជា ហើយសព្វថ្ងៃនេះ កំពុងសិក្សាអំពីយថាភាព ក្នុងការបង្កើតក្រុមហ៊ុនផលិតសំបកកង់ទូទៅនៅកម្ពុជា។ កត្តានេះគ្រប់គ្រាន់ ក្នុងការធ្វើអោយវិស័យដំណាំកៅស៊ូនៅកម្ពុជាមានដំណើរការ វិត្តន៍ទៅមុខមួយកំរិតបន្ថែមទៀត។
-ប្រឈមមុខនឹងវិបត្តិ កម្ពុជាត្រូវបង្កើតសមត្ថភាពប្រកួតប្រជែង និងបរិយាកាសវិនិយោគទុន (១១-១២-២០០៨)
-រៀលរឺដុល្លារៈ តើរូបិយវត្ថុមួយណាសម្រាប់កម្ពុជានៅពេលមានវិបត្តិពិភពលោក? (០៩-១២-២០០៨)
-លោកនីកូឡា ដឺវីឡេ អគ្គនាយកក្រុមហ៊ុនសម្បទានព្រលានយន្តហោះ : "កម្ពុជាអាចដកខ្លួនចេញផុតពីស្ថានភាពលំបាក" (០៣-១២-២០០៨)
-សម្តេចហ៊ុន សែន យល់ព្រមបន្ថយពន្ធនាំចេញ១០%សម្រាប់វិស័យវាយនភ័ណ្ឌ GMAC ទាមទារ៣០% (២១-១១-២០០៨)
|
|
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
