|
អធិប្បាយចុងក្រោយ
|
| រូបចាមៈ ប្រលោមលោកស្នេហារវាងក្រមុំបារាំងនិងបុរសចាមនៅប្រទេសកម្ពុជា |
| ដោយ អេមីកូ ស្តក់ | | | ១៩-១២-២០០៨ | 
កម្ពុជា ៖ ហ្គាប្រ៊ីយ៉ែល ព្យាណែត ហៅ ម៉ី ប៊ី
© គ្រួសារ ម៉ូសារ «កាល ពីព្រេងនាយ មានដំណាលថាក្រមុំជនជាតិបារាំងដ៏ស្រស់សោភាមួយរូប ស្ថិតនៅក្នុងសភាពភិតភ័យ បានកំពុងតែរត់គេចខ្លួន ចេញពីការតាមដេញចាប់របស់ពួកជប៉ុន នៅតាមដងទន្លេមេគង្គ នាខេត្តកំពង់ចាម។ យុវតីរូបនោះរស់នៅតែខ្លួនមួយ គ្មានឪពុកម្តាយឡើយ (ឪពុកម្តាយជាអ្នកដាំកៅស៊ូ)។ តួឯងស្រីដ៏កំសត់របស់យើងបានរត់រហូតមកទល់នឹងមាត់ទន្លេ ទ័លច្រករត់ទៅណាលែងរួច។ ក្តីសង្ឃឹមប្រែរលាយសាបសូន្យអស់។ រំពេចនោះ ស្រាប់តែមានបុរសអ្នកនេសាទជនជាតិចាមដ៏ស្រស់សង្ហាវ័យក្មេងមួយរូប ដែលកំពុងអ៊ុំទូក បានមកដល់ ព្រមទាំងបានជួយសង្គ្រោះនាងពីសត្រូវទៀតផង។ កំលោះក្រមុំមួយគូនេះបានជិះទូក ឆ្លងកាត់រលកទន្លេតិចៗ.... ជាមួយសេចក្តីស្នេហា... និងបានចូលចតនៅមាត់ច្រាំងទន្លេ នៅភូមិទ្រា និងនៅទីនោះហើយ ពួកគេទាំងពីរក៏បានសម្រេចចិត្តរៀបការជាមួយគ្នា រស់នៅយ៉ាងមានសេចក្តីសុខ បង្កើតកូនចៅជាច្រើន»។ តើនេះគឺជាទំព័របើកកកាយប្រលោមលោកស្នេហា មួយ រឺជាទំព័រមួយដែលដកស្រង់ចេញពីប្រជុំរឿងព្រេងទិនាន ដើម្បីបំភ័ន្តក្មេងៗ? រឺមួយ ជាសាច់រឿងដ៏ផ្អែមល្អែមមួយ ដែលត្រូវចាក់បញ្ចាំងនៅក្នុងរោងភាពយន្ត។ តាមការពិត ទាំងអស់នេះសុទ្ធតែមិនពិត។ ប្រវត្តិរបស់ក្រមុំបារាំងដ៏ស្រស់ប្រិមប្រិយនិងព្រះអង្គម្ចាស់ ជនជាតិចាមដ៏ស្រស់សង្ហាររបស់នាង ត្រូវបានចាស់ៗ លើកយកមកនិទាននៅក្នុងពិភពជនជាតិចាម ទូទាំងប្រទេសកម្ពុជា ប្រៀបបានដូចជាគូស្នេហ៍នេះគឺជាផ្នែកមួយនៃប្រពៃណីរបស់ពួកគេ ។ ពួកគេបាននិទានប្រវត្តិស្នេហាផ្សងព្រេងមួយនេះ ហាក់បីដូចជាធ្លាប់បានស្គាល់ «ក្រមុំបារាំង» និងវីរៈបុរសជនជាតិចាមរបស់នាង ប៉ុន្តែគ្មាននរណាម្នាក់បានដឹងអំពីសាច់រឿងបន្ទាប់នៃគូស្នេហ៍ ទេវកថានេះនោះទេ។ ព្រេងនិទាននេះគឺជាផ្នែកខ្លះនៃប្រលោមលោកស្នេហាកម្ពុជា យុទ្ធកថាចាម និងប្រលោមលោកបារាំងឥណ្ឌូចិន។ តើរឿងព្រេងនិទាននេះត្រូវបានសរសេរឡើង ដោយផ្អែកលើការពិតមួយដែររឺទេ?
នៅភូមិទ្រា ស្រុកក្រូចឆ្មារ ខេត្តកំពង់ចាម គេមានការព្រួយបារម្ភផ្សេង ក្រៅពីការរៀបរាប់រឿងព្រេងនិទានចំណាស់និងល្បីសុះសាយមួយនេះ។ ទួន (គ្រូបង្រៀនឥស្លាម) បានចងចិញ្ចើម មានទឹកមុខមិនសូវសប្បាយរីករាយ នៅពេលលឺគេនិយាយអំពីពង្សាវតានេះ ព្រោះថាប្រវត្តិស្នេហានេះពិតជាកើតមានឡើងនៅទីនេះ។ ប្រសិនជាគេស្គាល់តួអង្គនៅក្នុងរឿងព្រេងនិទានទាំងនេះច្បាស់ ក៏ដោយសារទីនេះ ជាកន្លែងដែលពួកគេធ្លាប់រស់នៅ គឺនៅមាត់ច្រាំងទន្លេមេគង្គ។ នៅមាត់ច្រាំងនេះ ក៏មានទូកចម្លងមួយ ដែលអាចផ្ទុកមនុស្សបានច្រើនជាងទូករបស់អ្នកនេសាទវ័យក្មេងរបស់យើង ផងដែរ។
ដូចនេះ ម៉ី ប៊ី និងតា អាម៉ាត់ ពិតជាមានប្រាកដមែន។ ប៉ុន្តែ ខុសគ្នាពីតួអង្គនៅក្នុងរឿងព្រេងនិទាន។ តួអង្គទាំងពីររបស់យើង ពិតជាមាន ប៉ុន្តែ ពួកគេមិនមែនជាមនុស្សអមតៈនោះទេ។ ពួកគាត់ទាំងពីរបានលាចាកលោកយើងនេះទៅហើយ។ ជាមួយនឹងស្នាមញញឹម ក្មួយស្រីម្នាក់ ក្នុងចំណោមក្មួងស្រីរបស់ពួកគាត់ ស្ថិតក្នុងវ័យ៧០ឆ្នាំ ដែលនៅតែរស់នៅក្នុងផ្ទះពីកុមារភាពរបស់ខ្លួន បានអះអាងរឿងរ៉ាវដ៏អាថ៌កំបាំងនេះ។ លោកយាយត្រូវជាក្មួយរូបនេះបានបង្ហាញអាល់ប៊ុមរូបថត ដោយបានរម្លឹកទាំងស្រពិចស្រពិលនូវប្រវត្តិរបស់ពូមីងរបស់គាត់ ។
លោកយាយ ម៉ី ខាឌីយ៉ា បានរៀបរាប់ថា «អូហ៍ ពូរបស់ខ្ញុំ... គាត់គឺជាមនុស្សល្បី! គឺជាបុរសមានអំណាច និងត្រូវបានគេគោរពបំផុត។ គេនិយាយថាគាត់គឺជាជនជាតិអារ៉ាប់... ជាមនុស្សម្នាក់ ក្នុងចំណោមអ្នកដែលគេភ័យខ្លាច។ គាត់ក៏ល្បី ថាកាចគួរសមផងដែរ...»។ គាត់គឺជាអាជីវករដ៏រីករាយ ជាប្រធានព្រះវិហារឥស្លាម រឺជាមន្រ្តីរាជការនៅសម័យអាណាព្យាបាលបារាំង។ ប្រភពដើមដ៏ចម្លែកនិងស្រពិចស្រពិលរបស់ពូ អុង អាម៉ាត់អាចបញ្ជាក់បានថា គាត់មិនមែននៅក្មេង ដូចអ្នកជួយសង្គ្រោះនៅក្នុងរឿងព្រេងនិទាននោះទេ។ គាត់គឺជាបុរសវ័យចំណាស់ ហើយបុព្វបុរសរបស់គាត់មានកេរ្តិ៍ឈ្មោះល្បីល្បាញគួរសម នៅក្នុងចំណោមខ្មែរឥស្លាម ក៏ដូចជានៅចំណោមពុទ្ធសាសនិក។ ដូនតារបស់គាត់មកពីពិភពអារ៉ាប់ និងឥណ្ឌា។ ជំនាញនិងទេពកោសល្យបន្សល់ទុកពីដូនតាដ៏អាថ៌កំបាំង ស្ថិតនៅលាយឡំនៅក្នុងរូបភាពរបស់«តាអារ៉ាប់» ក៏ដូចជានៅក្នុងរូបភាពរបស់អុង អាម៉ាត់។
ជាការពិតណាស់ ក្រមុំស្បែកសរូបនេះបានក្លាយជាស្រីស្នេហ៍ទី៤ របស់បុរសខ្លាំងយើង។ ក្មួយស្រី ម៉ី ខាឌីយ៉ា បានរម្លឹកថា «គាត់គឺជាបុរសដែលមានភរិយាច្រើន។ នេះគឺជាការពិត»។ «ដំបូងឡើយ គាត់រៀបការជាមួយស្រ្តីជនជាតិចាម រួចមកក៏មានកូន។ ក្រោយមក រៀបការជាមួយស្រ្តីខ្មែរ ក៏មានកូនដែរ ហើយរៀបការជាមួយជនជាតិចិន... ក៏មានកូនដែរ។ ជាចុងក្រោយ រៀបការជាមួយស្រ្តីបារាំង ក៏មានកូនទៀត... នៅមានទៀត!»។ លោកយាយម៉ី ខាឌីយ៉ា បដិសេធរៀបរាប់ពង្សាវតាជំនាន់ក្រោយរបស់ពូគាត់។
គឺ នៅប្រទេសបារាំង ទីក្រុងប៉ារីស អ្នកស្រី អ៊ុម កាទី អាយុ៥៣ឆ្នាំ ចៅស្រីរបស់ប្តីប្រពន្ធមួយគូនេះ នៅចងចាំជីដូន ដែលគាត់ធ្លាប់រស់នៅជាមួយ កាលពីកុមារភាព។ «ការពិត ជីតារបស់ខ្ញុំបានចាប់ជំរិតលោកយាយខ្ញុំឈ្មោះ ម៉ី ប៊ី។ កាលនោះ នៅពេលចេញពីសាលារៀន និស្សិតដ៏ស្រស់សោភា ឈ្មោះ ហ្គាប្រ៊ីយ៉ែល ព្យាណែត ត្រូវបានចាប់ជំរិតដោយអនាគតស្វាមីរបស់គាត់។ «គាត់បាននាំលោកយាយ មកកាន់ទីក្រុងភ្នំពេញ និងបានយកគាត់ធ្វើជាភរិយា។ ពេលនោះ លោកយាយ មានអាយុ១៦ឆ្នាំ»។ រឿងរ៉ាវនេះ កើតមានឡើងនៅប្រហែលជាឆ្នាំ១៩១៥ មុនសង្គ្រាមលោកលើកទីពីរ និងមុនការឈ្លានពានរបស់ពួកជប៉ុន ដែលត្រូវតំណាលនៅក្នុងរឿងព្រេងនិទាន។
នៅភូមិទ្រា «យុវតីជនជាតិបារាំង» បានប្រែក្លាយយ៉ាងឆាប់រហ័សជា «យុវតីចាម»។ ត្រង់នេះហើយដែលចាស់ៗចងចាំ។ គាត់បានគោរពសាសនាឥស្លាម តាមស្វាមីរបស់គាត់ ដែលជាប្រធានវិហារឥស្លាម។ គាត់គ្មានអ្វីត្រង់ណា ដែលខុសប្លែកពីអ្នកជិតខាងរបស់គាត់នោះទេ។ គាត់ពាក់ស្បៃមុខលើក្បាល ស្លៀកសារុងដូចគេឯង។ គាត់បានប្តូរឈ្មោះកំណើតពី ហ្គាប្រ៊ីយ៉ែល ព្យាណែត មកជាឈ្មោះ «ម៉ី ប៊ី» និង «យ៉េយ ហ្គាហ៍»។
យុវតីបារាំងម្នាក់នេះ បានស្ម័គ្រចិត្តរួមសម្ព័ន្ធមេត្រីជាមួយបុរសចាម យ៉ាងឆាប់រហ័ស គួរអោយភ្ញាក់ផ្អើល។ «យើងមិនដឹងមូលហេតុអ្វីបានជាគាត់យល់ព្រមដូច្នេះនោះទេ។ គាត់តែងតែនិយាយប្រាប់ខ្ញុំថាជីតារបស់ខ្ញុំ «បានបង្កើតមនោសញ្ចេតនាយ៉ាងជ្រាលជ្រៅចំពោះរូបគាត់» ហើយគាត់ក៏ចុះចាញ់សេចក្តីសេ្នហារបស់ជីតាខ្ញុំភ្លាម។ ឪពុកម្តាយរបស់គាត់ ដែលប្រហែលជាមន្រ្តីរាជការផ្នែករដ្ឋបាល នៅទីក្រុងភ្នំពេញ មិនបានជំទាស់នឹងស្នេហានេះនោះទេ ហើយក៏យល់ព្រមអោយអ្នកទាំងពីររៀបមង្គលការ។
ដោយស្នាក់នៅ គេហដ្ឋានក៏ធំមួយ នៅមាត់ទន្លេ នាភូមិទ្រា ម៉ី ប៊ី បានប្រែក្លាយជាជនជាតិចាម និយាយភាសាចាម ក៏ដូចជាភាសាចិន និងខ្មែរបានយ៉ាងស្ទាត់ជំនាញ។ គាត់និយាយភាសាចាមជាមួយចៅៗរបស់គាត់នៅទីក្រុង ដើម្បីកុំអោយពួកគេភ្លេចភាសាកំណើតរបស់ខ្លួន។ ប៉ុន្តែ ម៉ី ប៊ីនៅតែសរសេរជាភាសាបារាំងដដែល។ គាត់បានជម្រុញអោយចៅស្រីរបស់គាត់ បន្តការសិក្សានៅវិទ្យាល័យបារាំង នាទីក្រុងភ្នំពេញ និងមានទំនាក់ទំនងមិត្តភាព ជាមួយអាចារ្យម្នាក់ នៅរាជធានី។
នៅឆ្នាំ១៩៧៤ ស្ថិតក្នុងវ័យ៧៦ឆ្នាំ លោកយាយ ហ្គាប្រ៊ីយ៉ែល ព្យាណែត បានទទួលមរណៈភាព តាមស្វាមីរបស់គាត់ ដែលបានបាត់បង់ជីវិតអស់រយៈពេលប៉ុន្មានឆ្នាំមុន។ គាត់ត្រូវបានបញ្ចុះសពដោយបងប្រុសនិងបងស្រី ដែលមកពីប្រទេសបារាំង ដើម្បីឧទ្ទិសកុសលជាចុងក្រោយដល់គាត់។ ប្រវត្តិសាស្រ្តបានមិននិយាយថាតើសាកសពរបស់លោកយាយ ត្រូវបញ្ចុះនៅក្រោមរូបឈើឆ្កាងបែបគ្រិស្តសាសនា នៅភ្នំពេញ រឺនៅក្នុងផ្នូរសពឥស្លាមសាសនានៅភូមិទ្រា។
ជាចុងក្រោយ រឿងព្រេងនិទានបានផ្អែកលើប្រវត្តិពិតនេះ ដោយបានបង្កើតជាបរិបទជាច្រើនខុសៗគ្នា៖ សត្រូវជប៉ុនរួមមួយ អ្នកគ្រប់គ្រងរដ្ឋបាលប្រែក្លាយជាអ្នកដាំដំណាំ អ្នកនេសាទម្នាក់ដែលពោរពេញដោយអំណាចនិងភាពអាថ៌កំបាំង ស្រ្តីជនជាតិស្បែកសរស់នៅសម្របទៅតាមបរិយាកាសនៅតាមដងទន្លេ មេគង្គ...។ ជាការពិតណាស់ សម្ព័ន្ធភាពរវាងម៉ី ប៊ី និងតា អាម៉ាត់ គឺជាសម្ព័ន្ធសេ្នហាមួយនៅក្នុងរឿងប្រលោមលោកខ្មែរ រឿងយុទ្ធកថាចាម និងប្រលោមលោកឥណ្ឌូចិន...។ នេះគ្រាន់តែជាការផ្សព្វផ្សាយប្រវត្តិស្នេហាដ៏ល្បីឈ្មោះមួយ ប៉ុណ្ណោះ!។
|
|
អត្ថបទបន្ថែម-និពន្ធដោយ អេមីកូ ស្តក់ បេក្ខជនបណ្ឌិតផ្នែកជាតិពន្ធុវិទ្យា នៃសាកលវិទ្យាល័យប៉ារីស១០ ណង់តែរ (Université Paris X Nanterre) ដែលបានមកនៅប្រទេសកម្ពុជា តាំងពីឆ្នាំ២០០០
វិបសាយរបស់អេមីកូ ស្តក់ គឺ Du fin fond du grenier តំរុយខ្លះៗ
-វាក្យស័ព្ទ ទាក់ទងនឹងអ្នកកាន់សាសនាឥស្លាម និងសាសនាឥស្លាមនៅប្រទេសកម្ពុជា |
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
