|
អធិប្បាយចុងក្រោយ
|
| ការប្រារព្ធពិធីខួបលើកទី៣០ឆ្នាំនៃទិវាជ័យជំនះ ៧ មករា នៅប្រទេសកម្ពុជា ក្រោមការរៀបចំរបស់គណបក្សប្រជាជនកម្ពុជា |
| ដោយ ដួង សុខា | | | ០៧-០១-២០០៩ | 
ភ្នំពេញ (កម្ពុជា) ថ្ងៃទី៧ មករា ២០០៩៖ មហាជនប្រមូលផ្តុំនៅពហុកីឡាដ្ឋានជាតិអូឡាំពិក ដើម្បីចូលរួមពិធីរំលឹកខួបអនុស្សាវរីយ៍ទី៣០ នៃការរំដោះប្រទេសជាតិពីពួកខ្មែរក្រហម
© វណ្ណឌី រតនា ប្រទេសកម្ពុជាបានប្រារព្ធខួបទី៣០ឆ្នាំនៃទិវាជ័យជំនះ៧ មករា នៅពហុកីឡាដ្ឋានជាតិអូឡាំពិក (មានមហាជនចូលរួមប្រមាណ៥ម៉ឺននាក់) ក្រោមការរៀបចំរបស់គណបក្សកាន់អំណាច គឺគណបក្សប្រជាជនកម្ពុជា។ ពាក្យស្លោកលើកសរសើរអំពីទិវាជ័យជំនះ៧ មករា និងគណបក្សប្រជាជនកម្ពុជា ត្រូវបានស្រែកជយឃោសឡើងជាបន្តបន្ទាប់ ពីសំណាក់មហាជន ដែលរួមមានមន្រ្តីរាជការ កងកម្លាំងប្រដាប់អាវុធ ព្រះសង្ឃ សិស្សានុសិស្ស ហើយនិងតំណាងប្រជាពលរដ្ឋនៅតាមខ័ណ្ឌនានានៃរាជធានីភ្នំពេញ និងខេត្តក្រុងទាំង២៤ទូទាំងប្រទេស។ ជានិច្ចកាល ថ្ងៃ៧មករា តែងតែបង្កើតជាជម្លោះស្លាបប៉ាកកា ក្នុងចំណោមអ្នកនយោបាយកម្ពុជា ដោយសារអ្នកខ្លះ ចាត់ទុកថ្ងៃនេះគឺជាថ្ងៃរំដោះប្រទេសជាតិពីពួកចោរព្រៃខ្មែរក្រហម ហើយសម្រាប់អ្នកផ្សេងទៀត ចាត់ទុកថ្ងៃនេះ គឺជាពេលចាប់ផ្តើមការចូលឈ្លានពានរបស់ប្រទេសវៀតណាម។ ពិធីរំលឹកខួបដ៏អធឹកអធម
សម្តេចទាំងបី (សម្តេចជា ស៊ីម ប្រធានព្រឹទ្ធសភា- សម្តេចហេង សំរិន ប្រធានរដ្ឋសភា -សម្តេចហ៊ុន សែន នាយករដ្ឋមន្រ្តី) បានជិះលើរថយន្តបើកដំបូលមួយគ្រឿង ជុំវិញតារាងបាល់ទាត់មួយជុំ ដើម្បីស្វាគមន៍ដល់មហាជន រួចក៏បានឡើងលើវេទិកាកិត្តិយស។ នៅចំកណ្តាលបរិវេណស្តាត រូបទេវតាដ៏ធំមួយ កំពុងបាចផ្កា ដែលជារូបតំណាងអោយគណបក្សប្រជាជនកម្ពុជា។ ក្បួនព្យុហយាត្រាដ៏ធំមួយ ដែលរៀបចំឡើងដោយខេត្តក្រុងទាំង២៤ បានបង្ហាញសក្កានុពលរបស់ខ្លួននិងសមិទ្ធិផលនានារបស់គណបក្សប្រជាជនកម្ពុជា (សម្រាប់រាជធានីភ្នំពេញ មានរូបវិមានឯករាជ្យសម្បៈនិម្មិត រំលេចទៅដោយរូបសំណង់អគារដ៏ខ្ពស់ស្កឹមស្កៃ សម្រាប់ខេត្តសៀមរាប មានរូបថតសម្តេចនាយករដ្ឋមន្រ្តីហ៊ុន សែន កំពុងវាយកូនហ្គូល -ល-) ព្រមទាំងមានរបាំ និងចម្រៀងកំដរអារម្មណ៍ផងដែរ។
ហេតុអ្វីប្រារព្ធទិវា ៧ មករា?
លោកខៀវ កាញ៉ារីទ្ធ រដ្ឋមន្រ្តីក្រសួងព័ត៌មាននិងជាអ្នកនាំពាក្យរដ្ឋាភិបាលកម្ពុជា បានពន្យល់នៅក្នុងសន្និសីទសារព័ត៌មានមួយ កាលពីព្រឹកថ្ងៃអាទិត្យ ទី៤ ខែមករាថា ការប្រារព្ធពិធីរំលឹកខួបបែបនេះមានភាពចាំបាច់ណាស់ ព្រោះនេះគឺជា«មេរៀនប្រវត្តិសាស្រ្ត» ដែលមិនត្រូវបំភ្លេចចោល គឺជាមេរៀននៃការសម្រេចចិត្តដ៏អាក្រក់មួយនៃមេដឹកនាំប្រទេសជាតិ ដែលបានបំផ្លាញប្រទេសទាំងស្រុង និងជាមេរៀននៃការបែកបាក់ ដែលត្រូវជំនះអោយបាន។ «យើងត្រូវចំណាយពេល៣០ឆ្នាំ ដើម្បីកសាងប្រទេសជាតិឡើងវិញ!»។
លោករដ្ឋមន្រ្តីបានប្រឆាំងទៅនឹងអ្នកដែលចង់ប្រារព្ធទិវា២៣ តុលា ១៩៩១ ជាងថ្ងៃ៧ មករា ដោយលើកហេតុផលមកសំអាងថា «គ្មានថ្ងៃ៧ មករា ក៏គ្មានថ្ងៃ២៣ តុលានោះទេ»។ ថ្ងៃទី២៣ តុលា ១៩៩១ គឺជាថ្ងៃចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស ដែលលែងជាថ្ងៃឈប់សម្រាកផ្លូវការនៅប្រទេសកម្ពុជា ហើយជាថ្ងៃដែលភាគីតស៊ូខ្មែរទាំងអស់យល់ព្រមអង្គុយចរចាលើតុតែមួយ។ ម្យ៉ាងវិញទៀត បើតាមលោករដ្ឋមន្រ្តី កិច្ចព្រមព្រៀងនេះត្រូវបានស្លាប់ ក្រោយពេលដែលខ្មែរក្រហមផ្លាស់ប្តូរគំនិត និងសម្រេចចិត្តដកខ្លួនចេញពីដំណើរការបោះឆ្នោត ក្រោមការគ្រប់គ្រងរបស់អ៊ុនតាក់ (អាជ្ញាធរបណ្តោះអាសន្ននៃអង្គការសហប្រជាជាតិប្រចាំប្រទេសកម្ពុជា)។ លោកខៀវ កាញ៉ារីទ្ធបានលើកឡើងម្តងទៀតថា «យើងត្រូវរង់ចាំរហូតដល់ឆ្នាំ១៩៩៨ ទើបសង្គ្រាមបញ្ចប់» គឺនៅពេលចលនាតស៊ូខ្មែរក្រហមបានចុះចូលជាស្ថាពរ។
លោកបានលំអិតថា នៅថ្ងៃ៧ មករា ខ្មែរក្រហមត្រូវបានបណ្តេញចេញដោយកម្លាំងរបស់កងទ័ពរណសិរ្យសាមគ្គីសង្រ្គោះជាតិកម្ពុជា ដែលដឹកនាំដោយសម្តេចហេង សំរិន ដោយមានការជួយគាំទ្រពីសំណាក់កងទ័ពវៀតណាម។
ប្រសិនជាមនុស្សមួយចំនួនស្តីបន្ទោសគណបក្សប្រជាជនកម្ពុជាថាមិនទទួលស្គាល់សមិទ្ធិផលរបស់អ៊ុនតាក់ ក៏ដោយសារ «អ៊ុនតាក់បានចំណាយថវិកាជាង២ពាន់លានដុល្លារសម្រាប់កម្ពុជា ប៉ុន្តែ ៨០%នៃថវិកានេះ មិនបានចូលក្នុងហោប៉ៅរបស់ប្រជាជនកម្ពុជា ប៉ុន្តែ ត្រូវបានប្រើប្រាស់ដើម្បីទិញសម្ភារៈនៅបរទេស [...]។ ម្យ៉ាងវិញទៀត អ៊ុនតាក់មិនបានជួយយើងកសាងសាលារៀន និងមន្ទីរពេទ្យ និងមិនបានជួយបើកប្រាក់បៀវត្សជូនគ្រូបង្រៀន...នោះទេ។ គ្មាននរណាជួយយើងឡើយ!»។
លោកខៀវ កាញ៉ារីទ្ធៈ ព្រឹត្តិការណ៍នេះមិនមែនជារបស់គណបក្សប្រជាជនកម្ពុជាទេ
ដើម្បីពន្យល់ប្រាប់អ្នកសារព័ត៌មាន អ្នកនាំពាក្យរដ្ឋាភិបាលរូបនេះបានបញ្ជាក់ថា គណបក្សប្រជាជនកម្ពុជាមិនបានដណ្តើមយកមុខមាត់តែម្នាក់ឯងនោះទេ។ លោកបានបង្ហាញថា រូបសញ្ញាផ្លូវការនៃពិធិ ៧មករា នឹងមិនមានរំលេចរូបគណបក្សឡើយ ហើយ«គ្រប់គណបក្សទាំងអស់» ត្រូវបានអញ្ជើញចូលរួមនៅក្នុងពិធីនេះ។
លោកខៀវ កាញ៉ារីទ្ធបានបកស្រាយបំភ្លឺថា «កន្លងមក គណបក្សប្រឆាំងបានចោទប្រកាន់រដ្ឋាភិបាលថាបានចំណាយថវិការដ្ឋខ្ជះខ្ជាយ ដើម្បីរៀបចំពិធីនេះ ដោយមិនគិតទុកថវិកានេះដើម្បីអភិវឌ្ឍប្រទេសជាតិ។ នៅត្រង់ចំណុចនេះ ខ្ញុំសូមបញ្ជាក់ថាពិធីនេះត្រូវបានចំណាយដោយថវិកាផ្ទាល់ខ្លួនរបស់សមាជិកគណបក្សប្រជាជន»។
លោករដ្ឋមន្រ្តីមានប្រតិកម្មទៅនឹងអ្នកដែលថាគណបក្សប្រជាជន «បង្ខំ» ប្រជាពលរដ្ឋអោយទទួលស្គាល់ទិវាជ័យជំនះ៧ មករា។ លោកមានប្រសាសន៍ការពារខ្លួនថា «ប្រសិនជាពិតមែននោះ គណបក្សប្រជាជនកម្ពុជានឹងប្រមូលប្រជាពលរដ្ឋអោយបានច្រើនជាងនេះ ពីរដង!»។ អ្នកដែលធ្វើដំណើរមកចូលរួម ទាំងអស់សុទ្ធតែស្ម័គ្រចិត្ត»។
ជាចុងក្រោយ លោកខៀវ កាញ៉ារីទ្ធបានសន្និដ្ឋានថាអ្នកដែលច្រានចោលនិមិត្តរូបថ្ងៃ៧ មករា សុទ្ធសឹងជាប្រជាពលរដ្ឋកម្ពុជា រស់នៅបរទេស។ «ពួកគេរស់នៅ ដោយមានអារម្មណ៍អាម៉ាស់។ ពួកគេដឹងថានៅពេលជនរួមជាតិរបស់ខ្លួនទទួលរងនូវការឈឺចាប់ ពួកគេអសមត្ថភាពនិងមិនអាចចែករំលែកក្តីទុក្ខវេទនាជនរួមជាតិរបស់ខ្លួនបាន។ ពួកគេស្គាល់ច្បាស់ ថ្ងៃ៧ មករា។ ការរិះគន់ទាំងនោះគ្រាន់តែជារឿងនយោបាយប៉ុណ្ណោះ!»។
សមិទ្ធិផលគណបក្សប្រជាជនកម្ពុជា
សម្តេចជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានថ្លែងសុន្ទរកថាជាផ្លូវការនៅក្នុងអង្គពិធី នៅពហុកីឡាដ្ឋានជាតិអូឡាំពិកនេះថា «ការរៀបចំខួបអនុស្សាវរីយ៍លើកទី៣០ឆ្នាំ ថ្ងៃ៧ មករានេះ មានគោលបំណងរំលឹកដល់វិញ្ញាណក្ខន្ធទាហាន និងបងប្អូនជនរួមជាតិយើងនៅទូទាំងប្រទេស ដែលតស៊ូយ៉ាងអង់អាចក្លាហាន ដើម្បីជួយសង្គ្រោះប្រទេសជាតិពីរបបប្រល័យពូជសាសន៍»។ សម្តេចក៏បានលើកសរសើរកងទ័ពរំដោះរណសិរ្យ និងសូមសំដែងសេចក្តីដឹងគុណ ក្នុងនាមជាប្រជារាស្រ្តកម្ពុជា ចំពោះប្រទេសវៀតណាម ដែលបានមកជួយសង្គ្រោះប្រទេសកម្ពុជា ក្នុងអំឡុងពេលកើតមានកលិយុគ។
បន្ទាប់មក សម្តេចជា ស៊ីមក៏បានលើកឡើងពីសមិទ្ធិផលរីកចម្រើនជាច្រើនដែលកើតចេញពីស្នាដៃរបស់គណបក្សសម្តេច និងនយោបាយ «ឈ្នះ ឈ្នះ» ដែលជួយធ្វើអោយមាន «ការរួបរួម និងផ្សះផ្សាជាតិ»។ សម្តេចក៏បានលើកឡើងផងដែរអំពីចំណុចរីកចម្រើនមួយចំនួន ដូចជាស្ថេរភាពម៉ាក្រូសេដ្ឋកិច្ច នៅអំឡុងប៉ុន្មានទសវត្សរ៍ចុងក្រោយនេះ ការកាត់បន្ថយភាពក្រីក្រ( ពី៤៧%នៅឆ្នាំ១៩៩៤ មក៣០%នៅឆ្នាំ២០០៧) ការរីកចម្រើនលទ្ធិប្រជាធិបតេយ្យ សេរីពហុបក្ស -ល-។ សម្តេចក៏មិនបានភ្លេចលើកឡើងអំពីមហាជោគជ័យរបស់រាជរដ្ឋាភិបាលកម្ពុជា ដែលបានទទួលជំនួយជិត១ពាន់លានដុល្លារ សម្រាប់ឆ្នាំ២០០៩នេះ។
ទោះជាយ៉ាងណា សម្តេចមានប្រសាសន៍ថា បញ្ហានៅតែមាន ដូចជាជំងឺបាក់ស្បាតដែលបន្សល់ទុកពីរបបខ្មែរក្រហម រឺវប្បធម៌អហឹង្សាដែលត្រូវបន្តបណ្តុះគំនិតឡើង។ ហេតុដូច្នេះហើយទើបបានជា សម្តេចបានលើកឡើងពីមេរៀនអតីតកាលថា «ប្រជារាស្រ្តគឺជាអ្នកបង្កើតប្រវត្តិសាស្រ្ត» «សាមគ្គីភាពគឺជាកត្តាដ៏សំខាន់នៃរាល់ជោគជ័យ» «សន្តិភាពដើរទន្ទឹមនឹងការផ្សះផ្សាជាតិ» «ការពារឯករាជ្យភាព អធិបតេយ្យភាព និងបូរណភាពទឹកដីត្រូវធានាគ្រប់កាលៈទេសៈ» «សាមគ្គីភាពនិងសហប្រតិបត្តិការជាមួយប្រទេសដទៃ ជាពិសេសប្រទេសជិតខាង គឺជារឿងចាំបាច់ ដើម្បីការពារសន្តិសុខ ស្ថេរភាពនិងការរីកចម្រើន»។ ទាក់ទងនឹងកិច្ចសហប្រតិបត្តិការជាមួយប្រទេសជិតខាង សម្តេចបានគាំទ្ររដ្ឋាភិបាល ដែល«បង្កើនកិច្ចខិតខំប្រឹងប្រែង ដើម្បីដោះស្រាយជម្លោះព្រំដែនជាមួយប្រទេសថៃ» ក្នុងគោលបំណងធ្វើអោយមានសន្តិភាព ស្ថេរភាព និងការអភិវឌ្ឍន៍នៅព្រំដែន ឡើងវិញ។
សម្តេចបានបញ្ចប់សុន្ទរកថា ដោយប្រកាសថា «រយៈពេល៣០ឆ្នាំនេះបានបង្ហាញអោយឃើញថា គណបក្សប្រជាជនកម្ពុជាគឺជាគណបក្សរបស់ប្រជាជន បង្កើតដោយប្រជាជន និងដើម្បីប្រជាជន»។  ភ្នំពេញ (កម្ពុជា) ថ្ងៃទី៧ មករា ២០០៩៖ ស្តាតអូឡាំពិក ក្រោយពេលរៀបចំពិធីរំលឹកខួបអនុស្សាវរីយ ៧ មករា
© វណ្ណឌី រតនា
|
|
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
