|
អធិប្បាយចុងក្រោយ
|
| ប៉ូលីសបានបង្ហាញអត្តសញ្ញាណ មេខ្លោងជាប់សង្ស័យដាក់គ្រាប់បែកច្នៃនៅទីក្រុងភ្នំពេញ |
| ដោយ ដួង សុខា | | | ១០-០១-២០០៩ | ភ្នំពេញ (កម្ពុជា) ថ្ងៃទី១០ មករា ២០០៩៖ សន្និសីទសារព័ត៌មាននៅអគ្គស្នងការដ្ឋាននគរបាលជាតិ ទាក់ទងនឹងការដាក់គ្រាប់បែកច្នៃកាលពីថ្ងៃទី២ ខែមករា។ ប៉ូលីសបានបង្ហាញអត្តសញ្ញាណរបស់សោម ឯក មេខ្លោងប្រតិបត្តិការទាំងនេះ
©វណ្ណឌី រតនា
បន្ទាប់ពីការរកឃើញគ្រាប់បែកច្នៃចំនួន៣គ្រាប់ ដែលលួចដាក់បង្កៃនៅក្បែរក្រសួងការពារជាតិ និងស្ថានីយទូរទស្សន៍ប៉ុស្តិ៍លេខ៣ កាលពីថ្ងៃសុក្រ ទី២ ខែមករា នៅរាជធានីភ្នំពេញនៃព្រះរាជាណាចក្រកម្ពុជា ប៉ូលីសបានរៀបចំសន្និសីទសារព័ត៌មានមួយ នៅថ្ងៃសៅរ៍ ទី១០ ខែមករា ដើម្បីបង្ហាញរូបភាពជនសង្ស័យដែលត្រូវបានចាប់ខ្លួន ក្នុងនោះ ប៉ូលីសបានបង្ហាញភស្តុតាងដាក់ពិរុទ្ធភាពលើជនជាប់ចោទមួយនាក់ ក្នុងចំណោមជនសង្ស័យទាំងបួននាក់ (តួលេខចុងក្រោយរបស់ប៉ូលីស)។ នៅក្នុងសន្និសីទកាសែតនេះ លោកសុខ ផល អគ្គស្នងការរងនគរបាលជាតិកម្ពុជា បានបង្ហាញអត្តសញ្ញាណមេខ្លោងនៃប្រតិបត្តិការទាំងនេះ ដែលជាអតីតទាហានមួយរូប មានវ័យ៤៨ឆ្នាំ និងត្រូវបានចាប់ខ្លួន កាលពីថ្ងៃទី៧ ខែមករា នៅឃុំប៉ោយប៉ែត។ «មេក្រុមចោរព្រៃ»
ជនសង្ស័យទាំងបួននាក់ នឹងត្រូវចោទសួរដោយតុលាការក្រុងភ្នំពេញ នៅថ្ងៃច័ន្ទ ទី១២ ខែមករាខាងមុខនេះ។ ជនសង្ស័យមួយនាក់ត្រូវបានចោទប្រកាន់ថាជាមេខ្លោងក្រុមដាក់បង្កៃគ្រាប់បែកច្នៃ បន្ទាប់ពីជននោះបានសារភាពថាបានបង្កើតកម្លាំងខុសច្បាប់ ដើម្បីបង្កអស្ថេរភាពដល់រដ្ឋាភិបាល។ លោកអគ្គស្នងការរង សុខ ផល បានលើកឡើងថា ជនជាប់ចោទរូបនេះមិនមែនដាក់បង្កៃគ្រាប់បែកជាលើកដំបូងនោះទេ។ ការដាក់បង្កៃគ្រាប់បែកច្នៃលើកចុងក្រោយ គឺនៅថ្ងៃទី២៩ ខែកក្កដា ២០០៧ ក្បែរស្តូបអនុស្សាវរីយ៍មិត្តភាពខ្មែរ-វៀតណាម នៅទីក្រុងភ្នំពេញ ដែលក្នុងនោះ គ្រាប់បែកតូចមួយបានផ្ទុះឡើង។ នៅប៉ុន្មានថ្ងៃបន្ទាប់ពីការផ្ទុះគ្រាប់បែកនោះ មនុស្សប្រាំនាក់ត្រូវបានចាប់ខ្លួន និងត្រូវបានកាត់ទោសអោយជាប់ពន្ធនាគារ។ លោកសុខ ផល បានបន្ថែមទៀតថា ជនជាប់ចោទដែលមានដើមកំណើតនៅខេត្តកំពង់ចាមរូបនេះក៏ធ្លាប់ត្រូវបានកាត់ទោសអោយជាប់ពន្ធនាការរយៈពេល៣ខែផងដែរ កាលពីឆ្នាំ២០០៣ ពីបទក្លែងបន្លំឯកសារសាធារណៈរបស់ក្រសួងការពារជាតិ។
បើតាមលោកសុខ ផល មេខ្លោងរូបនោះមានឈ្មោះថា សោម ឯក ប៉ុន្តែបានលាក់អត្តសញ្ញាណរបស់ខ្លួន និងបានប្រើប្រាស់ឈ្មោះក្លែងក្លាយ១១ឈ្មោះ។ គេគឺជាមេខ្លោងក្រុមចលនាកម្លាំងប្រដាប់អាវុធរបៀប «ចោរព្រៃ» ដែលបានធ្វើសកម្មភាពខុសច្បាប់ ដូចជាចាប់ជំរិត ប្លន់តាមផ្លូវជាតិ និងរស់នៅលាក់ពួនក្នុងព្រៃខេត្តមណ្ឌលគិរី និងកោះកុង។ ប៉ូលីសបានបង្ហាញនៅក្នុងសន្និសីទកាសែត នូវរូបថតរបស់សោម ឯក ដែលស្ថិតនៅកណ្តាលចំណោមហ្វូងមនុស្ស ដែលសុទ្ធតែស្លៀកពាក់ឯកសណ្ឋានជាទាហាននៅក្នុងព្រៃ។
ប្រតិបត្តិការ២ មករា
លោកសុខ ផលបានពន្យល់ថា «ការដាក់គ្រាប់បែកទាំងនេះ មានគោលបំណងទាក់ទាញការចាប់អារម្មណ៍មកលើក្រុមរបស់ខ្លួន ដើម្បីធ្វើអោយមានសម្លេងទៅដល់បរទេស។ ដោយបានធ្វើការផ្សព្វផ្សាយអំពីចលនារបស់ខ្លួន សោម ឯក ចង់បានមូលនិធិពីបរទេស ដើម្បីផ្គត់ផ្គង់ប្រតិបត្តិការរបស់ខ្លួន។ រួបថតដែលពួកគេបានថតនៅក្នុងព្រៃ ត្រូវបានផ្សព្វផ្សាយយ៉ាងទូលំទូលាយ»។ លោកសុខ ផល បានបន្ថែមទៀតថា សោម ឯក រៀបចំផែនការនេះ តាំងពីខែតុលា ឆ្នាំ២០០៨ ជាមួយអ្នកបក្សពួក៣នាក់ផ្សេងទៀត នៅប្រទេសថៃ។ គាត់ក៏មានសញ្ជាតិថៃផងដែរ បន្ទាប់ពីបានយកប្រពន្ធជាស្រ្តីជនជាតិថៃ ។
សោម ឯក បានបញ្ជាមនុស្សបីនាក់ ដើម្បីដាក់បង្កៃគ្រាប់បែកច្នៃ នៅថ្ងៃទី២ ខែមករា នៅតាមផ្លូវសាធារណៈ។ លោកអគ្គស្នងការរងនគរបាលជាតិបានបញ្ជាក់ថា មនុស្សបីនាក់ផ្សេងទៀតដែលត្រូវបានចាប់ខ្លួន នៅមិនទាន់ដឹងច្បាស់ថាជាប់ពាក់ព័ន្ធនឹងករណីនេះ១០០%នោះទេ។ លោកបដិសេធបង្ហាញអត្តសញ្ញាណជនទាំងនោះ។
ចលនាមួយ ប្រហាក់ប្រហែលក្រុមចលនា CFF?
សោម ឯក និងបក្សពួកបានបង្កើត «រណសិរ្យ រំដោះជាតិខ្មែរ» ដែលមានរូបក្បាលខ្លាជានិមិត្តសញ្ញា។ អតីតយុទ្ធជននៃចលនាតស៊ូឆ្នាំ១៩៨០រូបនេះ បានធ្វើសមាហរណកម្មចូលរួមក្នុងក្រសួងការពារជាតិ នៅឆ្នាំ១៩៩៣ ក្រោយការចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស។
លោកសុខ ផលបានរៀបរាប់អំពីជីវប្រវត្តិរបស់មេខ្លោងរូបនេះថា សោម ឯក ធ្លាប់សិក្សានៅសហរដ្ឋអាមេរិករយៈពេល១ឆ្នាំ និងធ្វើដំណើរទៅកាន់ប្រទេសម៉ាឡេស៊ី ថៃ និងភូមា ដើម្បី«រៀនផលិតអាវុធជាតិផ្ទុះ»។ យោងតាមការស្រាវជ្រាវរបស់ប៉ូលីស បុរសរូបនេះគឺជាអតីតសមាជិកសកម្មម្នាក់នៃក្រុម«ចលនាខ្មែរសេរី» (CFF) (មេខ្លោងចលនានេះត្រូវបានចាប់ខ្លួននៅសហរដ្ឋអាមេរិក កាលពីខែមករា ឆ្នាំ២០០៥)។ លោកអគ្គស្នងការរងបានគូសបញ្ជាក់ថា «យោងតាមចម្លើយសារភាពរបស់សោម ឯក ចលនារបស់ពួកគេមានបង្អែកនៅបរទេស ដូចចលនាCFF ដែរ»។
ភស្តុតាងផ្សេងទៀតក៏ត្រូវបានដាក់បង្ហាញផងដែរ ដូចជាកន្ទុំរុយតូចបញ្ជាពីចម្ងាយជាដើម។
យោងតាមអ្នកទទួលខុសត្រូវនគរបាលរូបនេះ អាជ្ញាធរមិនបានចាត់ទុកក្រុមចលនានេះ គឺជាការគំរាមកំហែងធ្ងន់ធ្ងរនោះទេ។ សមាជិកចលនានេះមិនមានសមត្ថភាពផ្តួលរលំរដ្ឋាភិបាលបានឡើយ។ លោកបានវាយតម្លៃថា ពួកគេគ្រាន់តែចង់ទទួលបានអត្ថប្រយោជន៍ផ្ទាល់ខ្លួនប៉ុណ្ណោះ។ សរុបមក លោកបានអះអាងថា ចលនានេះមិនជាប់ពាក់ព័ន្ធនឹងគណបក្សនយោបាយណាមួយឡើយ។ លោកសន្យាថាប៉ូលីសនឹងធ្វើគ្រប់យ៉ាង ដើម្បីកម្ចេចបណ្តាញនេះចោល ដែលមាននៅខេត្តក្រចេះ និងខេត្តបាត់ដំបង។
|
|
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
