| ការចាប់ផ្តើមកិច្ចសហប្រតិបត្តិការរវាងកម្ពុជា និងគូវ៉ែត? |
| ដោយ រស់ ឌីណា | |
| ១៦-០១-២០០៩ |
 ភ្នំពេញ (កម្ពុជា) ថ្ងៃទី១៦ មករា ២០០៩៖ សម្តេចហ៊ុន សែន ត្រឡប់មកពីបំពេញទស្សនកិច្ចនៅប្រទេសគុយវ៉ែត © វណ្ឌី រតនា សម្តេចនាយករដ្ឋមន្រ្តីហ៊ុន សែន និងគណៈប្រតិភូមួយក្រុមបានធ្វើមាតុភូមិនិវត្តន៍មកកាន់ទីក្រុងភ្នំពេញវិញ នៅថ្ងៃសុក្រ ទី១៦ ខែមករានេះ តាមយន្តហោះពិសេសដែលផ្តល់ជូនដោយប្រទេសគូវ៉ែត។ ពេលត្រឡប់មកពីបំពេញទស្សនកិច្ច «ជាលក្ខណៈមិត្តភាព» ជាលើកដំបូង រយៈពេល៤ថ្ងៃ នៅប្រទេសគូវ៉ែត សម្តេចប្រមុខរដ្ឋាភិបាលនិងរដ្ឋមន្រ្តីអមដំណើរប៉ុន្មានរូប បានចុះហត្ថលេខាលើកិច្ចព្រមព្រៀងជាច្រើន ជាមួយប្រទេសដៃគូអារ៉ាប់ថ្មីមួយនេះ។ សម្តេចក៏បានលើកឡើងអំពីគោលបំណងបើកស្ថានទូតគូវ៉ែតថ្មីប្រចាំនៅកម្ពុជា «នាពេលខាងមុខនេះ»ផងដែរ។ កិច្ចសហប្រតិបត្តិការថ្មីនេះទំនងជាដំណើរការទៅមុខយ៉ាងរលូន។ ពេលមកដល់ព្រលានយន្តហោះអន្តរជាតិភ្នំពេញ លោកហោ ណាំហុង រដ្ឋមន្រ្តីការបរទេសបានបញ្ជាក់ប្រាប់អ្នកសារព័ត៌មានថាប្រទេសទាំងពីរបានឯកភាពលើគម្រោងតភ្ជាប់សេវាផ្លូវអាកាសរវាងប្រទេសកម្ពុជានិងប្រទេសគូវ៉ែត និងកិច្ចព្រមព្រៀងស្តីពីសហប្រតិបត្តិការវិស័យទេសចរណ៍រវាងប្រទេសទាំងពីរ។ ប្រទេសទាំងពីរក៏បានចុះអនុស្សារណៈ ស្តីពីការបញ្ជូនពលករកម្ពុជាទៅកាន់ប្រទេសគូវ៉ែត និងអនុស្សារណៈស្តីពីការអនុវត្តគម្រោងអភិវឌ្ឍន៍ធារាសាស្រ្តនៅខេត្តកំពង់ធំ ដែលមានទឹកប្រាក់សរុប៣៥០លានដុល្លារ ដែលអាចស្រោចស្រពលើដីស្រែ១៣០ ០០០ហិចតា។ ក្រៅពីនេះ ប្រទេសគូវ៉ែតក៏បានសន្យាជួយឧបត្ថម្ភការជួសជុលកំណាត់ផ្លូវចំនួនពីរខ្សែ ស្ថិតនៅភាគពាយ័ព្យនៃប្រទេសកម្ពុជា គឺកំណាត់ផ្លូវថ្មគល់សំពៅលូន និងខោនដំរីប៉ៃលិន។ លោករដ្ឋមន្រ្តីការបរទេសបានបញ្ជាក់ថា គម្រោងទាំងពីរនេះត្រូវរង់ចាំការយល់ព្រមពីសំណាក់គណៈកម្មាធិការនៃប្រទេសគូវ៉ែត។
កាលពីខែសីហា ឆ្នាំ២០០៨ គណៈប្រតិភូគូវ៉ែតមួយក្រុមបានធ្វើដំណើរមកកាន់ប្រទេសកម្ពុជា ហើយសម្តេចហ៊ុន សែនបានអញ្ជើញប្រទេសនេះ អោយបញ្ជូនគណៈប្រតិភូផ្សេងទៀតមកកាន់កម្ពុជា។ ដោយឡែក សម្តេចក៏បានទទូចសុំជំនួយពីតំណាងមូលនិធិអភិវឌ្ឍន៍គូវ៉ែត ដើម្បីគាំទ្រដល់គម្រោងស្តារប្រព័ន្ធធារាសាស្រ្តតូចៗ នៅក្នុងប្រទេស «ដើម្បីជួយប្រជាកសិករនិង ដើម្បីកាត់បន្ថយភាពក្រីក្រ»។ សម្តេចនាយករដ្ឋមន្រ្តីបានស្នើថា ថវិកានេះអាចផ្ទេរមកតាមគ្រឹះស្ថានមីក្រូឥណទានឯកជន រឺតាមធនាគារអភិវឌ្ឍន៍ជនបទ ដែលជាធនាគាររបស់រដ្ឋ។
លោកហោ ណាំហុង បានអោយដឹងថា សម្តេចហ៊ុន សែន បានជម្រុញអ្នកវិនិយោគទុនគូវ៉ែតអោយមកធ្វើការបណ្តាក់ទុននៅកម្ពុជា ដែលកម្ពុជាមានដីកសិកម្ម ប៉ុន្តែខ្វះខាតដើមទុន។ សម្តេចបានស្នើអ្នកវិនិយោគទុនទាំងនោះ មកទិញស្រូវពីកម្ពុជា ដើម្បីផ្គត់ផ្គង់ស្បៀងក្នុងប្រទេសរបស់ខ្លួន រឺស្តុកទុកលក់អោយទៅប្រទេសនៅមជ្ឈិមបូព៌ាផ្សេងទៀតដែលត្រូវការនាំចូលស្រូវជាចាំបាច់។ ក្រុមការងារមួយនឹងអនុវត្តបញ្ហាបណ្តាក់ទុនរវាងប្រទេសទាំងពីរ។
ទាក់ទងនឹងវិស័យទេសចរណ៍ កម្ពុជានៅរង់ចាំច្រើនពីប្រទេសគូវ៉ែត។ លោកថោង ខុន រដ្ឋមន្រ្តីក្រសួងទេសចរណ៍ ដែលបានរួមដំណើរជាមួយសម្តេចហ៊ុន សែន ត្រូវបង្កើតកម្មវិធីតាំងពិព័រណ៍វប្បធម៌មួយ ដែលបង្ហាញអំពីតម្លៃផលិតផលសំខាន់ៗរបស់កម្ពុជា នៅប្រទេសគូវ៉ែត។ លោកបានចុះកិច្ចព្រមព្រៀងមួយ ដែលមានសុពលភាពរយៈពេល៥ឆ្នាំ ជាមួយរដ្ឋមន្រ្តីក្រសួងពាណិជ្ជកម្ម ឧស្សាហកម្មនិងទំនងទំនងសភានៃប្រទេសគូវ៉ែត ហើយកិច្ចព្រមព្រៀងនេះនឹងត្រូវបន្តសុពលភាពតទៅទៀតជាស្វ័យប្រវត្តិ ក្នុងរយៈពេលដូចគ្នា បើសិនភាគីណាមួយមិនបានជូនដំណឹងជាលាយលក្ខអក្សរដល់ភាគីមួយទៀតអំពីគោលបំណងបញ្ឈប់កិច្ចព្រមព្រៀងនេះ ក្នុងរយៈពេលប្រាំមួយខែ មុនពេលកិច្ចព្រមព្រៀងនេះអស់សុពលភាពដំបូង រឺរយៈពេលបន្តបន្ទាប់ទៀត។
លោករដ្ឋមន្រ្តីក្រសួងទេសចរណ៍បានគូសបញ្ជាក់អំពីអត្ថប្រយោជន៍ថាគេអាចទាក់ទាញទេសចរមកទស្សនានៅប្រទេសកម្ពុជា ដែលមកពីប្រទេសដ៏តូចមួយនេះ ប៉ុន្តែ មានផលិតផលក្នុងស្រុកសរុប (GDP) ៥០ ០០០ដុល្លារក្នុងមួយនាក់ (ធៀបនឹងនឹង១៨០០ដុល្លារក្នុងមួយនាក់ នៅកម្ពុជា)។ «ឆ្នាំ២០០៨ យើងបានទទួលទេសចរគូវ៉ែតត្រឹមតែ៧០០នាក់ប៉ុណ្ណោះ។ ប៉ុន្តែ ប្រសិនជាយើងអាចទទួលទេសចរគូវ៉ែតចំនួន៥ម៉ឺននាក់វិញ គឺជារឿងដ៏ល្អប្រសើរ!»។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
