| ពិធីរំលឹកខួបឃាតកម្មលើរូបលោកជា វិជ្ជាៈ លោកហុក ឡងឌី ត្រូវបានអ្នកចូលរួមមួយចំនួនចោទប្រកាន់ |
| ដោយ ដួង សុខា | |
| ២២-០១-២០០៩ |
 ភ្នំពេញ (កម្ពុជា) ថ្ងៃទី២២ មករា ២០០៩៖ លោកជា មុនី មេដឹកនាំសហជីព នៅក្នុងពិធីគោរពវិញ្ញាណក្ខន្ធលោកជា វិជ្ជា
© ចន វីង / Magnum កម្មករ សហជីព សកម្មជនការពារសិទ្ធិមនុស្ស តំណាងរាស្រ្តគណបក្សប្រឆាំង ប្រមាណជាង២០០នាក់ បានជួបជុំគ្នានៅថ្ងៃព្រហស្បតិ៍ ទី២២ ខែមករា នៅទីស្នាក់ការសហជីពសេរីកម្មករនៃព្រះរាជាណាចក្រកម្ពុជា នាទីក្រុងភ្នំពេញ ដើម្បីប្រារព្ធខួបគម្រប់៥ឆ្នាំ នៃឃាតកម្មលើរូបលោកជា វិជ្ជា អតីតមេដឹកនាំសហជីពនិងជាវីរជនដ៏អង់អាចក្លាហានក្នុងការទាមទារសិទ្ធិសេរីភាព និងលក្ខខណ្ឌការងារជូនកម្មករ។ ជាពិសេសលោកបានចូលរួមយ៉ាងសកម្មក្នុងការជម្រុញអោយមានការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។ នៅក្នុងពិធីគោរពវិញ្ញាណក្ខន្ធនេះ មានវត្តមានរបស់លោកប៊ន សំណាង ដែលជាមនុស្សម្នាក់ក្នុងចំណោមជនជាប់ចោទពីរនាក់ពីបទឃាតកម្មលើរូបលោកជា វិជ្ជា ដែលត្រូវបានដោះលែងនៅក្រៅឃុំបណ្តោះអាសន្នកាលពីថ្ងៃទី៣១ ខែធ្នូ បន្ទាប់ពីបានជាប់ពន្ធនាគារអស់រយៈពេលជិត៥ឆ្នាំមក។ នៅក្នុងសុន្ទរកថាផ្សេងៗ អ្នកចូលរួមបានអំពាវនាវសុំអោយវែកមុខនិងផ្តន្ទាទោសឃាតកពិតប្រាកដ ហើយប្រកាសចោទប្រកាន់លោកហុក ឡងឌី អតីតមេនគរបាលកម្ពុជា ដែលបានបាត់បង់ជីវិតនៅក្នុងគ្រោះថ្នាក់ធ្លាក់ឧទ្ធម្ភាគចក្រមួយ កាលពីខែវិច្ឆិកា ឆ្នាំ២០០៨។ ស្នើសុំគោរមងារជា «វីរជនកម្មករ» ដល់លោក ជា វិជ្ជា
លោកជា មុនី ប្អូនប្រុសរបស់លោកជា វិជ្ជា និងជាមេដឹកនាំសហជីពបន្តពីបងប្រុស លោករ៉ុង ឈុន មិត្តភក្តិរបស់លោកជា វិជ្ជា និងជាប្រធានសមាគមគ្រូបង្រៀនកម្ពុជាឯករាជ្យ លោកសម រង្ស៊ី និងលោកកឹម សុខា មេដឹកនាំគណបក្សប្រឆាំងកម្ពុជា ព្រមទាំងតំណាងរាស្រ្តគណបក្សប្រឆាំង បានដើរនាំមុខក្បួនដង្ហែ ដែលដើររហូតដល់ម្តុំតូបលក់កាសែត ក្បែរវត្តលង្កា ដែលជាកន្លែង «វីរជន»របស់ពួកគេ ត្រូវបានជនមិនស្គាល់មុខបាញ់សម្លាប់ កាលពីថ្ងៃទី២២ ខែមករា ឆ្នាំ២០០៤។ នៅទីនោះ បន្ទាប់ពីបានដាក់កម្រងផ្កានៅលើដី អ្នកចូលរួមទាំងអស់បាននាំគ្នាអុជធូបគោរពវិញ្ញាណក្ខន្ធសពលោកជា វិជ្ជា។ ចាប់តាំងពីឆ្នាំ២០០៥មក ការរៀបចំពិធីដាក់កម្រងផ្កាគោរពវិញ្ញាណក្ខន្ធនេះតែងតែត្រូវបានរៀបចំធ្វើជារៀងរាល់ឆ្នាំ តាមគំនិតផ្តួចផ្តើមរបស់លោកជា មុនី និងលោករ៉ុង ឈុន ដោយទទួលបានការអនុញ្ញាតពីអាជ្ញាធរក្រុង។
អ្នកចូលរួមបានធ្វើការស្នើសុំជាថ្មីម្តងទៀត ទៅកាន់រដ្ឋាភិបាលកម្ពុជា និងព្រះមហាក្សត្រនរោត្តម សីហមុនី សូមព្រះរាជានុញ្ញាតប្រទាននូវគោរមងារជា «វីរជនកម្មករ» ដើម្បីជាការរំលឹកដល់គុណូបការៈដ៏ថ្លៃថ្លាដែលមិនអាចបំភ្លេចបានចំពោះលោកជា វិជ្ជា។ អ្នកចូលរួមទាំងនោះបានផ្តល់គោរមងារជាវីរជនកម្មករដល់លោកជា វិជ្ជា រួចទៅហើយ តាមរយៈការសរសេរអក្សរនៅក្រោមរូបថតរបស់លោកជា វិជ្ជា បោះពុម្ពនៅខាងក្រោយខ្នងអាវយឺត ដែលពួកគេបានពាក់ចូលរួមពិធីនេះ។ លោករ៉ុង ឈុន អ្នករៀបចំពិធីបានធ្វើការស្នើសុំជាថ្មីថា រូបសំណាករបស់លោកជា វិជ្ជា ត្រូវតែសាងសង់នៅចំណុចផ្លូវប្រសព្វរវាងផ្លូវប៉ាស្ទ័រ និងមហាវិថីព្រះសីហនុ ពោលគឺនៅចម្ងាយពីកន្លែងកើតហេតុការណ៍ឃាតកម្មនេះ។
វែកមុខ «ឃាតកពិតប្រាកដ»
លោកប៊ន សំណាង គឺជាអ្នកថ្លែងសុន្ទរកថាមុនគេបង្អស់។ លោកមានសភាពស្រងូតស្រងាត់ និងភិតភ័យបន្តិចបន្តួច ដោយស្ថិតនៅមិនឆ្ងាយពីម្តាយរបស់គាត់ ទោះបីជាគាត់អះអាងថាមិនខ្លាចក៏ដោយ។ លោកបានប្រកាសថា «ថ្ងៃនេះ ខ្ញុំចង់បង្ហាញខ្លួនអោយបងប្អូនដឹងថាខ្ញុំនៅក្រៅឃុំហើយ។ ខ្ញុំសង្ឃឹមថានៅថ្ងៃខាងមុខ តុលាការនឹងលើកលែងការចោទប្រកាន់មកលើខ្ញុំទាំងស្រុង ព្រោះខ្ញុំមិនបានសម្លាប់លោកជា វិជ្ជា ទេ។ ខ្ញុំជាមនុស្សបរិសុទ្ធ។ លោកក៏បានថ្លែងអំណរគុណយ៉ាងជ្រាលជ្រៅដល់គ្រួសាររបស់លោកជា វិជ្ជា ជាពិសេសប្អូន និងប្រពន្ធគាត់ (ជា វិជ្ជា) ដែលតែងតែទាមទារអោយដោះលែងរូបគាត់។ ចំណែកឪពុករបស់លោកសុខ សំអឿន(ជនជាប់ចោទមួយរូបទៀត) បានអោយដឹងថាកូនប្រុសរបស់គាត់មិនមានវត្តមានចូលរួមនៅថ្ងៃនេះទេ ព្រោះគេបានបួសជាព្រះសង្ឃទៅហើយ។ ឪពុកលោកសុខ សំអឿន បានមានប្រសាសន៍យ៉ាងខ្លី ដើម្បីថ្លែងអំណរគុណចំពោះតុលាការកំពូល ដែលបានផ្តល់យុត្តិធម៌ជូនលោកប៊ន សំណាង និងកូនប្រុសរបស់គាត់។
ដោយឡែក លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានគូសបញ្ជាក់ថា «ឃាតកម្មនេះមិនទាន់បានរកយុត្តិធម៌ជូនដល់ក្រុមគ្រួសារសព និង កម្មករ កម្មការិនីក្នុងព្រះរាជាណាចក្រកម្ពុជាទេ។ ខ្ញុំអំពាវនាវដល់រដ្ឋាភិបាលសុំវែកមុខរកឃាតកពិតប្រាកដអោយបាន ដើម្បីផ្ញើសារដល់ប្រទេសទាំងមូលថាប្រទេសកម្ពុជាមិនអនុញ្ញាតអោយមានការសម្លាប់អ្នកដឹកនាំកម្មករបែបនេះ និងនិទណ្ឌភាពទេ»។ ចំណែកលោកជា មុនី លោកកឹម សុខា និងលោកសម រង្ស៊ី ក៏បានធ្វើការអំពាវនាវបែបនេះផងដែរ។
អ្នកចូលរួមសំខាន់ៗ៖ លោក «ហុក ឡងឌី» និង «អ្នកនៅពីលើគាត់»
លោកជា មុនី បានឡើងឈរលើកៅអី ដោយប្រកាសក្តែងៗថា «លោកហេង ពៅ កាលនៅជាស្នងការរងនគរបាលរាជធានីភ្នំពេញ ទទួលបន្ទុកស៊ើបអង្កេតសំណុំរឿងក្តីលោកជា វិជ្ជា បានឆ្លើយបំភ្លឺនៅចំពោះមុខតុលាការក្រុងភ្នំពេញថា ប៊ន សំណាង និងសុខ សំអឿន មិនមែនជាឃាតកទេ ហើយអ្នកដែលនៅពីក្រោយខ្នងគឺលោកហុក ឡងឌី។ ឥឡូវលោកហុក ឡងឌីស្លាប់ទៅហើយ។ រដ្ឋាភិបាលបានផ្លាស់ប្តូរបន្តិច ជាក់ស្តែង បុរសទាំងពីរនេះត្រូវបានដោះលែងអោយនៅក្រៅឃុំបណ្តោះអាសន្ន និងសំណុំរឿងក្តីនេះត្រូវបានបង្វិលមកសាលាឧទ្ធរណ៍ […]។ បច្ចុប្បន្ន ដោយសារប្រព័ន្ធយុត្តិធម៌នៅស្រុកយើងមិនឯករាជ្យ ធ្វើអោយប៉ូលីស ទាហាន មិនអាចប្រើសិទ្ធិនិងវិជ្ជាជីវៈរបស់ខ្លួន ក្នុងការស្វែងរកឃាតកពិតបាន»។
សម្រាប់លោកសម រង្ស៊ី «អស់រយៈពេល៥ឆ្នាំហើយ ដែលរដ្ឋាភិបាលនៅតែមិនបង្ហាញឆន្ទៈធ្វើការផ្តន្ទាទោសឃាតកពិតប្រាដក»។ «ខ្ញុំសង្ឃឹមថាឆ្នាំក្រោយ ថ្ងៃទី២២ មករា ២០១០ នៅពេលយើងមកទីនេះម្តងទៀត ពេលនោះសភាការណ៍នឹងប្រែប្រួល។ ពេលនោះឧក្រិដ្ឋជននិងបក្សពួក ច្បាស់ជាត្រូវបានវែកមុខ និងផ្តន្ទាទោសតាមច្បាប់។ យើងរីករាយពេលដែលប៊ន សំណាង និងសុខ សំអឿនត្រូវបានដោះលែង នេះជាជំហានទី១»។ ដោយឡើងឈរលើកៅអីដែរនោះ មេដឹកនាំគណបក្សប្រឆាំងរូបនេះបានប្រកាសថា «ហុក ឡងឌី ស្លាប់ មិនគ្រប់គ្រាន់ទេ ត្រូវតែវែកមុខអ្នកនៅពីលើគាត់ កុំឆ្លើយដាក់លោកហុក ឡងឌី តែម្នាក់ឯង។ រឿងនេះធំណាស់ សម្លាប់លោកជា វិជ្ជា ម្នាក់ឯងមិនមែនហុក ឡងឌីម្នាក់ឯងផ្តួចផ្តើមគំនិតទេ បើគ្មានអ្នកនៅពីលើគាត់»។
ចំណែកលោកកៀត ច័ន្ទថារិទ្ធិ អ្នកនាំពាក្យនគរបាលជាតិ មិនពេញចិត្តចំពោះការវាយប្រហារទាំងនេះឡើយ។ ដោយមានប្រតិកម្ម លោកបានពន្យល់តាមទូរស័ព្ទថា «ការចោទប្រកាន់បែបនេះ ត្រូវមានភស្តុតាង! គេមិនអាចចោទប្រកាន់ផ្តេសផ្តាសបានឡើយ ព្រោះវាធ្វើអោយប៉ះពាល់កិត្តិយស និងសិទ្ធិរបស់អ្នកដទៃ»។
អានបន្ថែមលើកាសែត
-គណបក្ស សម រង្ស៊ី និងគណបក្សសិទ្ធិមនុស្សទាមទារយុត្តិធម៌ជូនសពលោកជា វិជ្ជា និងទូលថ្វាយជាថ្មីម្តងទៀតដល់ព្រះមហាក្សត្រកម្ពុជាប្រទាននូវគោរមងារ «វីរជនកម្មករ» ដល់លោក (២០-០១-២០០៩)
-លោកប្រែដលី កុស ផលិតករភាពយន្តអាមេរិកថតភាពយន្តឯកសារស្តីពីលោក ជា វិជ្ជា (១៩-០១-២០០៩)
-ប៊ន សំណាងនិងសុខ សំអឿនត្រូវបានដោះលែងបណ្តោះអាសន្នៈ ជោគជ័យនៃប្រព័ន្ធយុត្តិធម៌នៅកម្ពុជា (៣១-១២-២០០៨)
-លោកហុក ឡងឌី អគ្គស្នងការនគរបាលជាតិ បានបាត់បង់ជីវិតនៅក្នុងគ្រោះថ្នាក់ឧទ្ធម្ភាគចក្រ (១០-១១-២០០៨)
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
