បន្ទាប់ពីការរាំងស្ទះអស់រយៈពេលជាច្រើនខែដោយសារវិបត្តិនៅទីក្រុងបាងកក ការចរចារវាងព្រះរាជាណាចក្រកម្ពុជានិងព្រះរាជាណាចក្រថៃទំនងជានឹងចាប់ផ្តើមឡើងវិញ។ នៅថ្ងៃច័ន្ទ ទី២៦ ខែមករា ប្រមុខការទូតនៃប្រទេសទាំងពីរបានជួបពិភាក្សាគ្នារយៈពេលជាងមួយម៉ោង នៅទីក្រុងភ្នំពេញ បន្ទាប់មកក៏បានរៀបចំធ្វើសន្និសីទកាសែតរួមមួយ។
លោកហោ ណាំហុង រដ្ឋមន្រ្តីការបរទេសកម្ពុជា និងលោកកាសិត ពៀរ៉ុមយ៉ា រដ្ឋមន្រ្តីការបរទេសថៃ ដែលបានមកបំពេញទស្សនកិច្ចនៅប្រទេសកម្ពុជា បានឯកភាពគ្នា «បន្តធ្វើការចរចាទ្វេភាគី ដោយសន្តិវិធី»។ លោកហោ ណាំហុង បានប្រកាសថា នៅថ្ងៃទី៦ ខែកុម្ភៈ រដ្ឋមន្រ្តីក្រសួងការពារជាតិថៃនឹងមកបំពេញទស្សនកិច្ចនៅប្រទេសកម្ពុជា ដើម្បីពិភាក្សាអំពីការសំរូលកងទ័ពនៅវត្តកែវសិក្ខាគិរីស្វរៈ (ហៅវត្តព្រះវិហារ) ជាមួយលោកទៀ បាញ់ រដ្ឋមន្រ្តីក្រសួងការពារជាតិកម្ពុជា»។
ដោយឡែក រដ្ឋមន្រ្តីនៃប្រទេសទាំងពីរក៏បានឯកភាពគ្នាថាគណៈកម្មាធិការចម្រុះព្រំដែនកម្ពុជា-ថៃ នឹងជួបប្រជុំគ្នានៅថ្ងៃទី២ និងទី៤ ខែកុម្ភៈ ដើម្បីដោះស្រាយបញ្ហាព្រំដែនខ្មែរ-ថៃ។ «ទន្ទឹមនឹងនេះ នឹងមានការប្រជុំគណៈកម្មការបច្ចេកទេសនៃប្រទេសទាំងពីរ ដើម្បីពិនិត្យបញ្ហាព្រំដែនទល់គ្នានៅសមុទ្រជាផ្លូវការនៅខែមីនា ឬមិនផ្លូវការ នៅមុខខែមីនា ព្រោះត្រូវរង់ចាំការតែងតាំងប្រធានខាងភាគីថៃពីគណៈរដ្ឋមន្រ្តីថៃ»។
លោករដ្ឋមន្រ្តីការបរទេសកម្ពុជាបានសង្កត់ធ្ងន់ថា ភាគីទាំងពីរបានឯកភាពគ្នាថាការដោះស្រាយជម្លោះព្រំដែនខ្មែរ-ថៃ គឺជាបញ្ហាបន្ទាន់ «ដូចយើងធ្លាប់បានលើកឡើងកាលពីខែវិច្ឆិកា ឆ្នាំ២០០៨ នៅខេត្តសៀមរាប»។ គណៈកម្មការបច្ចេកទេសត្រូវបន្តស្វែងរកបង្គោលព្រំដែនតទៅទៀត ដោយក្នុងចំណោម ៧៣បង្គោល គេរកឃើញ៤៨ហើយ។
«នេះគឺជាចំណុចល្អមួយ។ ឯកឧត្តម កាសិត ពៀរ៉ុមយ៉ា បានសន្យាថានឹងជម្រុញការចរចាអោយបានឆាប់រហ័ស។ ឯកឧត្តមក៏បានសន្យាថានឹងជម្រុញការអនុវត្តទិដ្ឋាការតែមួយ គឺមានន័យថាយកទិដ្ឋាការថៃមកកម្ពុជាបាន យកទិដ្ឋាការកម្ពុជាមកថៃបាន ដើម្បីជម្រុញទេសចរអោយមកប្រទេសទាំងពីរអោយបានច្រើនថែមទៀត»។ បន្ថែមលើការប្រកាសរបស់រដ្ឋមន្រ្តីកម្ពុជា រដ្ឋមន្រ្តីថៃបានអះអាងថាលោកនឹងស្នើដល់រដ្ឋាភិបាលរបស់លោក ដើម្បីចុះកិច្ចព្រមព្រៀងមួយរវាងប្រទេសទាំងពីរ សំដៅនាំមកវត្ថុបុរាណខ្មែរដែលត្រូវគេលួចយកទៅលក់ប្រទេសថៃ យកត្រឡប់មកវិញ។
ក្រោយមក នៅរសៀលថ្ងៃដដែលនេះ សម្តេចនាយរដ្ឋមន្រ្តីហ៊ុន សែនបានជួបពិភាក្សាជាមួយលោកកាសិត ពៀរ៉ុមយ៉ា។ ក្រោយបញ្ចប់ជំនួបនេះ សម្តេចបានវាយតម្លៃអំពី«ភាពវិជ្ជមាន» នៃការពិភាក្សានេះ។ សម្តេចបានបញ្ជាក់នៅចំពោះមុខអ្នកយកព័ត៌មានថារដ្ឋមន្រ្តីការបរទេសថៃបានប្រគល់ជូនសម្តេចនូវលិខិតមួយច្បាប់របស់នាយករដ្ឋមន្រ្តីថៃថ្មី គឺលោកអៈភិសិទ្ធិ វេទឆាជីវៈ «ដែលនៅក្នុងលិខិតនោះ នាយករដ្ឋមន្រ្តីថៃបានធ្វើការកត់សម្គាល់នូវសុន្ទរកថារបស់សម្តេច ដែលបានថ្លែងនៅខេត្តឧត្តរមានជ័យ ទាក់ទងនឹងការដោះស្រាយបញ្ហា ព្រំដែនទ្វេភាគីបន្តទៀតរវាងប្រទេសទាំងពីរ»។
សម្តេចហ៊ុន សែនបានប្រកាសថា «នេះគឺជាជំនួបដ៏ល្អ។ ខ្ញុំបានអះអាងប្រាប់រដ្ឋមន្រ្តីថៃថាខ្ញុំនឹងមានវត្តមាននៅក្នុងកិច្ចប្រជុំកំពូលអាស៊ាន ដែលនឹងរៀបចំធ្វើឡើងនៅប្រទេសថៃ នៅថ្ងៃទី២៧ ខែកុម្ភៈ ដល់ថ្ងៃទី១ ខែមីនា»។ នៅក្នុងលិខិតចុះថ្ងៃទី២៥ ខែមករា លោកអៈភិសិទ្ធិ បានឯកភាពជាមួយសម្តេចចំពោះយុទ្ធសាស្រ្តដើម្បីដោះស្រាយបញ្ហាព្រំដែនបន្តទៀតរវាងប្រទេសទាំងពីរ និងយល់ឃើញភាពចាំបាច់ក្នុងការពង្រឹងទំនាក់ទំនងទ្វេភាគីនាពេលអនាគត។ លោកក៏បានសន្យាថារដ្ឋាភិបាលថៃនឹងខិតខំប្រឹងប្រែងបន្តការងារយ៉ាងជិតស្និទ្ធិជាមួយរដ្ឋាភិបាលកម្ពុជា តាមរយៈយន្តការទ្វេភាគីដែលមានពីមុនមក។ «ក្នុងឋានៈជាប្រទេសជិតខាង ដែលមានព្រំប្រទល់ ប្រពៃណី ទំនៀមទំលាប់ និងវប្បធម៌រួមគ្នា រដ្ឋាភិបាលថៃបេ្តជ្ញានាំមកនូវសន្តិសុខ និងវិបុលភាពជូនដល់ប្រជាពលរដ្ឋនិងប្រទេសជាតិទាំងពីរ»។ នាយករដ្ឋមន្រ្តីថៃសង្ឃឹមថានឹងធ្វើដំណើរមកបំពេញទស្សនកិច្ចជាផ្លូវការនៅព្រះរាជាណាចក្រកម្ពុជានៅពេលដ៏សមគួរឆាប់ៗនេះ ដើម្បីរឹតចំណងទំនាក់ទំនងរវាងប្រទេសជាតិទាំងពីរ លើគ្រប់វិស័យ។
អានបន្ថែមលើវិបសាយកាសែត
-
បទយកការណ៍រូបថតនិងសម្លេង ស្តីពីជម្លោះព្រំដែនប្រាសាទព្រះវិហារ -
ប្រាសាទព្រះវិហារៈ ជម្លោះព្រំដែនរវាងប្រទេសកម្ពុជា និងប្រទេសថៃ ៖លោកអ្នកនឹងបានឃើញរាល់អត្ថបទទាំងអស់របស់ការិយាល័យ និពន្ធ កាសែត ស្តីពីសំណុំរឿងដ៏រសើបនៃប្រាសាទព្រះវិហារ ដែលត្រូវបានដាក់ចូលទៅក្នុងបញ្ជីបេតិកភណ្ឌពិភពលោកនៃអង្គការ យូណេស្កូ កាលពីថ្ងៃទី៧ ខែកក្កដា ឆ្នាំ២០០៨ តាមការស្នើសុំរបស់ប្រទេសកម្ពុជា។ ប្រាសាទនេះស្ថិតនៅតំបន់ព្រំដែនជម្លោះដ៏ក្តៅគគុករវាងព្រះរាជាណាចក្រ ថៃនិងកម្ពុជា។
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
