|
អធិប្បាយចុងក្រោយ
|
| ឧកញ៉ាម៉ុង ឫទ្ធី មានបំណងអភិវឌ្ឍទីផ្សារសាច់ជ្រូកនៅប្រទេសកម្ពុជា |
| ដោយ រស់ ឌីណា | | | ២៧-០១-២០០៩ |  ភ្នំពេញ (កម្ពុជា) ថ្ងៃទី១២ មករា ២០០៩៖ ឧកញ៉ា ម៉ុង ឫទ្ធី សមាជិកព្រឹទ្ធសភា ប្រធានក្រុមហ៊ុនម៉ុង រិទ្ធីគ្រុប ចង់អភិវឌ្ឍទីផ្សារសាច់ជ្រូកកម្ពុជា
© វណ្ឌី រតនាការចិញ្ចឹមជ្រូកក្នុងបរិមាណតិចតួច- តម្លៃចំណីអាហារកើនឡើង-ការយកពន្ធខ្ពស់លើទីសត្តឃាដ- ការនាំចូលជ្រូកខុសច្បាប់ពីប្រទេសវៀតណាម ដែលប៉ះពាល់ដល់ការប្រកួតប្រជែង រឺតម្លៃសាច់ជ្រូកមានតម្លៃខ្ពស់...។ ទាំងនេះសុទ្ធសឹងតែជាមូលហេតុ ដែលអាចបញ្ជាក់បានអំពីភាពទន់ខ្សោយនៃទីផ្សារសាច់ជ្រូកនៅប្រទេសកម្ពុជា។ ភាពទន់ខ្សោយនៃវិស័យនេះតម្រូវអោយមានការនាំចូលជ្រូកក្នុងបរិមាណច្រើន ដើម្បីបំពេញតម្រូវការក្នុងស្រុក។ ហេតុដូច្នេះហើយ ទើបបានជាក្រុមហ៊ុនម៉ុងឫទ្ធីគ្រុប ដែលមានលោកឧកញ៉ាម៉ុង ឫទ្ធី សមាជិកព្រឹទ្ធសភាមកពីគណបក្សប្រជាជនកម្ពុជាគឺជាប្រធាន មានគំនិតផ្តួចផ្តើមបង្កើតគម្រោងចិញ្ចឹមជ្រូក ដែលនាំចូលផ្ទាល់មកពីប្រទេសអង់គ្លេស មកកាន់ព្រះរាជាណាចក្រកម្ពុជា។ ការចិញ្ចឹមជាលក្ខណៈទ្រង់ទ្រាយធំ
ជាបឋម លោកម៉ុង ឫទ្ធី ត្រូវសង់កសិដ្ឋានទំនើបដ៏ធំមួយ គោរពតាមបទដ្ឋានអន្តរជាតិ លើផ្ទៃដីទំហំ៣០ហិចតា ដែលជាកម្មសិទ្ធិដីរបស់លោកផ្ទាល់ ស្ថិតនៅព្រំប្រទល់ខេត្តព្រះសីហនុនិងខេត្តកោះកុង (យើងមិនត្រូវបានអនុញ្ញាតអោយចូលទស្សនាកសិដ្ឋាននេះនោះទេ ដោយសារបញ្ហាអនាម័យ)។ ក្រោយមក លោកត្រូវបំពេញជ្រូកមានគុណភាពចូលទៅក្នុងកសិដ្ឋានមួយនេះ ហើយលោកបានធ្វើដំណើរស្វែងរកជ្រូកទាំងនោះនៅប្រទេសអង់គ្លេស បន្ទាប់ពីមានកិច្ចព្រមព្រៀងមួយជាមួយដៃគូអភិវឌ្ឍន៍អង់គ្លេស គឺក្រុមហ៊ុន ACMC។ នៅចុងខែធ្នូ ជ្រូកចំនួន១៥០ក្បាលត្រូវបានដឹកតាមយន្តហោះមកកាន់ព្រះរាជាណាចក្រកម្ពុជា និងនៅចុងខែមករានេះ គេនឹងដឹកជ្រូកបន្ថែមចំនួន៣០០ក្បាល ហើយមួយខែក្រោយ គេនឹងនាំចូលជ្រូក១៥០ក្បាលបន្ថែមទៀត។
នៅក្នុងការចិញ្ចឹមសត្វជ្រូកចំនួន៦០០ក្បាល អ្នកធុរៈកិច្ច និងជាអនុប្រធានសភាពាណិជ្ជកម្មភ្នំពេញរូបនេះបានធ្វើការគណនាថា «នៅចុងឆ្នាំទីពីរនៃការពាណិជ្ជកម្មនេះ កសិដ្ឋាននឹងមានជ្រូក៦២០០ក្បាល នៅឆ្នាំទីបី មានចំនួន១៨ ០០០ក្បាល ហើយនៅឆ្នាំទី៨ មានរហូតដល់១,១លានក្បាល ពោលគឺចំនួនកំណត់បាន។ លោកម៉ុង ឫទ្ធីបានអះអាងថាបរិមាណនេះអាចនឹងឆ្លើយតបទៅនឹងតម្រូវការក្នុងស្រុកបានចំនួន៥០%។ សម្រាប់ឆ្នាំដំបូងនៃការធ្វើអាជីវកម្មនេះ អ្នកវិនិយោគទុនបានចំណាយថវិកាអស់៥លានដុល្លារ ហើយការចំណាយនេះអាចនឹងកើនឡើងដល់ទៅ១៣០លានដុល្លារ នៅឆ្នាំទី១០។
លោកម៉ុង ឫទ្ធីបានពន្យល់ថា «មានមនុស្សមួយចំនួនបានចោទសួរថាហេតុអ្វីបានជាត្រូវនាំចូលជ្រូកយកមកចិញ្ចឹម។ គឺដោយសារការចិញ្ចឹមជ្រូកក្នុងប្រទេសយើងនៅមិនទាន់គ្រប់គ្រាន់នៅឡើយ។ ដើម្បីបំពេញតម្រូវការក្នុងស្រុក យើងត្រូវការជ្រូក២,៤លានក្បាល ក្នុងមួយឆ្នាំ។ គ្រាន់តែនៅរាជធានីភ្នំពេញ ជ្រូកប្រហែល២ពាន់ក្បាលត្រូវបានបរិភោគនៅក្នុងមួយថ្ងៃ!»។ លោកបានគូសបញ្ជាក់ថា ការចិញ្ចឹមជ្រូកក្នុងស្រុកមានតម្លៃខ្ពស់ជាងប្រទេសជិតខាង។ «ជ្រូកមួយគីឡូមានតម្លៃចាប់ពី១,៨ទៅ២ដុល្លារ បើប្រៀបធៀបទៅនឹងប្រទេសថៃ មានតម្លៃត្រឹមតែ១,៣ដុល្លារប៉ុណ្ណោះ។ ដូចនេះ ពាណិជ្ជករត្រូវការនាំជ្រូកចូលច្រើនជាងចិញ្ចឹមជ្រូក!»
សម្រាប់ជ្រូកចិញ្ចឹមរបស់លោក ដែលនាំចូលប្រភេទយ៉កសៀរ៍ (Yorkshire) លោកម៉ុង ឫទ្ធីបានចំណាយថវិកាអស់៣ពាន់ដុល្លារ ក្នុងជ្រូកមេមួយក្បាល និង៤ពាន់ដុល្លារក្នុងជ្រូកបាមួយក្បាល ដោយមិនគិតបញ្ជូលទាំងថ្លៃដឹកជញ្ជូន បើប្រៀបធៀបទៅនឹងថវិកា៣០០ដុល្លារ ក្នុងជ្រូកមួយក្បាល ដែលនាំចូលមកពីប្រទេសថៃ។ លោកបានលើកឡើងអំពីភាពខុសគ្នានេះថា ជ្រូករបស់ប្រទេសជិតខាងបង្កើតកូនបានតែមួយលើកប៉ុណ្ណោះ ខណៈពេលពូជជ្រូកដែលលោកនាំចូលមកនេះ អាចបង្កើតកូនបានរយៈពេល៤ឆ្នាំបន្តបន្ទាប់។
ផ្តល់ការងារដល់កសិករ
លោកម៉ុង ឫទ្ធី ប្រធានក្រុមហ៊ុនម៉ុង ឫទ្ធីគ្រុប បានរៀបរាប់បន្ថែមទៀតថា កសិដ្ឋានដ៏ធំស្ថិតនៅភាគខាងត្បូងប្រទេសកម្ពុជានេះត្រូវប្រើប្រាស់បុគ្គលកម្មករត្រឹមតែជាង៥០នាក់ប៉ុណ្ណោះ ប៉ុន្តែការអនុវត្តជាក់ស្តែង កសិដ្ឋាននេះនឹងផ្តល់ឱកាសការងារដល់មនុស្សជាច្រើន។ ជាដំបូង លោកត្រូវទិញចំណីអាហារពីកសិករ ដើម្បីយកមកចិញ្ចឹមជ្រូកទាំងនោះ ពោលគឺការចំណាយ៧០%នៃការចិញ្ចឹមទាំងមូល។ នៅក្នុងន័យនេះ លោកបានបើករង្វង់ក្រចកបន្តិចថា «ប្រសិនជានៅប្រទេសកម្ពុជា ប្រជាកសិករផលិតស្រូវ ហើយនាំចេញស្រូវទៅកាន់បរទេស វានឹងធ្វើអោយពួកគេខាតបង់ប្រយោជន៍ពីផលិតផលរបស់ខ្លួន»។ លោកបានបញ្ជាក់ថា ករណីបន្ទាប់គឺ ការលក់ជ្រូកសំដៅទៅរកអ្នកចិញ្ចឹមក្នុងស្រុក ដែលមានបទពិសោធន៍ រឺមិនសូវមានបទពិសោធន៍ ក្នុងលក្ខខណ្ឌថាពួកគេយល់ព្រមចូលរួមវគ្គបណ្តាលរយៈពេលខ្លីនៅកសិដ្ឋានរបស់លោក ស្តីអំពីការចិញ្ចឹមជ្រូក (បច្ចេកទេសចិញ្ចឹមជ្រូកត្រូវបានបង្ហាញដោយក្រុមហ៊ុនអង់គ្លេស) និងលក់ជ្រូកក្រោយពេលពេញវ័យ អោយទៅទីសត្តឃាដរបស់លោក។ លោកបានសន្យាថាតម្លៃសាច់ជ្រូកដែលចេញពីទីសត្តឃាដរបស់លោក នឹងមានតម្លៃស្របតាមទីផ្សារនៅប្រទេសថៃ ដើម្បីកាត់បន្ថយទំហំនៃការនាំចូល។
ការនាំចូលត្រូវបញ្ចប់
លោកម៉ុង ឫទ្ធីបានអួតថាលោកគឺជាមនុស្សតែម្នាក់ ដែលហ៊ានប្រកបអាជីវកម្មបែបនេះ ព្រោះវាគឺជាអាជីវកម្មផ្សងព្រេង។ «នៅប្រទេសកម្ពុជា ធនាគារមិនផ្តល់ឥណទានដល់វិស័យកសិកម្មនោះទេ ព្រោះគេចាត់ទុកថាវិស័យជាមានហានិភ័យខ្ពស់។ ប៉ុន្តែ វិស័យអចលនវត្ថុ ដែលគេមានទំនុកចិត្តខ្ពស់ បែរជាកំពុងជួបវិបត្តិនាពេលសព្វថ្ងៃនេះទៅវិញ! ជាចុងក្រោយ ខ្ញុំត្រូវប្រើប្រាស់ដើមទុនផ្ទាល់របស់ខ្ញុំ»។
បច្ចុប្បន្ននេះ មានក្រុមហ៊ុននាំចូលជ្រូកចំនួនប្រាំនៅទីផ្សារនៃប្រទេសកម្ពុជា។ ជាងពីរ២ខែមកនេះ លោកម៉ុង ឫទ្ធី បានទទួលបង្កើតមណ្ឌលពិនិត្យសុខភាពជ្រូកនាំចូលមួយកន្លែងនៅជាយក្រុងភ្នំពេញ ដែលត្រូវបានពិនិត្យដោយបសុពេទ្យផ្ទាល់របស់លោក ដើម្បីបង្ការជំងឺឆ្លង លើសត្វជ្រូក និងដើម្បីត្រួតពិនិត្យឯកសារនៃការនាំចូល។ តើក្រុមហ៊ុនទាំងនេះមានការព្រួយបារម្ភចំពោះការមកដល់ជ្រូករបស់លោកនៅលើទីផ្សារ ក្នុងគោលបំណងកាត់បន្ថយការពឹងផ្អែករបស់ទីផ្សារកម្ពុជាលើការនាំចូលជ្រូកដែររឺទេ? លោកម៉ុង ឫទ្ធី បានអះអាងថាលោកបានទំនាក់ទំនងអ្នកទទួលខុសត្រូវរបស់ក្រុមហ៊ុនទាំងនោះ តាមរយៈក្រសួងកសិកម្ម ដើម្បីពន្យល់ពួកគេអំពីគម្រោងរបស់លោក។ ចាប់តាំងពីពេលនោះមក ទីផ្សារត្រូវបានធ្វើអោយមានតុល្យភាព ក្រុមហ៊ុននីមួយៗត្រូវបានផ្តល់កូតាអតិបរមាមួយនៃជ្រូកនាំចូល ចំនួនកំណត់សរុបនៃការនាំចូល គឺ៨០០ក្បាលក្នុងមួយថ្ងៃ។
«ខ្ញុំមិនចង់អោយមានការយល់ច្រឡំនោះទេ។ ខ្ញុំធ្វើដូច្នេះ ដើម្បីជួយដល់ក្រុមហ៊ុនទាំងនោះ គឺមិនមែនធ្វើអោយសហគ្រាសរបស់ពួកគេក្ស័យធននោះទេ...»។ ប្រសិនជាដំណើរការនេះបង្កអោយមានក្តីមិនពេញចិត្តផ្សេងៗ លោកឧកញ៉ាម៉ុង ឫទ្ធី បានរម្លឹកអំពីការជួសជុលផ្លូវ២៧១ ដោយក្រុមហ៊ុនរបស់លោក ដែលបានជម្រុញអោយមានការប្រឆាំងជាច្រើន។ ការងារនោះតម្រូវអោយប្រជាពលរដ្ឋឈូសឆាយផ្ទះសំបែងរបស់ខ្លួន រឺអាចរហូតដល់រើផ្ទះទាំងស្រុង ហើយបានបង្កការរំខានដល់ការធ្វើចរាចរណ៍។ «បច្ចុប្បន្ននេះ យើងមានផ្លូវស្អាត ហើយប្រជាពលរដ្ឋយល់ដឹងអំពីអត្ថប្រយោជន៍នៃការងារទាំងនេះ ហើយពួកគេបានអរគុណខ្ញុំ...»។
នាថ្ងៃអនាគត លោកម៉ុង ឫទ្ធី មានគោលបំណងនាំចេញសាច់ជ្រូកកម្ពុជាទៅកាន់បរទេស។ ហេតុដូចនេះ ចាំបាច់ត្រូវមានកសិដ្ឋានចិញ្ចឹមជ្រូកដ៏ធំមួយផ្សេងទៀតនៅក្នុងប្រទេសកម្ពុជា។ តើលោកឧកញ៉ាម៉ុង ឫទ្ធី ពិតជាត្រៀមលក្ខណៈបង្កើតកសិដ្ឋានទីពីរមែនរឺ? «យើងចាំមើលសិន វាអាស្រ័យលើបញ្ហាដើមទុន។ ប៉ុន្តែ ប្រសិនជាធនាគារជួយខ្ញុំ ហេតុអ្វីក៏ខ្ញុំមិនបង្កើតនោះ? លោកបានកត់សម្គាល់ថាធនាគារ Maybank បានបង្ហាញការចាប់អារម្មណ៍ខ្លះៗមកលើគម្រោងរបស់លោក។ លោកសង្ឃឹមថានឹងទទួលបានជំនួយជាឥណទានមួយ សម្រាប់ក្រុមហ៊ុនរបស់លោក។
ទីផ្សារអនាម័យ
ថូ គីមស្រៀន ក្រុមហ៊ុននាំចូលជ្រូករបស់លោក យក់ រ័ត្នមុនី បានធ្វើការរកស៊ីជាមួយប្រទេសថៃ ចាប់តាំងពីឆ្នាំ២០០៣មកម្ល៉េះ។ លោកបានសម្រេចចិត្តធ្វើអាជីវកម្មជាមួយប្រទេសថៃ ដោយសារយើងកត់សម្គាល់ឃើញនូវភាពទន់ខ្សោយនៃឧស្សាហកម្មសត្វជ្រូកនៅកម្ពុជា ដែលត្រូវទទួលរងបន្ទុកធ្ងន់ធ្ងរដោយសារអាហារសត្វឡើងថ្លៃ។ លោកយក់ រ័ត្នមុនី តំណាងក្រុមហ៊ុនបានអះអាងថា «ថ្ងៃណាដែលការនាំចូលជ្រូកត្រូវបញ្ឈប់ដំណើរការ ប្រសិនជាតម្រូវការក្នុងស្រុកមានច្រើន វាមិនមែនជាបញ្ហារបស់ខ្ញុំទេ។ យើងស្ថិតនៅលើទីផ្សារសេរីមួយ!»។
លោកយក់ រ័ត្នមុនីបានអះអាងអំពីការដាក់អោយប្រើប្រាស់នូវនយោបាយកូតារបស់ក្រសួងកសិកម្មកាលពីប៉ុន្មានខែមុននេះ។ ក្រុមហ៊ុនរបស់យើងបានទទួលសិទ្ធិនាំចូលជ្រូក២០៣ក្បាលក្នុងមួយថ្ងៃ បើប្រៀបធៀបកាលពីមុន គឺជាមធ្យម២៥០ក្បាលក្នុងមួយថ្ងៃ។ ទោះយ៉ាងណា លោកមិនបានសំដែងការយល់ឃើញអំពីការកូតានេះនោះទេ។ លោកបានសំដែងក្តីរីករាយចំពោះតុល្យភាពរបស់ទីផ្សារ ហើយក្រុមហ៊ុននាំចូលទាំងអស់នឹងលែងប្រកាប់ប្រចាក់គ្នាខ្លាំងក្លាដូចមុនទៀត។
ក្រុមហ៊ុន Oud Cambodia ដែលជាក្រុមហ៊ុនទី៥ និងជាក្រុមហ៊ុននាំចូលជ្រូកចុងក្រោយនៅកម្ពុជា បានទទួលកូតានាំចូលជ្រូក១៥០ក្បាល ក្នុងមួយថ្ងៃ ហើយក្រុមហ៊ុននេះបាននិយាយថាក្រុមហ៊ុនមិនបានដឹងអំពីគម្រោងរបស់លោកម៉ុង ឫទ្ធីនោះទេ។
វិស័យមួយ ដែលត្រូវកែប្រែអោយក្លាយជាវិស័យប្រកបដោយវិជ្ជាជីវៈ
លោកយ៉ង សាំងកុមារ ប្រធានមជ្ឈមណ្ឌលសិក្សាអភិវឌ្ឍន៍កសិកម្មកម្ពុជា (សេដាក) បានទទួលស្គាល់ថា «បច្ចេកទេសនិងផ្នត់គំនិតគឺត្រូវធ្វើការផ្លាស់ប្តូរ នៅក្នុងវិស័យកសិកម្មនេះ»។ ប្រសិនជាប្រទេសកម្ពុជានាំចូលផលិតផលកសិកម្ម ទីមួយ គឺដោយសារសមត្ថភាពក្នុងស្រុកមិនទាន់គ្រប់គ្រាន់។ កសិករភាគច្រើនធ្វើកសិកម្ម សម្រាប់តែផ្គត់ផ្គង់នៅក្នុងគ្រួសារប៉ុណ្ណោះ គឺមិនទាន់មានគំនិតធ្វើពាណិជ្ជកម្មនៅក្នុងវិស័យកសិកម្មនេះនោះទេ។ ប៉ុន្តែ អ្នកខ្លះបានចាប់ផ្តើមយល់ឃើញអំពីកាលានុវត្តភាពដែលត្រូវចាប់យក ជានិច្ចកាល ក្រោមការជួយបណ្តុះបណ្តាលពីសំណាក់អង្គការក្រៅរដ្ឋាភិបាលនៃវិស័យកសិកម្ម និងអភិវឌ្ឍន៍។ ម្យ៉ាងវិញទៀត ថ្លៃដើមនៃផលិតផលចុងក្រោយមានតម្លៃខ្ពស់ជាងផលិតផលនាំចូល។ លើសពីនេះ កសិករជួបការលំបាកខ្វះខាតហិរញ្ញវត្ថុ។ ពួកគេមិនមានដើមទុនគ្រប់គ្រាន់ និងមិនអាចទទួលបានជំនួយ ដើម្បីជួយពួកគេធ្វើវិនិយោគទុនឡើយ»។
ចំណែកគម្រោងរបស់ម៉ុង ឫទ្ធី លោកយ៉ង សាំងកុមារយល់ឃើញថាជា «ការវិនិយោគល្អប្រសើរមួយ ដែលនឹងអាចនាំយកប្រាក់ចំណូលជូនរដ្ឋ»។ ប៉ុន្តែ លោកបានសង្កត់ធ្ងន់អំពីហានិភ័យមួយ គឺថាជ្រូកអង់គ្លេសទាំងនេះអាចនឹងមិនទាន់បន្សាំជីវិតទៅនឹងអាកាសធាតុត្រូពិច និងចំណីអាហារក្នុងស្រុក។ ប៉ុន្តែ លោកបានប្រកាសថាជ្រូកនេះគឺជាពូជដែលអាចបង្កាត់បានកូនច្រើន ហើយគួរតែត្រូវបានទទួលបានថែទាំងយ៉ាងល្អប្រសើរបំផុត។
បន្ថែម
-ប្រឈមមុខនឹងវិបត្តិ កម្ពុជាត្រូវបង្កើតសមត្ថភាពប្រកួតប្រជែង និងបរិយាកាសវិនិយោគទុន ១១-១២-២០០៨
-លោកនីកូឡា ដឺវីឡេ អគ្គនាយកក្រុមហ៊ុនសម្បទានព្រលានយន្តហោះ : "កម្ពុជាអាចដកខ្លួនចេញផុតពីស្ថានភាពលំបាក" ០៣-១២-២០០៨
-សហគ្រាសធុនតូចនិងមធ្យមជួបបញ្ហាក្នុងការស្វែងរកហិរញ្ញប្បទាន ០៥-១១-២០០៨
-ផ្លូវដ៏វែងឆ្ងាយឆ្ពោះទៅកាន់ការការពារផលិតផលខ្មែរ ២៩-១០-២០០៨
|
|
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
