| គណបក្សសម រង្ស៊ីរៀបចំសមាជ ដើម្បីត្រៀមលក្ខណៈចូលរួមការបោះឆ្នោតក្រុមប្រឹក្សាមូលដ្ឋាន នាខែឧសភា |
| ដោយ ដួង សុខា | |
| ៣១-០១-២០០៩ |
 ភ្នំពេញ (កម្ពុជា) ថ្ងៃទី៣១ ខែមករា ២០០៩៖ លោកសម រង្ស៊ី មេដឹកនាំគណបក្សសម រង្ស៊ី ជួបសមាជិកគណបក្សរបស់លោក នៅក្នុងសមាជ សម្រាប់ការបោះឆ្នោតក្រុមប្រឹក្សាថ្មី ដែលគ្រោងនឹងរៀបចំធ្វើឡើងនៅខែឧសភា ឆ្នាំ២០០៩ ©ចន វីង/ Magnum គណបក្សសម រង្ស៊ីបានរៀបចំសមាជវិសាមញ្ញមួយ នៅទីស្នាក់ការបក្ស នាទីក្រុងភ្នំពេញ នៅថ្ងៃសៅរ៍ ទី៣១ ខែមករា ដែលមានសមាជិកចូលរួមប្រមាណជាង២ពាន់នាក់ ដើម្បីត្រៀមលក្ខណៈចូលរួមការបោះឆ្នោតក្រុមប្រឹក្សារាជធានី ខេត្ត ក្រុង ស្រុក និងខ័ណ្ឌ នៅទូទាំងប្រទេសកម្ពុជា នាពេលខាងមុខនេះ ។ សមាជិកចូលរួមសុទ្ធសឹងជាក្រុមប្រឹក្សាឃុំ-សង្កាត់របស់គណបក្ស ដែលជាអ្នកត្រូវបោះឆ្នោតជ្រើសរើសក្រុមប្រឹក្សាថ្មី នាខាងឧសភានេះ។ នេះគឺជាឱកាសមួយ សម្រាប់គណបក្សប្រឆាំង ក្នុងការបញ្ជាក់អំពីគោលជំហរជាថ្មី... និងភាពរឹងមាំនៃចលនាប្រជាធិបតេយ្យដើម្បីការផ្លាស់ប្តូរ។ ការណែនាំរបស់លោក សម រង្ស៊ី
លោកសម រង្ស៊ី បានចាប់ផ្តើមឡើងថ្លែងសុន្ទរកថា ដោយជាបឋម លោកបានសំដែងភាវរភក្តីចំពោះសមាជិកគណបក្សសម រង្ស៊ី ដែលធ្វើការងារ នៅកំរិតមូលដ្ឋាន។ «អស់លោកគឺជាភ្នែក ត្រចៀក ខួរក្បាល និងបេះដូងរបស់ខ្ញុំ! ខ្ញុំត្រូវការព័ត៌មានរបស់អស់លោក ដើម្បីដឹងថាតើប្រជាជនរស់នៅយ៉ាងដូចម្តេច»។ លោកសម រង្ស៊ីបានលើកទឹកចិត្តសមាជិកទាំងនោះ «អោយផ្តល់ព័ត៌មាន និងសហការយ៉ាងជិតស្និទ្ធិ» និងបានប្រកាសថា លោកបានស្នើអគ្គលេខាធិការដ្ឋានគណបក្សសម រង្ស៊ី អោយបង្កើតនូវមធ្យោបាយដែលអនុញ្ញាតអោយសមាជិកបក្ស «ទំនាក់ទំនងអ្នកទទួលខុសត្រូវបក្សដោយផ្ទាល់» ក្នុងនោះរួមទាំងលោកផងដែរ។
យោងតាមលោកស្រីកែ សុវណ្ណរ័ត្ន អគ្គលេខាធិការស្តីទីគណបក្សសម រង្ស៊ី រហូតដល់ថ្ងៃទី៣១ ខែធ្នូ ២០០៨ គណបក្សមានសមាជិកចំនួន៧៤៧ ១៣១នាក់ ហើយគណបក្សបានចូលធ្វើអន្តរាគមន៍ កាលពីអំឡុងឆ្នាំកន្លងទៅ នៅក្នុងការរំលោភសិទ្ធិមនុស្សចំនួន៤៨ករណី (ឃាតកម្ម ការចាប់ខ្លួនខុសច្បាប់ ការបំភិតបំភ័យការចែកខិត្តប័ណ្ណ) មកលើសមាជិកបក្សសម រង្ស៊ី។
បន្ទាប់ពីការអំពាវនាវអោយរួបរួមកម្លាំងគ្នានេះ មេដឹកនាំបក្សក៏បានបង្ហាញព្រឹត្តិបត្រព័ត៌មានប្រចាំខែមួយ ស្តីអំពីវិមជ្ឈការ ដែលពាក់ព័ន្ធនឹងដំណើរការបោះឆ្នោតក្រុមប្រឹក្សាថ្មី ដែល «ត្រូវស្វែងយល់ និងផ្សព្វផ្សាយប្រាប់ប្រជាពលរដ្ឋ»។ ព្រឹត្តិបត្រនេះត្រូវបានរៀបចំដោយសមាគមវិមជ្ឈការនៅកម្ពុជា ដែលត្រូវបង្កើតឡើងនិងដឹកនាំដោយសមាជិកគណបក្សសម រង្ស៊ីមួយរូប ដែលជាថៅសង្កាត់នៅខ័ណ្ឌឫស្សីកែវ រាជធានីភ្នំពេញ។ លោកសម រង្ស៊ីបានគូសបញ្ជាក់ថា «បច្ចុប្បន្ននេះ ខ្ញុំចង់បង្ហាញថាមានអ្នកស្មោះត្រង់នឹងគណបក្សសម រង្ស៊ីជាយូរឆ្នាំមកហើយ ដែលមិនបានចូលរួមជាមួយគណបក្សផ្សេង បើទោះបីជាគណបក្សផ្សេងបានព្យាយាមទិញទឹកចិត្តពួកគេ នៅមុនបោះឆ្នោតតំណាងរាស្រ្ត កាលពីខែកក្កដា ឆ្នាំ២០០៨ក៏ដោយ»។ ក្រោយមក លោកក៏បានរិះគន់ស្ថានីយទូរទស្សន៍ជាតិកម្ពុជា (ទ.ទ.ក) ផងដែរ ដែលបានផ្សព្វផ្សាយព័ត៌មានអំពីការចាកចេញសមាជិកនៅក្នុងបក្សសម រង្ស៊ី។ «ខ្ញុំសោកស្តាយដែលគេនិយាយអំពីការចាកចេញ ប៉ុន្តែមិនបាននិយាយអំពីអ្នកស្មោះត្រង់នឹងបក្ស!»។
កំណែទម្រង់បក្ស
គណបក្សសម រង្ស៊ី ក៏បានប្រកាសអំពីការធ្វើកំណែទម្រង់ផងដែរ។ លោកសម រង្ស៊ីបានពន្យល់យ៉ាងខ្លីថាលក្ខន្តិកៈបក្ស ក៏ដូចជាបទបញ្ជាផ្ទៃក្នុងបក្សត្រូវធ្វើវិសោធនកម្ម «ដើម្បីពង្រឹងបក្ស ទប់ស្កាត់រាល់ការប៉ុនប៉ងពីខាងក្រៅ ដែលព្យាយាមធ្វើអោយសមាជិកក្នុងបក្សបែកបាក់សាមគ្គី»។
បន្តិចក្រោយមក លោកអេង ឆៃអ៊ាង តំណាងរាស្រ្តគណបក្សសម រង្ស៊ី ប្រចាំមណ្ឌលបាត់ដំបង បានរៀបរាប់លំអិតជុំវិញទិដ្ឋភាពមួយនៃកំណែទម្រង់នេះ ទាក់ទងនឹងការតែងតាំងអគ្គលេខាធិការ។ មកទល់សព្វថ្ងៃនេះ អគ្គលេខាធិការបក្សត្រូវបានជ្រើសតាំងដោយសមាជិកគណៈកម្មាធិការនាយក។ ប៉ុន្តែ ចាប់ពីពេលនេះទៅ ប្រធានគណបក្សសម រង្ស៊ី គឺជាអ្នកជ្រើសតាំងអគ្គលេខាធិការ បន្ទាប់ពីមានការប្រឹក្សាជាមួយគណៈកម្មាធិការនាយក។ «ម្យ៉ាងទៀត បន្ទាប់កាន់តំណែងនេះរយៈពេលបីខែមក ប្រសិនជាអគ្គលេខាធិការមិនធ្វើការត្រឹមត្រូវ តាមការយល់ឃើញរបស់គណៈកម្មាធិការនាយក គណៈកម្មាធិការនាយកនឹងអាចទម្លាក់គេចេញពីតំណែងនេះ តាមរយៈការរៀបចំញត្តិមួយ»។ «មិនមានអ្វីផ្សេងត្រូវបានលើកឡើង ទាក់ទិននឹងវិសោធនកម្មនោះទេ»។
ចលនាប្រជាធិបតេយ្យដើម្បីការផ្លាស់ប្តូរ ឆ្លើយតបទៅនឹងសម្តេចហ៊ុន សែន
កាលពីថ្ងៃទី២០ ខែមករា ពោលគឺប្រាំថ្ងៃ ក្រោយការបង្កើតចលនាប្រជាធិបតេយ្យដើម្បីការផ្លាស់ប្តូរ ដោយគណបក្សសម រង្ស៊ី និងគណបក្សសិទ្ធិមនុស្ស សម្តេចនាយករដ្ឋមន្រ្តីហ៊ុន សែន បានមានប្រសាសន៍នៅខេត្តឧត្តរមានជ័យថា សម្តេចអាចបំបែកចលនានេះបាន នៅពេលណាដែលសម្តេចចង់។ ម្យ៉ាងវិញទៀត កាលនោះ ប្រមុខរដ្ឋាភិបាល បានលើកឡើងទាំងរីករាយ អំពីការចាកចេញសមាជិកគណបក្សសម រង្ស៊ី យ៉ាងច្រើនសន្ធឹកសន្ធាប់ ដើម្បីចូលរួមជាមួយគណបក្សរបស់សម្តេច គឺគណបក្សប្រជាជនកម្ពុជា នៅមុនពេលបោះឆ្នោតជ្រើសតាំងតំណងរាស្រ្តអាណត្តិទី៤...»។ សម្តេចបានសង្កត់ធ្ងន់ថា «មិនចាំបាច់ខំប្រឹងយក ឈ្នះគណបក្សប្រជាជនឡើយ!»។
សមាជគណបក្សសម រង្ស៊ីនេះបានផ្តល់ឱកាសដល់មេដឹកនាំគណបក្សប្រឆាំងទាំងពីរធ្វើការវាយបកទៅលើសម្តេចហ៊ុន សែនវិញ។ លោកគង់ គាំ អនុប្រធានគណបក្សសម រង្ស៊ី បានរិះគន់ថា «កាលពីប៉ុន្មានថ្ងៃនេះ គេប្រើពាក្យសំដី ចង់បំបែកចលនាប្រជាធិបតេយ្យដើម្បីការផ្លាស់ប្តូរ។ នោះគឺជាសំដីរបស់លោកហ៊ុន សែន។ ប៉ុន្តែ គេមិនអាចសម្រេចគោលបំណងនេះឡើយ ព្រោះប្រជាពលរដ្ឋ-អ្នកបោះឆ្នោតតាមពួកយើង អ្នកស្មោះត្រង់របស់យើងស្ថិតនៅក្បែរយើងជានិច្ច។ នៅក្នុងរបបនេះ គេប្រើអំណាចតុលាការ ដើម្បីចាប់ខ្លួនយើង...»។
បន្ទាប់មក លោកកឹម សុខា ប្រធានគណបក្សសិទ្ធិមនុស្ស ដែលត្រូវបានអញ្ជើញចូលរួមសមាជរបស់គណបក្សសម រង្ស៊ី បានសង្កត់ធ្ងន់នូវសាមគ្គីភាពនៃទំនាក់ទំនងរវាងគណបក្សសម រង្ស៊ី និងគណបក្សសិទ្ធិមនុស្ស នៅក្នុងចលនាប្រជាធិបតេយ្យដើម្បីការផ្លាស់ប្តូរ។ «យើងមិនខ្លាចឡើយ! គ្មាននរណាម្នាក់អាចទិញទឹកចិត្តរបស់យើង រឺបរិហារកេរ្តិ៍ឈ្មោះយើងឡើយ។ យើងបន្តធ្វើការរួមគ្នា។ ចាប់តាំងពីឆ្នាំ១៩៩៣មក ខ្ញុំធ្លាប់ចាប់អារម្មណ៍ចំពោះគោលជំហរដ៏រឹងមាំរបស់លោកសម រង្ស៊ី។ ឥឡូវនេះ ដល់ពេលយើងត្រូវធ្វើការរួមគ្នាហើយ»។
អានបន្ថែមលើកាសែត
-គណបក្សប្រឆាំងនៅកម្ពុជាបង្កើតចលនានយោបាយប្រជាធិបតេយ្យដើម្បីការផ្លាស់ប្តូរ (១៥-០១-២០០៩)
-ការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខ័ណ្ឌ នៅកម្ពុជា៖ គ.ជ.ប បង្ហាញចំនួនសមាជិកក្រុមប្រឹក្សាទាំងអស់សរុប៣ ២៣៥នាក់ (១៩-០១-២០០៩)
-គណបក្សប្រឆាំង សម រង្ស៊ី រៀបចំសមាជវិសាមញ្ញនៅចុងខែមករា ដើម្បីត្រៀមខ្លួនចូលរួមការបោះឆ្នោតជ្រើសរើសក្រុមប្រឹក្សារាជ ធានី ខេត្តក្រុង ស្រុក ខ័ណ្ឌ (១៣-០១-២០០៩)
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
