| គណបក្សរាជានិយមនៅកម្ពុជារួមកម្លាំង ត្រៀមលក្ខណៈចូលរួមការបោះឆ្នោតខែឧសភា |
| ដោយ ដួង សុខា | |
| ០២-០២-២០០៩ |
  ភ្នំពេញ (កម្ពុជា) ថ្ងៃទី២ កុម្ភៈ ២០០៩៖ លោកលឺ ឡាយស្រេង អតីតរដ្ឋមន្រ្តីក្រសួងអភិវឌ្ឍន៍ជនបទ និងបច្ចុប្បន្នជាអនុប្រធានទីមួយគណបក្សហ៊្វុនស៊ិនប៉ិច ជល់កែវជាមួយលោកឈឹម សៀកឡេង ប្រធានគណបក្សនរោត្តម រណឫទ្ធិ នៅក្នុងពិធីចុះហត្ថលេខាលើពិធីសារសហប្រតិបត្តិការរវាងគណបក្សនយោបាយទាំងពីរ
©ចន វីង/ Magnumបន្ទាប់ពីការបង្កើតចលនាប្រជាធិបតេយ្យដើម្បីការផ្លាស់ប្តូររវាងគណបក្សសម រង្ស៊ី និងគណបក្សសិទ្ធិមនុស្ស កាលពីថ្ងៃទី១៥ ខែមករាមក គណបក្សហ៊្វុនស៊ិនប៉ិចនិងគណបក្សនរោត្តម រណឬទ្ធិ បានរៀបចំពិធីចុះហត្ថលេខាសហប្រតិបត្តិការមួយ ដើម្បីត្រៀមលក្ខណៈចូលរួមការបោះឆ្នោតក្រុមប្រឹក្សាថ្មី នាខែឧសភាខាងមុខនេះ។ ពិធីនេះត្រូវបានរៀបចំធ្វើឡើងនៅទីស្នាក់ការគណបក្សហ៊្វុនស៊ិនប៉ិច នាទីក្រុងភ្នំពេញ នៅថ្ងៃទី២ ខែកុម្ភៈ ដោយមានការចូលរួមពីសំណាក់មេដឹកនាំគណបក្សនយោបាយទាំងពីរ ហើយកិច្ចព្រមព្រៀងសហប្រតិបត្តិការរាជានិយមរវាងគណបក្សនយោបាយទាំងពីរ ត្រូវបានចុះហត្ថលេខាដោយលោកកែវ ពុទ្ធរស្មី ប្រធានគណបក្សហ៊្វុនស៊ិនប៉ិច និងលោកឈឹម សៀកឡេង ប្រធានគណបក្សនរោត្តម រណឫទ្ធិ។ គណបក្ស «បងប្អូន»
បន្ទាប់ពីបញ្ចប់ពិធីចុះហត្ថលេខានេះ លោកកែវ ពុទ្ធរស្មី ដែលត្រូវបានសាកសួរដោយក្រុមអ្នកយកព័ត៌មាន បានពន្យល់ថា គណបក្សទាំងពីរ គឺជា «បងប្អូន»នឹងគ្នា ចាប់តាំងពីការបង្កើតគណបក្សនរោត្តម រណឫទ្ធិមកម្ល៉េះ។ លោកបានចាត់ទុកការរួបរួមកម្លាំងរវាងគណបក្សទាំងពីរ គឺជាយុទ្ធសាស្រ្តមួយ ដើម្បីពង្រឹងជំហរអោយកាន់តែប្រសើរឡើង នៅក្នុងការបោះឆ្នោតជាលក្ខណៈអសកល ដើម្បីជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខ័ណ្ឌ នាខែឧសភាខាងមុខនេះ។ លោកបានបញ្ចាក់ថា «នេះគឺជាកិច្ចសហប្រតិបត្តិការមួយ ប៉ុន្តែមិនមែនជាសម្ព័ន្ធភាពនោះទេ»។ លោកបានកត់សម្គាល់ថាគណបក្សទាំងពីរគឺមានភាពប្រាកដនិយម ហើយការរួមកម្លាំងគ្នានេះ មិនមែនដើម្បីប្រកួតប្រជែងជាមួយគណបក្សផ្សេងឡើយ»។
សង្ឃឹមថានឹងទទួលបានលទ្ធផលបោះឆ្នោតល្អ
លោកញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច បានអំពាវនាវអោយទាញយកមេរៀនអតីតកាលមកសិក្សា។ «កាលពីមុន យើងធ្លាប់បានបែកបាក់។ នេះគឺជាបទពិសោធន៍មួយ ដែលយើងត្រូវពិចារណា។ ប្រសិនជាគណបក្សយើងទាំងពីររួបរួមកម្លាំងតែមួយ នៅពេលបោះឆ្នោតថ្នាក់ជាតិកន្លងទៅនេះ យើងប្រហែលជាមិនបានទទួលអាសនៈ២ម្នាក់នោះទេ ប៉ុន្តែ យើងទទួលបានអាសនៈ១៧!។ កិច្ចសហប្រតិបត្តិការថ្មីនេះមិនប៉ះពាល់ដល់ទំនាក់ទំនងរវាងគណបក្សហ៊្វុនស៊ិនប៉ិចនិងគណបក្សប្រជាជនកម្ពុជានោះទេ»។ សម្រាប់លោក កិច្ចសហប្រតិបត្តិការនេះអាចនឹងទទួលបានផ្លែផ្កាខ្ពស់។ យោងតាមការប៉ាន់ប្រមាណរបស់លោក គណបក្សហ៊្វុនស៊ិនប៉ិច រួមជាមួយគណបក្សនរោត្តម រណឫទ្ធិ អាចនឹងទទួលបានលទ្ធផលល្អប្រសើរនៅខែឧសភានេះពីបីទៅបួនដង ជាងកាលដែល គណបក្សដាក់បញ្ជីឈ្មោះតែម្នាក់ឯង។
មិនមានប្រតិកម្មទៅនឹងចលនារបស់គណបក្សប្រឆាំង
យ៉ាងណាមិញ លោកយូ ហុកគ្រី អគ្គលេខាធិការគណបក្សនរោត្តម រណឫទ្ធិ បានលើកអំណះអំណាងដូចគ្នានេះ និងបានធ្វើការប៉ាន់ប្រមាណផ្ទាល់មួយ ទាក់ទងនឹងការបោះឆ្នោត ដោយបានពន្យល់ថា គណបក្សនីមួយៗត្រូវទទួលអត្ថប្រយោជន៍ពីកិច្ចសហការនេះ។ លោកបានពន្យល់លំអិតថា គណបក្សនីមួយៗបានបង្កើតក្រុមការងារបច្ចេកទេសមួយ ដើម្បីពិភាក្សាអំពីបែបបទនៃកិច្ចសហប្រតិបត្តិការនេះ។ លោកបានគូសបញ្ជាក់ថា «ខ្ញុំមិនចង់ឃើញសហប្រតិបត្តិការនេះស្លាប់ មុនពេលបោះឆ្នោតឡើយ!»។ លោកបានអះអាងថាទំនាក់ទំនងថ្មីរវាងគណបក្សទាំងពីរ ដែលចាត់ទុកខ្លួនឯងថាជាគណបក្សរាជានិយមនោះ មិនមែន «ឆ្លើយតប» ទៅនឹងការបង្កើតចលនាប្រជាធិបតេយ្យដើម្បីការផ្លាស់ប្តូរនោះទេ។
អានបន្ថែមនៅលើកាសែត
-គណបក្សសម រង្ស៊ីរៀបចំសមាជ ដើម្បីត្រៀមលក្ខណៈចូលរួមការបោះឆ្នោតក្រុមប្រឹក្សាមូលដ្ឋាន នាខែឧសភា ០២-០២-២០០៩
-ជម្លោះផ្ទៃក្នុងគណបក្សនរោត្តម រណឫទ្ធិៈ ការទាស់ទែងគ្នាជាមួយសម្ព័ន្ធភាពនៃគណបក្សរណសិរ្សជាតិខ្មែរ ៣០-០១-២០០៩
-គណបក្សប្រឆាំងនៅកម្ពុជាបង្កើតចលនានយោបាយប្រជាធិបតេយ្យដើម្បីការផ្លាស់ប្តូរ ១៥-០១-២០០៩
-ការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខ័ណ្ឌ នៅកម្ពុជា៖ គ.ជ.ប បង្ហាញចំនួនសមាជិកក្រុមប្រឹក្សាទាំងអស់សរុប៣ ២៣៥នាក់ ១៩-០១-២០០៩
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
