|
អធិប្បាយចុងក្រោយ
|
| គណបក្សនរោត្តម រណឫទ្ធិ ពន្យល់អំពីភាពវឹកវរនៅក្នុងគណបក្ស |
| ដោយ ដួង សុខា | | | ០២-០២-២០០៩ | នៅក្នុងពិធីចុះហត្ថលេខាលើកិច្ចសហប្រតិបត្តិការរវាងគណបក្សហ៊្វុនស៊ិនប៉ិច និងគណបក្សនរោត្តម រណឫទ្ធិ នៅថ្ងៃច័ន្ទ ទី២ ខែកុម្ភៈ នាទីក្រុងភ្នំពេញ ថ្នាក់ដឹកនាំគណបក្សនរោត្តម រណឫទ្ធិបានធ្វើការបកស្រាយ ជុំវិញចលាចលដែលកើតមាននៅក្នុងគណបក្សរបស់ខ្លួន។ កាលពីថ្ងៃទី៣០ ខែមករា សមាជិកគណបក្សរណសិរ្សជនជាតិខ្មែរ ដែលត្រូវបានរំលាយទៅជាគណបក្សនរោត្តម រណឫទ្ធិ បានធ្វើបាតុកម្មនៅមុខទីស្នាក់ការគណបក្ស និងបានបង្កអោយមានការខូចខាតផ្សេងៗ ក្នុងគោលបំណងតវ៉ាប្រឆាំងនឹងដកតំណែងរបស់អ្នកស្រីមាស សុគន្ធ សមាជិកគណបក្សមួយរូប។ ក្រោយមក ក៏មានការបញ្ឈប់តំណែងសមាជិកគណបក្សរណសិរ្សផ្សេងៗនៅថ្ងៃបន្ទាប់។ គណបក្សនរោត្តម រណឫទ្ធិ និងព្រះអង្គម្ចាស់រណឫទ្ធិបានពន្យល់បកស្រាយ។ មូលហេតុនៃការដកអ្នកស្រីមាស សុគន្ធ
សម្រាប់លោកយូ ហុកគ្រី អគ្គលេខាធិការគណបក្សនរោត្តម រណឫទ្ធិ ស្ថានភាពនេះគឺជាលទ្ធផលនៃ«ជម្លោះបុគ្គល នៅក្នុងបក្ស»។ លោកបានពន្យល់ថា នៅក្នុងកិច្ចប្រជុំមួយនៃក្រុមប្រឹក្សាភិបាល សំដៅដោះស្រាយបញ្ហាមួយចំនួនដែលគណបក្សប្រឈមមុខ «សមាជិកខ្លះបានលើកឡើងអំពីករណីរបស់អ្នកស្រីមាស សុគន្ធថាស្វាមីរបស់គាត់បានចូលទីស្នាក់ការបក្ស ដោយមានកាន់អាវុធ ក្នុងគោលបំណងគំរាមកំហែងអ្នកដែលបង្កជម្លោះជាមួយភរិយារបស់គាត់»។ លោកបានបន្ថែមថា នេះគឺជាកំហុសឆ្គងមួយ ដែលមិនអាចអត់អោនអោយបាន «ហេតុដូច្នេះហើយទើបបានជាក្រុមប្រឹក្សាភិបាលបានស្នើអោយអ្នកស្រីពន្យល់អំពីទង្វើរបស់ស្វាមីអ្នកស្រី»។
លោកយូ ហុកគ្រី បានបន្តទៀតថា បន្ទាប់ពីកើតមានឧប្បត្តិហេតុនេះឡើងមក សមាជិកក្រុមប្រឹក្សាភិបាលរូបនេះបានប្រើពាក្យសំដីប្រមាថមើលងាយសម្តេចក្រុមព្រះនរោត្តម រណឫទ្ធិ។ «ទោះបីជាព្រះអង្គម្ចាស់ចាកចេញពីគណបក្សក៏ដោយ ក៏គណបក្សរាជានិយមនេះនៅតែរក្សាព្រះនាម និងព្រះឆាយាល័ក្ខណ៍របស់ព្រះអង្គដដែល។ យើងបានស្នើអោយអ្នកស្រីមាស សុគន្ធ សរសេរលិខិតសុំទោសសម្តេចក្រុមព្រះ។ យើងបានទុកពេលអោយគាត់ ប៉ុន្តែ យើងមិនឃើញមានលិខិតសុំទោសណាមួយឡើយ! ដូច្នេះ យើងសន្និដ្ឋានថាគាត់មិនគាំទ្រគណបក្សនរោត្តម រណឫទ្ធិទេ។ សរុបមក សមាជិកក្រុមប្រឹក្សាភិបាលពីរភាគបី បានសម្តេចដកគាត់ចេញពីបក្ស។ សេចក្តីសម្រេចនេះធ្វើឡើងនៅថ្ងៃទី២៤ ខែមករា ប៉ុន្តែ ដោយសារចំពេលបុណ្យចូលឆ្នាំចិន យើងក៏បានសម្រេចផ្សព្វផ្សាយជាសាធារណៈ នៅថ្ងៃទី៣០ ខែមករា»។
គណបក្សនរោត្តម រណឫទ្ធិ ចង់ដាក់ពាក្យបណ្តឹងប្រឆាំងសមាជិកគណបក្សរណសិរ្ស
លោកអគ្គលេខាធិការបានរម្លឹកថា គណបក្សរណសិរ្សជនជាតិខ្មែរបានរំលាយចូលគណបក្សនរោត្តម រណឫទ្ធិ នៅក្នុងសមាជមួយរបស់ខ្លួន។លោកមានប្រសាសន៍ថា «រវាងគណបក្សទាំងពីរ តើគណបក្សណាមួយស្របច្បាប់? គណបក្សយើងត្រូវបានចុះបញ្ជីនៅក្រសួងមហាផ្ទៃ ហើយយើងធ្លាប់បានចូលរួមបោះឆ្នោតជាច្រើនលើក និងបានទទួលអាសនៈនៅក្នុងរដ្ឋសភាជាតិ!»។ ដោយធ្វើការវាយប្រហារទៅលើលោកស៊ុត ឌីណា អគ្គលេខាធិការរងគណបក្សនរោត្តម រណឫទ្ធិ និងជាអតីតសមាជិកគណបក្សរណសិរ្សជនជាតិខ្មែរ ដែលបានការពារអ្នកស្រីមាស សុគន្ធ លោកយូ ហុកគ្រីបានចោទសួរថា «តើអគ្គលេខាធិការរងអាចបណ្តេញអគ្គលេខាធិការបានដែររឺទេ?» លោកស៊ុត ឌីណា ក៏ត្រូវបានដកចេញពីគណបក្សផងដែរ។
លោកយូ ហុកគ្រីបានប្រកាសថា «យើងកំពុងតែដាក់ពាក្យបណ្តឹងទៅកាន់តុលាការ ប្តឹងរាល់អ្នកដែលបានបំផ្លិចបំផ្លាញទីស្នាក់ការគណបក្សនរោត្តម រណឫទ្ធិ និងប្តឹងស្វាមីអ្នកស្រីមាស សុគន្ធទៅកាន់ក្រសួងការពារជាតិ ពីបទប្រើប្រាស់អាវុធខុសច្បាប់»។
លោកស៊ុត ឌីណាៈ នេះជាការដណ្តើមអំណាច
ដោយឡែក លោកស៊ុត ឌីណា បានលើកឡើងពីការបណ្តេញលោកចេញពីគណបក្សនរោត្តម រណឫទ្ធិ កាលពីថ្ងៃទី៣១ មករា ហើយការសម្រេចបែបនេះមិនបានធ្វើអោយលោកមានការ «ភ្ញាក់ផ្អើល»នោះទេ។ លោកបានពន្យល់ថាគណៈកម្មាធិការនាយកនៃអតីតគណបក្សរណសិរ្សជនជាតិខ្មែរ បានផ្ញើលិខិតមួយច្បាប់ នៅថ្ងៃច័ន្ទ ទី២ ខែកុម្ភៈ ទៅកាន់ព្រះបរមរាជវាំង ក្រុមប្រឹក្សាធម្មនុញ្ញ រាជរដ្ឋាភិបាល និងក្រសួងមហាផ្ទៃ ដើម្បីបរិហារអំពី «ការខ្វះខាតភាពស្របច្បាប់នៃការគ្រប់គ្រងរបស់គណបក្សនរោត្តម រណឫទ្ធិ» ហើយបើតាមប្រសាសន៍របស់លោក «គណបក្សនេះបានដណ្តើមអំណាច»។ លោកបានគូសបញ្ជាក់ថា «កាលពីថ្ងៃទី១៦ ខែវិច្ឆិកា ឆ្នាំ២០០៦ នៅក្នុងសមាជមួយ គណបក្សរណសិរ្សជនជាតិខ្មែរ បានប្រគល់អំណាចរបស់ខ្លួន អោយទៅសម្តេចក្រុមព្រះ គឺមិនមែនអោយទៅអនុប្រធានរបស់សម្តេចក្រុមព្រះ (លោកឈឹម សៀកឡេង) រឺក៏អគ្គលេខាធិការបក្ស (លោក យូ ហុកគ្រី)នោះទេ»។
ព្រះអង្គម្ចាស់នរោត្តម រណឫទ្ធិ មិនចង់អោយប្រើព្រះនាមរបស់ព្រះអង្គ
យ៉ាងណាមិញ ព្រះអង្គម្ចាស់នរោត្តម រណឫទ្ធិ ដែលបានបង្កើតវិបសាយផ្ទាល់ព្រះអង្គថ្មីមួយ ចាប់តាំងពីព្រះអង្គចូលកាន់តំណែងថ្មីជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ នរោត្តម សីហមុនី ក៏បានបញ្ចេញមតិយោបល់ផងដែរ។ នៅក្នុងលិខិតមួយច្បាប់ ចេញផ្សាយនៅលើវិបសាយព្រះអង្គ ចុះថ្ងៃទី៣១ ខែមករា«ផ្ញើជូនជនរួមជាតិនិងសមាជិកគណបក្សនរោត្តម រណឫទ្ធិ» សម្តេចក្រុមព្រះបានស្នើសុំអោយដកឈ្មោះនិងរូបរបស់ព្រះអង្គ ចេញពីរូបសញ្ញានិងនិមិត្តសញ្ញានៃគណបក្សនរោត្តម រណឫទ្ធិ ដើម្បីរក្សាអព្យាក្រឹត្យភាពនយោបាយនៃស្ថាប័នព្រះបរមរាជវាំង ដែលព្រះអង្គកំពុងបំពេញតួនាទីសព្វថ្ងៃ។
«ថ្មីៗនេះ មានសកម្មភាពមួយចំនួនបានធ្វើអោយប៉ះពាល់ដល់កិត្តិយសនិងកិត្តិនាមរបស់ខ្ញុំ ព្រមទាំងមានការរិះគន់មកលើរូបខ្ញុំយ៉ាងខ្លាំងថា បានបន្តលូកដៃចូលក្នុងកិច្ចការផ្ទៃក្នុងគណបក្សនេះ(នរោត្តម រណឫទ្ធិ)។ ដោយផ្នែកលើមូលដ្ឋានជាក់លាក់ទាំងនេះ ខ្ញុំបានសម្រេចចិត្តស្នើថ្នាក់ដឹកនាំ គណបក្សនរោត្តម រណឫទ្ធិ រៀបចំនីតិវិធីប្តូរឈ្មោះនិង រូបរបស់ខ្ញុំចេញ ដើម្បីជៀសវាងរាល់ពាក្យរិះគន់ផ្សេងៗ។ ប៉ុន្តែ ថ្នាក់ដឹកនាំបក្សបានស្នើសុំការអនុញ្ញាតពីខ្ញុំ ដើម្បីបន្តប្រើឈ្មោះ និងរូបថតរបស់ខ្ញុំ តទៅទៀត រហូតក្រោយការបោះឆ្នោតជ្រើសរើសក្រុមប្រឹក្សាថ្មី នាខែឧសភាខាងមុខនេះ»។ ព្រះអង្គម្ចាស់នរោត្តម រណឫទ្ធិបានបន្ថែមថា ទ្រង់យល់ព្រមតាមសំណើរបស់ពួកគេ។ ដោយត្អូញត្អែរចំពោះ «ការវាយប្រហារយ៉ាងអយុត្តិធម៌ មកលើរូបថតនិងឈ្មោះរបស់ព្រះអង្គ» សម្តេចក្រុមព្រះបានលើកឡើងនៅចុងសារលិខិតថា «ព្រះអង្គនៅតែបន្តបម្រើជាតិ សាសនា និងព្រះមហាក្សត្រ»នៃព្រះរាជាណាចក្រកម្ពុជា តាមរយៈតួនាទីថ្មី ដែលព្រះមហាក្សត្រទ្រង់ប្រោសព្រះរាជទានដល់ព្រះអង្គ។
|
|
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
