| ការចរចាទ្វេភាគីជុំវិញប្រាសាទព្រះវិហារត្រូវរាំងស្ទះដោយសារឈ្មោះប្រាសាទ |
| ដោយ ដួង សុខា | |
| ០៥-០២-២០០៩ |
ការចរចាជុំវិញវិបត្តិនៅព្រំដែននៅប្រាសាទព្រះវិហារ រវាងប្រទេសកម្ពុជានិងប្រទេសថៃ បានចាប់ផ្តើមឡើងវិញ កាលពីចុងខែមករានេះ បន្ទាប់ពីរដ្ឋមន្រ្តីការបរទេសថៃថ្មីបានមកបំពេញទស្សនៈកិច្ចនៅទីក្រុងភ្នំពេញ។ កិច្ចប្រជុំមួយនៃគណៈកម្មាធិការចម្រុះព្រំដែនខ្មែរ-ថៃ ដែលរៀបចំធ្វើឡើងនៅទីក្រុងបាងកក នាថ្ងៃទី៣ និងទី៤ ខែកុម្ភៈ បានទទួលបរាជ័យ ក្នុងការឈានទៅរកការបោះបង្គោលព្រំដែនរួម។
នៅពេលត្រឡប់មកកាន់ប្រទេសកម្ពុជាវិញ នាថ្ងៃព្រហស្បតិ៍ ទី៥ ខែកុម្ភៈនេះ លោកវ៉ា គឹមហុង ប្រធានគណៈកម្មាធិការដោះស្រាយជម្លោះព្រំដែនកម្ពុជា បានប្រកាសប្រាប់អ្នកសារព័ត៌មាននៅឯព្រលានយន្តហោះអន្តរជាតិភ្នំពេញថា ភាគីទាំងពីរមិនឯកភាពគ្នា នៅត្រង់ឈ្មោះរបស់ប្រាសាទព្រះវិហារ។
បើតាមប្រសាសន៍របស់លោកទេសរដ្ឋមន្រ្តី ប្រទេសថៃចង់ប្រើឈ្មោះប្រាសាទ «ព្រះវិហារ ថាប្រាវិហាន» នៅក្នុងឯកសារចរចា។ ប្រទេសកម្ពុជាបានបដិសេធជាគោលការណ៍ ដោយទទួលស្គាល់តែឈ្មោះ «ព្រះវិហារ» ប៉ុណ្ណោះ។ លោកបានពន្យល់ថា «ឈ្មោះនេះត្រូវបានប្រើប្រាស់ នៅពេលប្រាសាទត្រូវបានចុះនៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ កាលពីថ្ងៃទី៧ ខែកក្កដា ឆ្នាំ២០០៨ និងនៅពេលតុលាការយុត្តិធម៌អន្តរជាតិទីក្រុងឡាអេ ប្រគល់ប្រាសាទនេះមកអោយប្រទេសកម្ពុជា [កាលពីថ្ងៃទី១៥ ខែមិថុនា ឆ្នាំ១៩៦២]»។ សមាជិកនៃគណៈកម្មាធិការចម្រុះនឹងជួបប្រជុំគ្នានៅថ្ងៃទី១១ ខែមេសាខាងមុខឡើងវិញ។
ទោះជាយ៉ាងណា លោកវ៉ា គឹមហុង បានអះអាងជាថ្មីថាភាគីទាំងពីរបានទទួលស្គាល់ភាពចាំបាច់នៃការដកកម្លាំងទ័ព នៅក្បែរប្រាសាទ និងវត្តកែវសិក្ខាគិរីស្វារៈ ដើម្បីធ្វើអោយការងារស្វែងរកបង្គោលព្រំដែនមានលក្ខណៈងាយស្រួល។
បញ្ហានៃការកែសម្រួលកម្លាំងកងទ័ពនៅវត្តកែវសិក្ខាគិរីស្វារៈ នឹងក្លាយជាកម្មវត្ថុនៃការចរចារវាងរដ្ឋមន្រ្តីក្រសួងការពារជាតិកម្ពុជា និងថៃ ដែលត្រូវជួបប្រជុំនៅប្រទេសកម្ពុជា នៅថ្ងៃទី៦ ខែកុម្ភៈនេះ។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
