| កម្ពុជា-ថៃៈ សហប្រតិបត្តិការជុំវិញព្រំដែនមានដំណើរទៅមុខល្អ |
| ដោយ ដួង សុខា | |
| ០៦-០២-២០០៩ |
ដូចតាមការគ្រោងទុក រដ្ឋមន្រ្តីក្រសួងការពារជាតិថៃថ្មី លោក ប្រាវីត វង្សសុវណ្ណ បានដឹកនាំប្រតិភូមួយក្រុម មកបំពេញទស្សនកិច្ចនៅទីក្រុងភ្នំពេញ នៅថ្ងៃសុក្រ ទី៦ ខែកុម្ភៈនេះ។ លោកបានជួបជាមួយលោកទៀ បាញ់ រដ្ឋមន្រ្តីក្រសួងការពារជាតិនៃព្រះរាជាណាចក្រកម្ពុជា ដើម្បីពិភាក្សាអំពីបញ្ហាព្រំដែន ដែលបានប៉ះពាល់ដល់ទំនាក់ទំនងរវាងប្រទេសជាតិទាំងពីរ ចាប់តាំងពីខែកក្កដា ឆ្នាំ២០០៨មក។
នៅពេលបញ្ចប់ការពិភាក្សាការទូតមួយជាមួយសម្តេចនាយករដ្ឋមន្រ្តីហ៊ុន សែន រដ្ឋមន្រ្តីការពារថៃ ដែលអមដំណើរដោយមេបញ្ជាការកងទ័ពជើងគោក ជើងអាកាស និងកងទ័ពជើងទឹកនៃប្រទេសថៃរូបនេះមិនបានធ្វើសេចក្តីអធិប្បាយប្រាប់ដល់អ្នកយកព័ត៌មាន ដែលនៅរង់ចាំនោះទេ។
យ៉ាងណាមិញ សម្តេចប្រមុខរដ្ឋាភិបាលកម្ពុជាបានពន្យល់ថា «ទស្សនកិច្ចដ៏សំខាន់នេះ» គឺសំដៅធ្វើអោយមានការយោគយល់គ្នាទៅវិញទៅមក និងពង្រឹងសហប្រតិបត្តិការរវាងប្រទេសកម្ពុជានិងប្រទេសថៃ។ សម្តេចបានប្រកាសថា «យើងបានផ្តល់អនុសាសន៍អោយភាគីទាំងសងខាង ជាពិសេសទាហានប្រចាំការនៅខ្សែត្រៀមជួរមុខ អោយជួបពិភាក្សាគ្នាជាប្រចាំ និងសហការគ្នាអោយបានល្អ ដើម្បីកាត់បន្ថយភាពតានតឹង និងជៀសវាងការប៉ះទង្គិច រឺប្រឈមមុខដាក់គ្នាដោយអាវុធ»។
សម្តេចបានលើកឡើងម្តងទៀតថាភាគីទាំងពីរបានឯកភាពគ្នា ដកកម្លាំងទាហានដែលប្រចាំការនៅជុំវិញវត្តកែវសិក្ខាគិរីស្វារៈ បន្ទាប់ពីមានកិច្ចប្រជុំមួយនៃគណៈកម្មាធិការចម្រុះព្រំដែនខ្មែរ-ថៃ នាទីក្រុងបាងកក កាលពីថ្ងៃទី៣ និងទី៤ ខែកុម្ភៈកន្លងទៅនេះ។
ទន្ទឹមនឹងនេះ ក្រុមការងារមួយត្រូវបានបង្កើតឡើង ដើម្បីរៀបចំប្រតិបត្តិការដោះមីន នៅតំបន់ជម្លោះ ដើម្បីជួយសម្រួលដល់ការងារបោះបង្គោលព្រំដែន។
សម្តេចមានប្រសាសន៍ទាំងរីករាយថា «ខ្ញុំគិតថា តំបន់នេះនឹងលែងជាតំបន់ប្រឈមមុខខាងយោធាដូចមុនទៀតហើយ។ ថ្ងៃអនាគត តំបន់នេះអាចនឹងក្លាយជាកន្លែងកំសាន្តរបស់ប្រជាពលរដ្ឋ»។
ដោយឡែក សម្តេចនាយករដ្ឋមន្រ្តីក៏បានបញ្ជាក់ថាសម្តេចបានអញ្ជើញនាយករដ្ឋមន្រ្តីថៃ គឺលោក Abhisit Vejjajiva មកបំពេញទស្សនកិច្ចនៅប្រទេសកម្ពុជា «នៅក្នុងកាលបរិច្ឆេទដ៏សមគួរមួយ»។ សម្តេចបានអះអាងជាថ្មីថាសម្តេចនឹងចូលរួមកិច្ចប្រជុំកំពូលអាស៊ានលើកទី១៤ ដែលរៀបចំធ្វើឡើងនៅប្រទេសថៃ នាថ្ងៃទី២៧ ខែកុម្ភៈ ដល់ថ្ងៃទី១ ខែមីនាខាងមុខនេះ។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
