|
អធិប្បាយចុងក្រោយ
|
| ប្រទេសកម្ពុជាដាក់ចេញនយោបាយរូបិយវត្ថុ ដើម្បីជម្រុញអោយវិស័យអចលនទ្រព្យងើបឡើងវិញ |
| ដោយ រស់ ឌីណា | | | ១៣-០២-២០០៩ |  ស្រះព្រៃ (កំពង់ឆ្នាំង កម្ពុជា) ថ្ងៃទី១៦ ឧសភា ២០០៧៖ ការដ្ឋានសំណង់ នៅពេលសំរាក © ចន វីង / Magnum នាថ្ងៃទី២៣ ខែមករា ឆ្នាំ២០០៩ ធនាគារជាតិនៃកម្ពុជាបានធ្វើការកែសម្រួលនយោបាយរូបិយវត្ថុជាថ្មី ដោយបានកាត់បន្ថយអត្រាប្រាក់បំរុងកាតព្វកិច្ចពី១៦% មកត្រឹម១២% និងនិរាករណ៍សារាចរណែនាំស្តីពីពិដានឥណទានលើវិស័យអចលនទ្រព្យ។ វិធានការទាំងពីរនេះត្រូវបានចូលជាធរមានចាប់តាំងពីថ្ងៃទី១ ខែកុម្ភៈ ដើម្បីទប់ស្កាត់វិបត្តិហិរញ្ញវត្ថុអន្តរជាតិ និងការធ្លាក់ចុះនៃវិស័យសំណង់។ ពាណិជ្ជករនៃវិស័យអចលនទ្រព្យ និងធនាគារផ្សេងៗបានទះដៃអបអរសាទរ ប៉ុន្តែអ្នកសេដ្ឋកិច្ចមួយចំនួនមានការប្រុងប្រយ័ត្នចំពោះការផ្លាស់ប្តូរនាថ្ងៃខាងមុខ។ ជួយសង្គ្រោះវិស័យអចលនវត្ថុ
លោកជា ចាន់តូ ទេសាភិបាលធនាគារជាតិនៃកម្ពុជាបានបញ្ជាអោយលុបចោលពិដានឥណទានលើវិស័យអចលនទ្រព្យ ដែលកន្លងមកមានកំរិត១៥%នៃសំពាធឥណទាននៃគ្រឹះស្ថានធនាគារនីមួយៗ។ លោកផាន ហូ អគ្គនាយករងធនាគារជាតិនៃកម្ពុជាបានពន្យល់ថា គោលបំណងគឺអនុញ្ញាតអោយធនាគារ ធ្វើការផ្តល់ឥណទានគ្មានកំណត់សម្រាប់វិស័យនេះ ដើម្បីផ្តល់ទំនុកចិត្តជាថ្មីដល់ប្រជាជនកម្ពុជា ដែលមានការរុញរាភ្លាមៗ ក្នុងការបន្តរកស៊ីជួញដូរដីធ្លី នៅក្នុងកាលៈទេសៈមិនច្បាស់លាស់នេះ។
នៅក្នុងវេទិកាសេដ្ឋកិច្ចលើកទី៣ ដែលរៀបចំធ្វើឡើងនាទីក្រុងភ្នំពេញ កាលពីថ្ងៃទី៥ ខែកុម្ភៈ ឆ្នាំ២០០៩ សម្តេចនាយករដ្ឋមន្រ្តីហ៊ុន សែនបានអះអាងអំពីការលុបចោលពិដានឥណទាននេះ ដោយបានធ្វើការកត់សម្គាល់ថា ធនាគារពាណិជ្ជសព្វថ្ងៃនេះ មានភាពចាស់ទុំគួរសម ទាក់ទិននឹងការគ្រប់គ្រងហានិភ័យនៅក្នុងវិស័យអចលនទ្រព្យ។ ម្យ៉ាងវិញទៀត ប្រសិនជាវិធានការទាំងនេះជួយជម្រុញអោយមានសន្ទុះកើនឡើងតាមការសង្ឃឹមទុកមែននោះ ប្រមុខរដ្ឋាភិបាលសន្យាថានឹងកាត់បន្ថយអត្រាប្រាក់បំរុងកាតព្វកិច្ចធនាគារបន្ថែមទៀត។ ដោយឡែក លោកផាន ហូ បានគូសបញ្ជាក់ថាការកាត់បន្ថយនេះមកពីការធូរស្រាលនៃការធ្លាក់ចុះតម្លៃទំនិញ។ បើតាមប្រសាសន៍របស់លោក អត្រាអតិផរណាបច្ចុប្បន្នមានកំរិតប្រហែលពី៥ទៅ៦% ទល់នឹង២៥ ទោ២៦% កាលពីឆ្នាំកន្លងទៅ។ លោកបានរម្លឹកថា កាលពីមុន អត្រាប្រាក់បំរុងកាតព្វកិច្ចត្រូវបានកំណត់៨% ប៉ុន្តែក្រោយមក អាជ្ញាធរកម្ពុជាបានសម្រេចតំឡើងរហូតដល់១៦% ដើម្បីឆ្លើយតបទៅនឹងអតិផរណាយ៉ាងគំហុកទៅលើតម្លៃទំនិញ ជាពិសេសទៅលើអចលនទ្រព្យ។ អគ្គនាយករងធនាគារជាតិនៃកម្ពុជារូបនេះបានសំដែងសេចក្តីសោមនស្សរីករាយថា «យើងទប់វាបានជោគជ័យហើយ លើស្ថានការណ៍នេះ និងទប់ស្កាត់រាល់ផលប៉ះពាល់អាក្រក់ផ្សេងៗ នៃវិបត្តិពិភពលោកលើវិស័យអចលនទ្រព្យនៅកម្ពុជា»។
អ្នកពាក់ព័ន្ធនៅក្នុងវិស័យនេះមានសុទិដ្ឋិនិយម
លោកសឹង ប៊ុណ្ណា ប្រធានសមាគមភ្នាក់ងារអចលនទ្រព្យកម្ពុជា និងជានាយកក្រុមហ៊ុន ប៊ុណ្ណា រៀលធីគ្រុប (Bunna Realty Group) យល់ឃើញថាវិធានការរបស់ធនាគារជាតិនៃកម្ពុជានាពេលថ្មីៗនេះ គឺជា «សញ្ញាល្អ» មួយសម្រាប់វិស័យអចលនវត្ថុ ព្រោះវិធានការទាំងនេះនឹងជួយជម្រុញអោយវិស័យនេះមានសន្ទុះងើបឡើងវិញ។ លោកបានវាយតម្លៃថា «សព្វថ្ងៃនេះ ប្រជាពលរដ្ឋ ក៏ដូចជាអ្នកវិនិយោគទុន ទាំងក្នុងស្រុក និងក្រៅស្រុក យកក្តីសង្ឃឹមទាំងអស់របស់ខ្លួន ទុកនៅក្នុងវិស័យនេះ»។ លោកបានព្រមានថាវិធានការទាំងនេះនឹងមិនអាចធ្វើអោយតម្លៃដីធ្លីឡើងថ្លៃភ្លាមៗសាជាថ្មី ដូចកាលពីឆ្នាំ២០០៨កន្លងទៅនោះទេ។ លោកបានលើកឡើងថា «ចាប់តាំងពីពាក់កណ្តាលឆ្នាំមុននេះ យ៉ាងហោចណាស់១០%នៃក្រុមហ៊ុនអចលនវត្ថុចំនួន៧០០ នៅកម្ពុជា ត្រូវបង្ខំចិត្តបិទទ្វារ»។
ធនាគារភាគច្រើន គឺជាអ្នកឈ្នះ
ធនាគារពាណិជ្ជនានាក៏បានសាទរយ៉ាងកក់ក្តៅផងដែរ ចំពោះការផ្លាស់ប្តូរនយោបាយរូបិយវត្ថុនៅកម្ពុជា។ យោងតាមធនាគារជាតិនៃកម្ពុជា ព្រះរាជាណាចក្រកម្ពុជាសព្វថ្ងៃមានធនាគារពាណិជ្ជចំនួន២៥ ធនាគារឯកទេសចំនួន៦ និងស្ថាប័នមីក្រូហិរញ្ញវត្ថុមានចំនួន៤២ ដែលក្នុងនោះមានស្ថាប័នត្រឹមតែ១៦ប៉ុណ្ណោះ ដែលត្រូវបានចុះបញ្ជីជាផ្លូវការ។
លោកពុង ឃាវសែ អគ្គនាយកធនាគារកាណាឌីណា បានប្រកាសទៅកាន់បុគ្គលិករបស់ខ្លួន នៅក្នុងពិធីផ្សព្វផ្សាយរបាយការណ៍បូកសរុបប្រចាំឆ្នាំរបស់ធនាគារ កាលពីចុងខែមករាថា នេះគឺជាឱកាស ក្នុងការជម្រុញអោយសាខាថ្មី ដែលត្រូវបានបើកដំណើរការកាលពីឆ្នាំ២០០៨ នៅតាមបណ្តាខេត្តនានា មានសន្ទុះឡើងវិញ។ លោកបានគូសបញ្ជាក់ថា «ការកាត់បន្ថយអត្រាប្រាក់បំរុងកាតព្វកិច្ចចំនួន៤% អនុញ្ញាតអោយយើងបញ្ចេញប្រាក់១៩០លានដុល្លារចូលទៅក្នុងទីផ្សារ ដើម្បីជួយជម្រុញកំណើនសេដ្ឋកិច្ចឡើងវិញ ព្រោះធនាគាររបស់យើងនឹងអាចប្រើប្រាស់ថវិកានេះ ដើម្បីផ្តល់ឥណទានបន្ថែម ជាពិសេស អោយទៅក្រុមហ៊ុននិងសិប្បករ ដែលត្រូវការដើមទុន»។
ទោះជាយ៉ាងណា ធនាគារទាំងអស់់មិនមែនសុទ្ធតែនិយាយថាបានទទួលអត្ថប្រយោជន៍ពី «កាដូ»នេះឡើយ។ តួយ៉ាង នៅធនាគារអេស៊ីលីដា គេមិនសូវចាប់អារម្មណ៍នឹងវិធានការកាត់បន្ថយនេះនោះទេ។ លោកអ៊ិន ចន្នី នាយកធនាគារអេស៊ីលីដា បានពន្យល់ថាស្ថាប័នរបស់លោកយល់ព្រមផ្តល់ឥណទានអចលនទ្រព្យអោយតែបុគ្គលណាដែលត្រូវការទិញផ្ទះសម្រាប់នៅ តែប៉ុណ្ណោះ។ តួយ៉ាង នៅចុងឆ្នាំ២០០៨ ៨%នៃប្រាក់កំចីសរុបធនាគារ គឺជាឥណទានអចលនទ្រព្យ ដែលមានទឹកប្រាក់៤០លានដុល្លារ។ លោកប្រធានបានសន្និដ្ឋានថា «ឥណទានអចលនទ្រព្យមិនមែនជាអាទិភាពរបស់យើងនោះទេ។ យើងបានបង្វិលប្រាក់កំចីអោយទៅសហគ្រាសធុនតូចនិងមធ្យម ដែលមានរយៈពេលខ្លី ពីមួយឆ្នាំទៅបីឆ្នាំ។ វិបត្តិអចលនទ្រព្យមិនបានជះឥទ្ធិពលមកលើយើងឡើយ!»។
ហានិភ័យ ដែលមិនត្រូវធ្វេសប្រហែស
ទោះយ៉ាងណា លោកកង ច័ន្ទដារ៉ារ័ត្ន ប្រធានវិទ្យាស្ថានសិក្សាអភិវឌ្ឍន៍កម្ពុជា បានព្រមានថាការដែលធនាគារអោយលុយខ្ចីធូរស្រាលជាងមុន គឺជាកាំបិតមុខពីរ។ អ្នកសេដ្ឋកិច្ចរូបនេះព្រួយបារម្ភថា «ការផ្តល់ភាពងាយស្រួលដល់ការខ្ចីប្រាក់ធនាគារសម្រាប់ក្រុមហ៊ុនសំណង់បង្កអោយអ្នកដែលមានគម្រោងកំពុងតែរាំងស្ទះ អាចធ្វើអោយគម្រោងរបស់គេបានដល់ត្រើយ។ ប៉ុន្តែ សាច់រឿង នៅត្រង់ថាតើវានឹងក្លាយទៅជាយ៉ាងដូចម្តេច នៅពេលគម្រោងរបស់ពួកគេបញ្ចប់ ប្រសិនជាពួកគេមិនអាចស្វែងរកអ្នកទិញបាន។ នេះគឺជាល្បែងគ្រោះថ្នាក់នៅត្រង់ថាធ្វើអោយមនុស្សដែលជំពាក់បំណុលតិច ទៅជាជំពាក់បំណុលច្រើន ហើយកាន់តែលង់ខ្លួនទៅ...»។
ជាគោលការណ៍ ការគ្មានអតិថិជននៅក្នុងវិស័យអចលនទ្រព្យត្រូវបានកំណត់ដោយវិបត្តិសេដ្ឋកិច្ចពិភពលោក តាមរយៈការធ្លាក់ចុះផលចំណូលបានមកពីការនាំចេញ ដោយសារការធ្លាក់ចុះតម្លៃទំនិញ និងតាមរយៈភាពជាប់គាំងនៃលំហូរប្រាក់វិនិយោគទុនបរទេស។ លោកសឹង ប៉ុណ្ណា បានវាយតម្លៃថា ចាប់តាំងពីពាក់កណ្តាលឆ្នាំ២០០៨ មកទល់សព្វថ្ងៃនេះ វិស័យអចលនទ្រព្យនៅកម្ពុជាបានធ្លាក់ចុះពី២០ ទៅ៣០% តាមតំបន់។ លោកបានលើកឧទាហរណ៍ជាក់ស្តែងថា ដីមួយកន្លែង ស្ថិតនៅតាមមហាវិថីមុនីវង្ស ដែលធ្លាប់មានតម្លៃពី៤ពាន់ ទៅ៥ពាន់ដុល្លារ ក្នុងមួយម៉ែត្រការ៉េ ឥឡូវនៅសល់ត្រឹមតែ៣ ០០០ ទៅ៣ ៥០០ ដុល្លារប៉ុណ្ណោះ ក្នុងមួយម៉ែត្រការ៉េ។
នយោបាយរូបិយវត្ថុ គឺជាចម្លើយឆ្លើយតបទៅនឹងវិបត្តិ
លោកកង ច័ន្ទដារ៉ារ័ត្ន បានបន្ថែមថា ការចាត់វិធានការនេះនឹងមិនគ្រប់គ្រាន់ ក្នុងការជួយសង្គ្រោះទីផ្សារអចលនទ្រព្យនោះទេ។ អ្នកសេដ្ឋកិច្ចរូបនេះបានផ្តល់អនុសាសន៍ថា «ដើម្បីសម្រេចជាលទ្ធផលល្អ គេត្រូវចាត់វិធានការបន្ថែមផ្សេងទៀត ដូចជាកាត់បន្ថយពន្ធអាករ រឺ វិធានការតំរែតម្រង់ផ្សេងទៀត ដើម្បីជម្រុញពាណិជ្ជកម្មនិងឧស្សាហកម្មក្នុងស្រុក។ សរុបមក គេមិនត្រូវធ្វើអោយអ្នកខ្ចីប្រឈមនឹងហានិភ័យខ្ពស់នោះទេ! ហើយ ប្រសិនជាមានផែនការដំណើរការសេដ្ឋកិច្ចជាក់លាក់ ទីផ្សារអចលនទ្រព្យនឹងងើបឡើងវិញ ចាប់ពីឆ្នាំ២០១១។ ប៉ុន្តែ កត្តាទាំងនេះចាំបាច់ត្រូវប្រើប្រាស់ជំនួយដែលបានមកពីប្រទេសផ្តល់ជំនួយ អោយបានត្រឹមត្រូវ។ ដូច្នោះ នយោបាយរូបិយវត្ថុនឹងទទួលបានផ្លែផ្កាជាក់ជាមិនខាន»។
អានបន្ថែមលើកាសែត
 -ផលវិបាកនៃការទិញដីទុកលក់ និងវិបត្តិសេដ្ឋកិច្ចធ្វើអោយអាជីវករខ្មែរពិបាក (០៩-០១-២០០៩)
-ដំណើរបញ្ច្រាសទិស និងភាពស្រពិចស្រពិលនៃវិស័យអចលនទ្រព្យនៅកម្ពុជា (០៣-១១-២០០៨)
-ការធ្លាក់ចុះនៃវិស័យជំនួញអចលនទ្រព្យនៅកម្ពុជា (២៧-០៥-២០០៨)
|
|
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
