| អាជ្ញាធរថៃសុំទោសចំពោះការបាញ់គ្រាប់ផ្លោងចូលទឹកដីកម្ពុជា |
| ដោយ ដួង សុខា | |
| ១៩-០២-២០០៩ |
យោងតាមការប្រកាសរបស់លោកកុយ គួង អ្នកនាំពាក្យនិងជាអនុរដ្ឋលេខាធិការក្រសួងការបរទេស បានអោយដឹងថា មេបញ្ជាការយោធាភូមិភាគទី២នៃប្រទេសថៃបានធ្វើការសុំទោសជាលាយលក្ខណ៍អក្សរ នាថ្ងៃពុធ ទី១៨ ខែកុម្ភៈ ជូនចំពោះមេបញ្ជាការយោធាភូមិភាគទី៤នៃប្រទេសកម្ពុជា បន្ទាប់ពីប្រទេសថៃបានបាញ់គ្រាប់រ៉ុកកែតជាច្រើនគ្រាប់ កាលពីថ្ងៃអង្គារ ទី១៧ កុម្ភៈ មកលើទឹកដីកម្ពុជា នៅត្រង់ចំណុចខេត្តឧត្តរមានជ័យ។ បន្ទាប់ពីបានទទួលលិខិតចម្លងមួយច្បាប់ជាភាសាថៃ របស់មេបញ្ជាការយោធាថៃរូបនោះ មន្រ្តីជាន់ខ្ពស់កម្ពុជារូបនេះបានបញ្ជាក់អោយដឹងថា «គាត់ [មេបញ្ជាការយោធាថៃ] បានអះអាងថានេះគ្រាន់តែជាកំហុសឆ្គងផ្នែកបច្ចេកទេស និងជារឿងអចេតនា។ គាត់បានសន្យាចំពោះយើងថាបញ្ហាបែបនេះមិនកើតមានជាថ្មីម្តងទៀតនោះទេ»។
ម្យ៉ាងវិញទៀត លោកកុយ គួង បានរម្លឹកថា ភាគីថៃបានផ្តល់ព័ត៌មានជាមុនដល់អាជ្ញាធរកម្ពុជា អំពីសមយុទ្ធយោធាប្រចាំឆ្នាំ ដែលរៀបចំធ្វើឡើងនៅខេត្តសុរិន្ទ ប្រទេសថៃ ជាប់នឹងព្រំប្រទល់ខេត្តឧត្តរមានជ័យ។ បើតាមប្រសាសន៍របស់លោក នៅចំណោមគ្រាប់ផ្លោងចំនួនពី៨ ទៅ១១ គ្រាប់ ដែលបានបាញ់មកលើទឹកដីកម្ពុជា មានគ្រាប់ជាងពាក់កណ្តាលបានផ្ទុះ ប្រមាណជាង២គីឡូម៉ែត្រពីព្រំដែន។
សារព័ត៌មានប្រចាំថ្ងៃជាច្រើននៅប្រទេសកម្ពុជាបានអោយដឹងថា យោងតាមប្រភពពីមន្រ្តីយោធាកម្ពុជា គ្រាប់ផ្លោងទាំងនេះបានផ្ទុះនៅជិតប្រាសាទតាក្របី នាខេត្តឧត្តរមានជួយ។ ប្រាសាទនេះក៏ជាកម្មវត្ថុនៃជម្លោះទឹកដីរវាងប្រទេសទាំងពីរ ដូចជាតំបន់ប្រាសាទព្រះវិហារផងដែរ។
លោកកុយ គួង បានបន្ថែមទៀតថា ប្រតិភូមួយក្រុមរបស់រដ្ឋាភិបាលថៃ [សមាសភាពមិនត្រូវបានបញ្ជាក់] នឹងធ្វើដំណើរមកកាន់ប្រទេសកម្ពុជា នៅថ្ងៃសុក្រ ទី២០ ខែកុម្ភៈ ដើម្បីជួបជាមួយសម្តេចហ៊ុន សែន នាយករដ្ឋមន្រ្តីកម្ពុជា នៅក្រោយបញ្ចប់កិច្ចប្រជុំទីស្តីការគណៈរដ្ឋមន្រ្តី និងដើម្បីសំដែងការសុំទោស និងពន្យល់ហេតុផលរបស់ភាគីថៃ។
អ្នកនាំពាក្យកម្ពុជារូបនេះមានប្រសាសន៍ថា «លោកមិនបានដឹងថាតើបញ្ហាជម្លោះព្រំដែនទាក់ទងនឹងប្រាសាទព្រះវិហារ រវាងប្រទេសកម្ពុជានិងប្រទេសថៃ ដែលកើតមានចាប់តាំងពីខែកក្កដា ឆ្នាំ២០០៨ នឹងត្រូវលើកយកមកពិភាក្សានៅជំនួបនេះដែរឬអត់នោះទេ»។
អានបន្ថែមលើកាសែត
 បទយកការណ៍រូបថតនិងសម្លេង ស្តីពីជម្លោះព្រំដែនរវាងប្រទេសកម្ពុជា និងប្រទេសថៃ
-ប្រាសាទព្រះវិហារ ៖ បច្ចុប្បន្នភាព ការវិភាគ បទយកការណ៍ និងបទយការណ៍រូបថតជាសម្លេង របស់ការិយាល័យនិពន្ធ កាសែត ជុំវិញជម្លោះព្រំដែនរវាងប្រទេសកម្ពុជានិងប្រទេសថៃ
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
