|
អធិប្បាយចុងក្រោយ
|
| អតីតរដ្ឋមន្រ្តីសង្គមកិច្ចសម័យប៉ុល ពត ចោទប្រកាន់នួន ជា បងធំទី២ នៅកណ្តាលសវនាការ |
| ដោយ ស្ទេហ្វានី ហ្សេ | | | ២៥-០២-២០០៩ |  កំបូល (ភ្នំពេញ កម្ពុជា) ថ្ងៃទី២៤ កុម្ភៈ ២០០៩៖ អៀង ធីរិទ្ធិ នៅចំពោះមុខចៅក្រមនៃអង្គបុរេជំនុំជម្រះ © ចន វីង / Magnum
អង្គបុរេជំនុំជម្រះនៃសាលាក្តីខ្មែរក្រហមបានបើកសវនាការ នាថ្ងៃអង្គារ ទី២៤ ខែកុម្ភៈ លើបណ្តឹងឧទ្ធរណ៍របស់អៀង ធីរិទ្ធិ ប្រឆាំងនឹងដីកាឃុំខ្លួនបណ្តោះអាសន្នរបស់គាត់។ ការជជែកពិភាក្សាក្រៅរបៀបវារៈនៃសវនាការត្រូវបានធ្វើឡើងដោយមិនបានព្រាងទុក ខណៈពេល អ្នកស្រីអៀង ធីរិទ្ធិ ភរិយារបស់លោកអៀង សារី [អតីតរដ្ឋមន្រ្តីការបរទេសនៃរបបកម្ពុជាប្រជាធិបតេយ្យ ដែលត្រូវជាប់ឃុំឃាំងបណ្តោះអាសន្ន និងទើបតែចូលមន្ទីរពេទ្យសាជាថ្មី] បានជជែកតវ៉ាអំពីភាពគ្មានទោសពៃរ៍របស់ខ្លួន នៅពេលចុងសវនាការ។ អ្នកស្រីបានឆ្លៀតឱកាសនោះ ដើម្បីទម្លាក់កំហុសទៅលើនួន ជា អោយទទួលខុសត្រូវលើឧក្រិដ្ឋកម្ម ដែលត្រូវបានកើតឡើងចាប់ពីឆ្នាំ១៩៧៥ ដល់ឆ្នាំ១៩៧៩ និងបាននិយាយប៉ះពាល់ដល់ឌុច។ អៀង ធីរិទ្ធិ និងមន្ទីរស២១
លោក Belge Vincent De Wilde ព្រះរាជអាជ្ញាជំនួស បានបញ្ជេះកំហឹងរបស់អៀង ធីរិទ្ធិ។ លោកបានលើកឡើងអំពីសារៈសំខាន់នៃសក្ខីកម្មដោះបន្ទុករបស់ឌុច ដែលជាអតីតប្រធានមន្ទីរឃុំឃាំងស-២១។ បើតាមចម្លើយដោះបន្ទុកនេះ សមាជិកក្រសួងសង្គមកិច្ចប្រមាណជាង១០០នាក់ ដែលស្ថិតក្រោមការគ្រប់គ្រងរបស់អៀង ធីរិទ្ធិ ត្រូវបានបញ្ជូនទៅក្នុងមន្ទីរសួរចម្លើយដ៏ព្រៃផ្សៃមួយនេះ ដូចមានបញ្ជាក់នៅក្នុងបញ្ជីឈ្មោះជនរងគ្រោះដែលប្រមូលបាននៅមន្ទីរស-២១។ ម្យ៉ាងទៀត សក្ខីកម្មមួយដែលបានទទួលបានបញ្ជាក់ថាការសារភាពរបស់ពួកគេត្រូវបានធ្វើឡើងក្រោមការធ្វើទារុណកម្ម ហើយត្រូវបានផ្តល់ព័ត៌មានប្រាប់អៀង ធីរិទ្ធិ មានន័យថាគាត់មិនមែនមិនដឹងពីអ្វីដែលបានកើតឡើងនៅក្នុងពន្ធនាគារ ដែលមានអ្នកទោសត្រឹមតែប៉ុន្មាននាក់ប៉ុណ្ណោះ ដែលអាចរត់គេចផុតពីសេចក្តីស្លាប់បាននោះទេ។
បន្ទាប់មក លោកព្រះរាជអាជ្ញាបានបើករង្វង់ក្រចកអំពីបុគ្គលិកលក្ខណៈរបស់អៀង ធីរិទ្ធិ ដោយបញ្ជាក់ថា នៅក្នុងសវនការអសាធារណៈមួយ នៅចំពោះមុខអង្គបុរេជំនុំជម្រះ កាលពីខែឧសភា ឆ្នាំ២០០៨ គាត់បានទទួលការព្រមានមួយពីចៅក្រម ពីបទរំខានសវនាការជាច្រើនលើក និងបាននិយាយបែបគំរាមកំហែង ទៅកាន់អយ្យការ និងដើមបណ្តឹងរដ្ឋប្បវេណី។ «គាត់មិនអាចទ្រាំប្រឈមមុខនឹងអតីតកាលរបស់គាត់ ហើយបានបង្ហាញឆន្ទៈដាក់គំនាបទៅលើអយ្យការ និងដើមបណ្តឹងរដ្ឋប្បវេណី។ នេះគឺជាចរិតដើមរបស់គាត់!»។ សំដីទាំងនេះគ្រប់គ្រាន់ដុតកំហឹងអៀង ធីរិទ្ធិ។ គាត់ក៏បានឈប់ស្តាំការពិភាក្សា ដោយយកកាសសម្រាប់ស្តាប់ការសន្ទនាជាភាសាខ្មែរ ចេញពីត្រចៀករបស់គាត់។
«ខ្ញុំដឹងអ្នកណាសម្លាប់មនុស្ស!»
ដោយខឹងច្រឡោត គាត់ក៏បានឡើងនិយាយ ជាភាសាខ្មែរ ដើម្បីប្រកាសថា គាត់មិនមានទំនាក់ទំនងណាមួយ ជាមួយឌុចឡើយ [គាត់មិនប្រើឈ្មោះឌុច ទេ គាត់ប្រើតែឈ្មោះពិតប្រាកដរបស់ឌុច គឺកាំង ហ្គិចអ៊ាវ]។ បើតាមអតីតរដ្ឋមន្រ្តីខ្មែរក្រហមរូបនេះ ការអះអាងខុសពីការពិត គឺជា «រឿងខុសច្បាប់»។ «ខ្ញុំដឹងច្បាស់ថាមានមនុស្សត្រូវគេសម្លាប់ ហើយខ្ញុំដឹងអ្នកដែលបានសម្លាប់មនុស្ស!»។ បន្ទាប់មក គាត់ក៏បានរម្លឹកថា ពេលគាត់ត្រឡប់មកដល់ប្រទេសកម្ពុជាវិញ ជាមួយសិស្សនិស្សិតមួយចំនួន ពោលគឺក្រោយពេលខ្មែរក្រហមឡើងកាន់អំណាច និស្សិតទាំងនោះត្រូវបានខ្មែរក្រហម «ចាប់ខ្លួន និងសម្លាប់ចោល» ក្រោមការបញ្ជារបស់នួន ជា»។ អ្នកស្រីបានបរិហារទៀតថា ក្រោយមក និស្សិតទាំងនោះត្រូវបាន «បញ្ជូន» ទៅអោយឌុច។
«ខ្ញុំមកពីត្រកូលត្រឹមត្រូវ។ ខ្ញុំខឹងណាស់ ព្រោះខ្ញុំធ្វើគ្រប់យ៉ាងតាមលទ្ធភាពរបស់ខ្ញុំ ដើម្បីបម្រើជាតិ។ អ្វីគ្រប់យ៉ាងគឺជាកំហុសរបស់នួន ជា។ មិនត្រូវចោទប្រកាន់ខ្ញុំអោយជាប់ពាក់ព័ន្ធជាមួយប្រវត្តិសាស្រ្តនេះជាដាច់ខាត! វាអយុត្តិធម៌! គឺ គាត់ ដែលបានប្រព្រឹត្តកំហុសគ្រប់បែបយ៉ាង!»។ អ្នកស្រីបានអោយដឹងថា រថយន្តមួយគ្រឿងបានមកដឹកនិស្សិត គឺនៅពេលនោះហើយ ដែលគាត់ដឹងថា វាមិនមែនជាប្រតិភូមួយក្រុម ដែលមកទទួលពួកគេនោះទេ ប៉ុន្តែ គេមកយកនិស្សិតទាំងនោះទៅសម្លាប់ចោទ។ «កុំចោទប្រកាន់ខ្ញុំផ្តេសផ្តាស បើមិនដូច្នោះទេ ប្រយ័ត្នធ្លាក់នរក៧ជាន់!»។
លោកស្រី Katinka Lahuis ចៅក្រមអន្តរជាតិបានជម្រុញអោយអ្នកស្រីអៀង ធីរិទ្ធិនិយាយបន្តទៀត។ លោកស្រីចៅក្រមបានសុំអោយគេបើកសម្លេងមីក្រូហ្វូន។ អៀង ធីរិទ្ធិ មានបំណងធ្វើការបរិហារទៀត តែម្តងនេះ គាត់និយាយជាភាសាអង់គ្លេស បែបច្របូកច្របល់។ «មូលហេតុដែលខ្ញុំស្ថិតនៅទីនេះ គឺដើម្បីនិយាយការពិត ព្រោះខ្ញុំរង់ចាំអស់រយៈពេលជាច្រើនឆ្នាំមកហើយ ហើយក៏ព្រោះខ្ញុំត្រូវបានចោទប្រកាន់ បើទោះបីជាខ្ញុំមិនបានធ្វើ...[…]។ ខ្ញុំមិនធ្លាប់ស្គាល់កាំង ហ្គេចអ៊ាវ ពីមុនមកទេ ហើយខ្ញុំក៏មិនដែលបាននិយាយជាមួយគាត់ដែរ...»។
«ខ្ញុំមិនមែនជាឃាតកទេ»
ដោយបានធ្វើការប្រឆាំងទៅនឹងការចោទប្រកាន់មកលើរូបគាត់ អ្នកស្រីបានព្យាយាមបង្ហាញភាពសុចរិតរបស់ខ្លួន ដោយគូសបញ្ជាក់បន្ថែមទៀតថា នៅសម័យកាលនោះ មានតែ «គាត់ម្នាក់គត់» ដែលធ្វើដំណើរនៅទីក្រុងភ្នំពេញ «ដោយជិះកង់ដ៏កញ្ចាស់» មួយ ខណៈពេលដែលគាត់គឺជារដ្ឋមន្រ្តី។ «ខ្ញុំពិតជាមិនអាចអត់ធ្មត់បានឡើយ។ ខ្ញុំត្រូវបានគេចោទប្រកាន់យ៉ាងអយុត្តិធម៌។ ខ្ញុំសោកស្តាយដែលខ្ញុំជ្រុលនិយម ប៉ុន្តែ ខ្ញុំជាមនុស្សមានការអប់រំ ខ្ញុំមិនធ្លាប់ធ្វើអាក្រក់ ខ្ញុំមិនបានប្រព្រឹត្តបទឧក្រិដ្ឋនោះទេ! ឧក្រិដ្ឋជនពិតប្រាកដ គឺជាអ្នកដែលបានសម្លាប់មនុស្ស តើគេមានឈ្មោះអ្វីទៅ? ... បុរសដែលបានសម្លាប់មនុស្ស និងកំពុងជាប់ឃុំឃាំង... ខ្ញុំភ្លេចឈ្មោះរបស់គេម្នាក់នោះ... អ្នកដែលសម្លាប់មនុស្ស និងជាអ្នកទោស ...គឺកាំង ហ្គិចអ៊ាវ! ខ្ញុំមិនត្រូវជួបជាមួយគាត់ឡើយ! គាត់ និងនួន ជា គឺដូចតែគ្នា! នួន ជា ជាអ្នកបញ្ជាទៅកាំង ហ្គិចអ៊ាវ អោយសម្លាប់មនុស្ស។ ខ្ញុំនិយាយការពិត។ ខ្ញុំចង់អោយតុលាការផ្តល់យុត្តិធម៌! […] ខ្ញុំប្រាប់អស់លោកម្តងទៀតថាខ្ញុំមិនមែនជាឃាតកទេ!»។ អ្នកស្រីក៏បានលើកឡើងអំពីពូជពង្សវង្សត្រកូលដ៏ថ្លៃថ្នូររបស់ខ្លួនថា ជីតា គឺជានាយកសាលា ហើយឪពុកគឺជាសាស្រ្តាចារ្យ។ «គ្រួសាររបស់ខ្ញុំមានការអប់រំត្រឹមត្រូវ ហើយមិនដែលសម្លាប់មនុស្សទេ ប៉ុន្តែ ព្យាយាមបង្ហាត់បង្រៀននិស្សិតអោយបានល្អប្រសើរបំផុត...»។ ជាចុងក្រោយ អ្នកស្រីអៀង ធីរិទ្ធិ បានសន្និដ្ឋានថា «ខ្ញុំមិនស្គាល់កាំង ហ្គិចអ៊ាវ ប៉ុន្តែ ខ្ញុំស្អប់គាត់ជាខ្លាំង!» «ប្រសិនជាមានមនុស្សសាហាវឃោរឃៅនៅប្រទេសកម្ពុជា ពួកគេត្រូវតែទទួលរងការកាត់ទោស»...
|
|
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
