| មួរ សុខហួរ-ហ៊ុន សែនៈ នាយករដ្ឋមន្រ្តីថាខ្លួនជាជនរងគ្រោះ ខណៈពេលអង្គការក្រៅរដ្ឋាភិបាលរិះគន់ការគំរាមកំហែងរបស់សម្តេច |
| ដោយ ដួង សុខា និងឡូរ៉ង់ ឡឺហ្គូអង់វិក | |
| ២៩-០៤-២០០៩ |
 ភ្នំពេញ (កម្ពុជា) ថ្ងៃទី២៤ កញ្ញា ២០០៨៖ លោកស្រីមួរ សុខហួរ តំណាងរាស្រ្តមកពីគណបក្សសម រង្ស៊ី នៅក្នុងសន្និសីទសារព័ត៌មានមួយ របស់សម្តេចនាយករដ្ឋមន្រ្តីហ៊ុន សែន នាឱកាសបើកសម័យប្រជុំសភាលើកទី១ នីតិកាលទី៤ © ចន វីង/ Magnum នៅក្នុងសុន្ទរកថាមួយ នាថ្ងៃពុធ ទី ២៩ ខែមេសា នៅទីក្រុងភ្នំពេញ នាយករដ្ឋមន្រ្តីនៃព្រះរាជាណាចក្រកម្ពុជាបានប្រកាសថាសម្តេចគឺជាជនរងគ្រោះ នៅក្នុងរឿងក្តីក្ដាំជាមួយលោកស្រីមួរ សុខហួរ តំណាងរាស្រ្តមកពីគណបក្សសម រង្ស៊ី ដែលបានដាក់ពាក្យបណ្តឹងប្រឆាំងសម្តេច ពីបទបរិហារកេរ្តិ៍ និងជេរប្រមាថ។ សម្តេចបានរម្លឹកប្រាប់ដៃគូបដិបក្ខរបស់សម្តេចថាវាជាការងាយស្រួល ក្នុងការដកអភ័យឯកសិទ្ធិសភារបស់លោកស្រី ព្រោះថាតំណាងរាស្រ្តនៅក្នុងរដ្ឋសភា ភាគច្រើនជាសមាជិកគណបក្សប្រជាជនកម្ពុជា។ ដោយឡែក អង្គការសង្គមស៊ីវិលកម្ពុជាជាច្រើនមានប្រតិកម្មយ៉ាងខ្លាំង ដោយចោទប្រកាន់ថាសម្តេចប្រើអំណាចដាក់សំពាធ និងគំរាមកំហែងទៅលើដៃគូប្រឆាំង។ សម្តេចនាយករដ្ឋមន្រ្តីបានថ្លែងជាសាធារណៈនៅចំពោះមុខនិស្សិត ដែលទើបតែបញ្ចប់ការសិក្សាថា «ខ្ញុំគឺជាជនរងគ្រោះមួយរូប ដែលមានបំណងការពារខ្លួន ទៅតាមផ្លូវច្បាប់ និងចង់បានយុត្តិធម៌»។ ដោយអះអាងថាមិនបានវាយប្រហារដោយផ្ទាល់ទៅលោកស្រីមួរ សុខហួរ សម្តេចហ៊ុន សែនមានប្រសាសន៍ថាសម្តេចមិនបានជេរប្រមាថ«ស្រ្តីណាម្នាក់» នោះទេ។ សម្តេចបានអះអាងថា សំដីរបស់សម្តេច នៅខេត្តកំពត កាលពីដើមខែមេសា ទាក់ទងនឹងស្រ្តីម្នាក់ មានចរឹត «ញុះញង់» ដែល«ស្ទុះទៅអោបបុរសម្នាក់ រហូតដល់ដាច់ឡេវអាវ» គឺមិនមែនចង់សំដៅទៅលើអ្នកតំណាងរាស្រ្តស្រីរូបនេះទេ...
សម្តេចបានធ្វើការបកស្រាយបញ្ជាក់អំពីការដាក់ពាក្យបណ្តឹងរបស់សម្តេច ប្តឹងតំណាងរាស្រ្តស្រីមកពីគណបក្សប្រឆាំងរូបនេះថា «ថ្ងៃព្រហស្បតិ៍ [ទី២៣ មេសា] គាត់ [មួរ សុខហួរ]បានរៀបចំសន្និសីទសារព័ត៌មានមួយ [ទាក់ទងនឹងរឿងនេះ]។ ដូចនេះ ខ្ញុំមានភស្តុតាងគ្រប់គ្រាន់។ ខ្ញុំបានចុះហត្ថលេខា នៅថ្ងៃសុក្រ [២៤ មេសា] លើពាក្យបណ្តឹងមួយ [ប្តឹងលោកស្រីមួរ សុខហួរ] ពីបទបរិហារកេរ្តិ៍ មុនពេលចំណាត់ការនីតិវិធីរបស់តុលាការ [ដែលលោកស្រីមួរ សុខហួរ បានធ្វើ ដើម្បីប្តឹងសម្តេចហ៊ុន សែន]»។ សម្តេចបានបញ្ជាក់ថាសម្តេចក៏ប្តឹងលោកគង់ សំអុន មេធាវីរបស់លោកស្រីមួរ សុខហួរផងដែរ ព្រោះគាត់ស្ថិតនៅក្បែរកូនក្តីរបស់គាត់ នៅពេលសន្និសីទសារព័ត៌មាននោះ។ សម្តេចបានទាមទារអោយអ្នកទាំងពីរ ក្នុងម្នាក់ សងជំងឺចិត្ត ១០លានរៀល (២ ៥០០ដុល្លារ)។ សម្តេចបានប្រកាសថា សម្តេចនឹងប្រគល់ថវិកាទាំងនេះអោយទៅកុមារកំព្រា។
សម្តេចក៏បានអះអាងផងដែរថា ប្រសិនជាតុលាការស្នើសុំព្យួរអភ័យឯកសិទ្ធិសភារបស់សម្តេច សម្តេចត្រៀមទទួលយកតាមសំណើនេះ។ សម្តេចបានបញ្ជាក់ថានីតិវិធីបែបនេះមកលើរូបសម្តេច ប្រហែលជាមានសង្ឃឹមតិចតួច។ សម្តេចហ៊ានភ្នាល់ដោយភាពជឿជាក់ថា «ខ្ញុំមិនជឿថាតំណាងរាស្រ្តមកពីគណបក្សប្រជាជនកម្ពុជា [មានអាសនៈនៅក្នុងរដ្ឋសភាចំនួន៩០ ក្នុងចំណោម១២៣អាសនៈ] នឹងបោះឆ្នោតដោយលើកដៃ ព្យួរអភ័យឯកសិទ្ធិរបស់ខ្ញុំទេ។ ក៏ដូចជាលោកជំទាវ ម៉ែន សំអូន [ឧបនាយករដ្ឋមន្រ្តីមកពីគណបក្សប្រជាជនកម្ពុជា] គាត់នឹងមិនលើកដៃព្យួរអភ័យឯកសិទ្ធិខ្ញុំទេ»។ ផ្ទុយទៅវិញ សម្តេចក៏មិនភ្លេចលើកឡើងទៀតថាប្រសិនជាតុលាការស្នើសុំព្យួរអភ័យឯកសិទ្ធិសភារបស់លោកស្រីមួរ សុខហួរវិញ វាគឺជារឿងងាយស្រួលដូចបកចេកស្ងោរ ព្រោះការបោះឆ្នោតយកសម្លេង២ភាគបីនៃតំណាងរាស្រ្តមានគ្រប់គ្រាន់។
ដោយឡែក នៅមុនការថ្លែងសុន្ទរកថាចុងក្រោយរបស់ប្រមុខរដ្ឋាភិបាល អង្គការការពារសិទ្ធិមនុស្ស និងសង្កេតការណ៍នយោបាយជាច្រើនបានបញ្ចេញប្រតិកម្មយ៉ាងខ្លាំងទៅនឹងការគំរាមកំហែងដកអភ័យឯកសិទ្ធិសភារបស់តំណាងរាស្រ្តស្រ្តីមកពីគណបក្សសម រង្ស៊ី ។
លោកអ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាបានធ្វើការបរិហារនៅក្នុងសេចក្តីប្រកាសព័ត៌មានមួយ ចុះថ្ងៃទី២៩ ខែមេសា និងដែលត្រូវបានចុះហត្ថលេខារួមដោយអង្គការក្នុងស្រុកចំនួន៩ ថា «ការគំរាមកំហែងព្យួរអភ័យឯកសិទ្ធិសភារបស់លោកស្រី មួរ សុខហួរ ដោយមិនមានភស្តុតាងណាមួយ ទាក់ទងនឹងបទល្មើស ដែលប្រព្រឹត្តិដោយលោកស្រីនោះ គឺជាការបង្កការបំភិតបំភ័យ ចំពោះតំណាងរាស្រ្តមកពីគណបក្សប្រឆាំង។ នេះសរបញ្ជាក់អោយឃើញយ៉ាងច្បាស់អំពីបំណងបំបិទសម្លេង និងរំខានលោកស្រី ក្នុងការប្រើប្រាស់សិទ្ធិតាមផ្លូវច្បាប់ ក្នុងការរកយុត្តិធម៌ពីបទបរិហារកេរ្តិ៍»។
លោកស្រីពុង ឈីវកេក ប្រធានអង្គការលីកាដូ មានប្រសាសន៍ថា «ការគំរាមកំហែងមកលើលោកស្រីមួរ សុខហួរ គឺជាឧបករណ៍មួយទៀតនៃការប្រឈមមុខនឹងបរិយាកាសគ្រោះថ្នាក់របស់តំណាងរាស្រ្តមកពីគណបក្សប្រឆាំងនៅក្នុងប្រទេសកម្ពុជា»។ លោកស្រីបានរម្លឹកថា «តំណាងរាស្រ្តមកពីគ្រប់គណបក្សទាំងអស់ ត្រូវតែមានសិទ្ធិសេរីភាពក្នុងការបំពេញតួនាទិ និងតំណាងអោយផលប្រយោជន៍របស់ម្ចាស់ឆ្នោត ហើយបញ្ចេញមតិជាសាធារណៈ អំពីបញ្ហាសំខាន់ៗ ដោយមិនមានការភ័យខ្លាច ចំពោះការចាប់ខ្លួន រឺឃុំឃាំងដោយបំពានឡើយ»។ ដោយឡែក លោក យ៉េង វីរៈ នាយកប្រតិបត្តិនៃមជ្ឈមណ្ឌលអប់រំច្បាប់សម្រាប់សហគមន៍ បានគូសបញ្ជាក់ថា ការព្យូរអភ័យឯកសិទ្ធិសភាមិនមែនជាអ្វីដែលអាចធ្វើតាមតែចិត្តនឹកឃើញរបស់មន្រ្តីជាន់ខ្ពស់រដ្ឋាភិបាលឡើយ»។
ដោយឡែក លោកគល់ បញ្ញា ប្រធានគណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា (ខុមហ្វ្រែល) បានមានប្រសាសន៍ថា «ប្រសិនជាអភ័យឯកសិទ្ធិសភារបស់លោកស្រីមួរ សុខហួរ ត្រូវបានដកហូតនោះ គឺជាការបញ្ជាក់ថាតំណាងរាស្រ្តមកពីគណបក្សប្រឆាំងមិនមានសេរីភាពក្នុងការបំពេញមុខនាទី ដោយពុំចាំបាច់ភ័យខ្លាច ចំពោះការបំភិតបំភ័យ និងការដាក់ទោសពៃរ៍ឡើយ»។ លោកស្រីធីតា ឃឹះ នាយិកាអង្គការសីលការ (Silaka) បានសំដែងការសោកស្តាយថា «ការគំរាមកំហែងទៅលើតំណាងរាស្រ្ត គឺជារឿងគួរអោយសោកស្តាយជាខ្លាំង នៅពេលដែលទង្វើនេះធ្វើទៅលើសកម្មជននយោបាយស្រ្តីមួយរូប ក្នុងចំណោមសកម្មជននយោបាយស្រ្តី ដែលមិនមានច្រើននៅក្នុងប្រទេសកម្ពុជា ដែលជារឿយៗ សម្លេងស្រ្តីត្រូវបានគេគៀបសង្កត់ និងមិនទទួលស្គាល់»។
លោកស្រី មួរ សុខហួរ តំណាងរាស្រ្តប្រចាំមណ្ឌលកំពត បានបញ្ជាក់យ៉ាងសាមញ្ញប្រាប់ កាសែត ថាលោកស្រីទុកអោយតុលាការកាត់ក្តីរឿងនេះ ហើយលោកស្រីស្វាគមន៍ចំពោះសំណើសុំព្យួរអភ័យឯកសិទ្ធិសភារបស់លោកស្រីជាយថាហេតុណាមួយ ពីសំណាក់តុលាការ។ លោកស្រីសន្យាថា «ខ្ញុំជឿជាក់លើឆន្ទៈរបស់តំណាងរាស្រ្ត មកពីគ្រប់គណបក្ស ហើយខ្ញុំនឹងគោរពការសម្រេចរបស់ពួកគេ»។ ដោយឡែក លោកគង់ សំអុន មេធាវីរបស់លោកស្រីបានពន្យល់ថាលោកគ្រាន់តែអនុវត្តវិជ្ជាជីវៈមេធាវីរបស់លោក ហើយលោកបដិសេធមិនបានប្រើប្រាស់សំដីបរិហារកេរ្តិ៍ ទៅលើសម្តេចនាយករដ្ឋមន្រ្តីនោះទេ។
 -គណបក្សសម រង្ស៊ី - គណបក្សសិទ្ធិមនុស្ស : កាលប្បវត្តិនៃការបញ្ចូលគ្នាត្រូវបានប្រកាសឡើង (២៣-០៤-២០០៩)
-សម្តេចហ៊ុន សែន វាយបកទៅលើពាក្យបណ្តឹងបទបរិហារកេរ្តិ៍របស់លោកស្រីមួរ សុខហួរ (២៧-០៤-២០០៩)
-អ្នកតំណាងរាស្រ្តគណបក្សប្រឆាំង លោកស្រីមួរ សុខហួ ប្តឹងសម្តេចហ៊ុន សែន ពីបទបរិហារកេរ្តិ៍ (២៣-០៤-២០០៩)
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
