| គ្រួសារចុងក្រោយដែលរស់នៅក្នុងបរិវេណវិទ្យាល័យ Descartes ធ្វើការអំពាវនាវទៅស្ថានទូតបារាំង |
| ដោយ ដួង សុខា | |
| ៣០-០៤-២០០៩ |
 ភ្នំពេញ (កម្ពុជា) ថ្ងៃទី៣០ មេសា ២០០៩៖ ប្រជាពលរដ្ឋ៨គ្រួសារចុងក្រោយ បដិសេធមិនព្រមចាកចេញពីលំនៅដ្ឋានរបស់ពួកគេ ដែលស្ថិតនៅក្នុងបរិវេណវិទ្យាល័យ Descartes និងបានធ្វើការតវ៉ានៅមុខស្ថានទូតបារាំង © វណ្ឌី រតនា គ្រួសារកម្ពុជា ដែលរស់នៅក្នុងអគារមួយខ្នងនៅក្នុងបរិវេណវិទ្យាល័យបារាំង René Descartes នាទីក្រុងភ្នំពេញអស់រយៈពេលជាច្រើនឆ្នាំមកហើយ នៅតែបដិសេធមិនព្រមចាកចេញពីលំនៅដ្ឋានរបស់ពួកគេ ដោយទាមទារសំណងខ្ពស់ជាងសំណងដែលដាក់ស្នើដោយរដ្ឋាភិបាលកម្ពុជា ជាថ្នូរនឹងការចាកចេញរបស់ពួកគេ។ បន្ទាប់ពីមានបាតុកម្មមួយ រៀបចំធ្វើឡើងដោយសិស្សនៃវិទ្យាល័យ Descartes នៅមុខគ្រឹះស្ថានរបស់ពួកគេ កាលពីថ្ងៃទី៩ មេសា ដើម្បីទាមទារសិទ្ធិស្នាក់នៅរបស់ប្រជាពលរដ្ឋ៣៧គ្រួសារ ដែលប្រឈមមុខនឹងការបណ្តេញចេញ គ្រួសារភាគច្រើនបានសម្រេចយល់ព្រមរើលំនៅដ្ឋាន ជាថ្នូរនឹងប្រាក់សំណងចន្លោះពី៥ពាន់ ទៅ១ម៉ឺនដុល្លារ ដោយអាស្រ័យលើទំហំផ្ទះរបស់ពួកគេ ព្រមទាំងដីមួយកន្លែង ទំហំ៤គុណ៤ម៉ែត្រ នៅសង្កាត់ស្ទឹងមានជ័យ។ ប៉ុន្តែ ប្រជាពលរដ្ឋ៨គ្រួសារផ្សេងទៀតនៅតែបន្តជំទាស់មិនព្រមចាកចេញ និងបានធ្វើការតវ៉ានៅមុខស្ថានទូតបារាំងប្រចាំកម្ពុជា នៅថ្ងៃព្រហស្បតិ៍ ទី៣០ ខែមេសា។ កាលពីថ្ងៃពុធ ទី២៩ ខែមេសា បន្ទាប់ពីបញ្ចប់ជំនួបមួយនៅសាលាក្រុងភ្នំពេញ ជាមួយលោកផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្រ្តី និងលោកម៉ាន់ ឈឿន អភិបាលរងរាជធានីភ្នំពេញ ប្រជាពលរដ្ឋ១៦គ្រួសារ ក្នុងចំណោម២៤គ្រួសារចុងក្រោយ ដែលរស់នៅក្នុងបរិវេណវិទ្យាល័យ Descartes បានសម្រេចយល់ព្រមតាមសំណើចុងក្រោយរបស់អាជ្ញាធរកម្ពុជា ដែលព្រមផ្តល់ប្រាក់សំណងដល់ពួកគេ ពី៨ ០០០ ទៅ១៥០០០ដុល្លារ អាស្រ័យលើទំហំផ្ទះបច្ចុប្បន្នរបស់ពួកគេ និងអាស្រ័យលើថាអ្នកទាំងនេះចង់បាន រឺមិនចង់បានដីមួយកន្លែង នៅសង្កាត់ស្ទឹងមានជ័យរឺអត់។ ចំណែក៨គ្រួសារផ្សេងទៀតបានមកប្រមូលផ្តុំនៅមុខស្ថានទូតបារាំងប្រចាំទីក្រុងភ្នំពេញ នាថ្ងៃព្រហស្បតិ៍ ទី៣០ មេសា ដើម្បីធ្វើការប្រកែកតវ៉ាមិនយល់ព្រម និងបានផ្តិតមេដៃលើញត្តិមួយ ដោយអំពាវនាវសុំអន្តរាគមន៍ពីរដ្ឋាភិបាលបារាំង។
នៅមុខច្រកទ្វារចូលរបស់ស្ថានទូត ក្រុមអ្នកតវ៉ាបានលើកបដាចំនួន៣ សរសេរជាភាសាខ្មែរ ថា «មិត្តភាពរវាងកម្ពុជា និងបារាំង= យុត្តិធម៌របស់ប្រជាជន» «អ្នកត្រូវការសាលារៀន យើងត្រូវការផ្ទះនៅ» និង «យើងគាំទ្រគោលនយោបាយរបស់រាជរដ្ឋាភិបាលកម្ពុជា ដើម្បីប្រគល់អតីតវិទ្យាស្ថានពាណិជ្ជសាស្រ្ត [វិទ្យាស្ថានជាតិពាណិជ្ជសាស្រ្ត ដែលវិទ្យាល័យ Descartes សុំយកមកវិញ] អោយទៅស្ថានទូតបារាំង ប៉ុន្តែ សូមអ្នកមេត្តាជួយយើងអោយបានផ្ទះនៅសមរម្យផង»។
លោកគឹម វិចិត្រ អ្នកតវ៉ាម្នាក់ បានបរិហារថា «ម្សិលមិញ [ពុធ ទី២៩ មេសា] ១៦គ្រួសារយល់ព្រមទទួល [សំណង] ព្រោះសាលាក្រុងភ្នំពេញបាននិយាយប្រាប់ពួកគេថាវាជាបទបញ្ជារបស់នាយករដ្ឋមន្រ្តី [ហ៊ុន សែន]។ គេប្រាប់គាត់ថាសំណុំរឿងនេះនឹងត្រូវបញ្ជូនទៅលោក ឧបនាយករដ្ឋមន្រ្តីសុខ អាន ដើម្បីសុំអនុសាសន៍របស់គាត់ សំដៅចាត់ការតាមផ្លូវច្បាប់ប្តឹងប្រជាជន។ ហេតុដូចនេះ ពួកគេភិតភ័យនឹងប្រព័ន្ធតុលាការ»។ លោកគឹម វិចិត្រ ដែលអមដំណើរដោយឪពុករបស់គាត់ បានពន្យល់ប្រាប់អ្នកយកព័ត៌មានថា «នៅក្នុងគ្រួសាររបស់ខ្ញុំ មានសមាជិកជាង១០នាក់។ រដ្ឋាភិបាលផ្តល់ប្រាក់ដល់យើង ចំនួន១ម៉ឺនដុល្លារ។ ជាមួយនឹងទឹកប្រាក់នេះ យើងមិនអាចទិញផ្ទះសមរម្យបាននោះទេ។ ដូចនេះ យើងមកស្ថានទូតបារាំង ដើម្បីសុំអន្តាគមន៍ តាមបែបមនុស្សធម៌ រឺជាថវិកា។ យើងសង្ឃឹមថាស្ថានទូតអាចជួយយើងបាន»។ ដោយឡែក លោកគឹម វិចិត្រ បានទាមទារសំណងជាថវិកាច្រើនជាងចំនួន៤ដង លើថវិកាដែលស្នើដោយរដ្ឋ ពោលគឺដីទំហំ៨ គុណ១៦ម៉ែត្រ និងប្រាក់៤ម៉ឺនដុល្លារ ដើម្បីអាចធ្វើអោយគ្រួសាររបស់លោកទាំងអស់រស់នៅជុំគ្នា នៅក្នុងលក្ខខណ្ឌមួយ ដូចទៅនឹងការរស់នៅក្នុងអគារសព្វថ្ងៃរបស់ពួកគាត់ ។
បន្ទាប់មកទៀត ក្រុមបាតុករបានប្រគល់ញត្តិមួយ ផ្ញើជូនឯកអគ្គរដ្ឋទូតបារាំង លោក Jean-François Desmazières តាមរយៈតំណាងស្ថានទូតបារាំងប្រចាំនៅកម្ពុជា។ ប៉ុន្តែ អ្នកការទូតបារាំងមិនបានធ្វើការសន្យាណាមួយ ចំពោះតំណាងគ្រួសារទាំងនេះទេ។
លោកម៉ាន់ ឈឿន អភិបាលរងរាជធានីភ្នំពេញបានគូសបញ្ជាក់ប្រាប់ កាសែតថា គ្រួសារដែលយល់ព្រមចាកចេញ ពិតជាបានទទួលប្រាក់សំណងតាមការសន្យា នៅថ្ងៃព្រហស្បតិ៍ ទី៣០ មេសានេះ «នៅក្នុងគណនីធនាគារអេស៊ីលីដា» ដើម្បីអនុញ្ញាតអោយពួកគេអាចទិញលំនៅដ្ឋានមួយខ្នង ចាប់ពីពេលនេះទៅ។ ទាក់ទងនឹងគ្រួសារចុងក្រោយ មន្រ្តីជាន់ខ្ពស់កម្ពុជារូបនេះមិនចង់និយាយច្រើននោះទេ ដោយគ្រាន់តែគូសបញ្ជាក់ថា «វាជាសិទ្ធិរបស់ពួកគាត់ [ក្នុងការធ្វើការតវ៉ា] ប៉ុន្តែ ពួកគាត់នឹងចាកចេញពីលំនៅដ្ឋាន។ ទិសដៅរបស់រដ្ឋាភិបាលបារាំងនិងកម្ពុជាគឺបណ្តុះបណ្តាលធនធានមនុស្ស តាមរយៈសាលារៀននេះ នាថ្ងៃអនាគត»។ សរុបមក អាជ្ញាធកម្ពុជាមានបំណងចង់ឃើញសំណុំរឿងនេះត្រូវបានដោះស្រាយរួចរាល់ មុនពេលសម្តេចនាយករដ្ឋមន្រ្តីហ៊ុន សែន ទៅបំពេញទស្សនកិច្ចនៅប្រទេសបារាំង ដែលគ្រោងធ្វើឡើងនៅចុងខែឧសភា។
 -សិស្សវិទ្យាល័យបារាំងនៅភ្នំពេញតវ៉ាប្រឆាំងនឹងការបណ្តេញចេញលើគ្រួសារកម្ពុជា (០៩-០៤-២០០៩)
-ការបណ្តេញចេញនៅតំបន់ដីក្រហមៈ ប្រជាពលរដ្ឋ៥៣គ្រួសារនៅតែបន្តទាមទារសំណងជាប្រាក់ (០៤-០២-២០០៩)
-សំណងជាផ្ទះល្វែង មិនមែនជាប្រាក់ៈ សំណងសម្រាប់ប្រជាពលរដ្ឋដីក្រហមដែលត្រូវបានបណ្តេញចេញត្រូវបាន ពិនិត្យនិងកែសម្រួលឡើងវិញ (២៧-០១-២០០៩)
-ជម្លោះដីធ្លីនៅកម្ពុជា : តំបន់ដីក្រហមត្រូវបានបោសសម្អាតនៅក្នុងការបណ្តេញដ៏ហិង្សាមួយ (២៤-០១-២០០៩)
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
