| ការចុះបញ្ជីប្រាសាទព្រះវិហារៈ កម្ពុជានៅ "ស្ងៀមស្ងាត់" ទោះបីជាមានឧបសគ្គ |
| ដោយ ស្ទេហ្វានី ហ្សេ | |
| ០៣-០៧-២០០៨ |
គណៈកម្មាធិការបេតិកភណ្ឌពិភពលោកនឹងបើកសម័យប្រជុំ នៅទីក្រុងកេប៊ិច(ប្រទេសកាណាដា) រហូតដល់ថ្ងៃទី១០ ខែកក្កដា ដើម្បីធ្វើការសម្រេចចិត្ត ទាក់ទិននឹងតំបន់ទេសចរណ៍ថ្មីដែលត្រូវចុះនៅក្នុងបញ្ជីបេតិកភណ្ឌពិភពលោក។ រដ្ឋមន្ត្រីក្រសួងការបរទេសថៃបានប្រកាសថាលោកនឹងធ្វើដំណើរទៅកាន់ទីក្រុងកេប៊ិច ក្នុងពេលឆាប់ៗនេះ។ លោកក៏បានប្រកាសទៀតថាលោកនឹងប្រឆាំងទៅនឹងសំណើររបស់ប្រទេសកម្ពុជា ចំពោះការសុំដាក់បញ្ជូលប្រាសាទព្រះវិហារនៅក្នុងបញ្ជីបេតិកភណ្ឌ ដែលស្ថិតនៅជាប់នឹងព្រំប្រទល់ប្រទេសថៃ។
រដ្ឋាភិបាលថៃបានយល់ព្រមគោរពតាមអធិបញ្ជារបស់តុលាការរដ្ឋបាលថៃ ដែលបានចេញបង្គាប់កាលពីថ្ងៃសៅរ៍សប្តាហ៍មុននេះ អោយរដ្ឋាភិបាលផ្អាកការគាំទ្រការចុះបញ្ជីប្រាសាទរបស់ខ្មែរនេះ។ ការផ្ទុះឡើងនូវបញ្ហាជាច្រើនលើកច្រើនសារជុំវិញសំណុំរឿងដ៏រសើបនេះ បានធ្វើអោយប្រជាជនខ្មែរមួយចំនួនបាត់បង់នូវភាពអត់ធ្មត់របស់ខ្លួន។ សមាគមតូចៗក្នុងស្រុកបានប្រកាសពីគម្រោងដើរក្បួនមួយទៅកាន់ស្ថានទូតថៃប្រចាំទីក្រុងភ្នំពេញ។
ទោះជាយ៉ាងណា លោកខៀវ កាញារីទ្ធ អ្នកនាំពាក្យរបស់រដ្ឋាភិបាលកម្ពុជា បានមានប្រសាសន៍ថារដ្ឋាភិបាលចង់រក្សា «ភាពស្ងៀមស្ងាត់» និងត្រៀមបង្ការការពាររាល់ចលនាតវ៉ាណាមួយនៅលើទឹកដីនៃព្រះរាជាណាចក្រកម្ពុជា។ លោកបានពន្យល់នៅថ្ងៃព្រហស្បតិ៍ ទី៣ កក្កដា នេះថា «យើងត្រូវតែដឹងអោយច្បាស់ថាមិនមែនប្រទេសថៃទេ ដែលជំទាស់ទៅនឹងការដាក់បញ្ជូលប្រាសាទព្រះវិហារនេះ ប៉ុន្តែ អ្នកដែលជំទាស់គឺជាគណបក្សប្រឆាំងថៃទៅវិញទេ ព្រោះថាគណបក្សប្រឆាំងទាំងនោះចង់ទម្លាក់រដ្ឋាភិបាលរបស់ខ្លួន។ គម្រោងរៀបចំបាតុកម្មនៅប្រទេសកម្ពុជាប្រហែលជាអាចបណ្តាលមកពីការយល់មិនច្បាស់ ហើយនឹងភាន់ច្រឡំ...»។
រដ្ឋាភិបាលនៅចងចាំថា កាលពីខែមករា ឆ្នាំ២០០៣ អំពើហឹង្សាដ៏ធំមួយបានកើតមានឡើង ប្រឆាំងនឹងក្រុមហ៊ុនថៃនានា នៅទីក្រុងភ្នំពេញ បន្ទាប់ពីសិល្បៈការិនីថៃម្នាក់បានអះអាងថាប្រាសាទអង្គរវត្ត គឺជាកម្មសិទ្ធិរបស់ប្រទេសរបស់ខ្លួន។ រដ្ឋាភិបាលចង់បញ្ចៀសព្រឹត្តិការណ៍បែបនេះ កុំអោយកើតមានឡើងម្តងទៀត។
ក្នុងសភាពស្ងប់ស្ងាត់ លោករដ្ឋមន្រ្តីក្រសួងព័ត៌មាន ខៀវ កាញារីទ្ធ បានបន្ថែមទៀតថា «ប្រទេសកម្ពុជាបានមានមធ្យោបាយផ្សេងៗ ប្រសិនជាអង្គការយូណេស្កូមិនទាន់សម្រេចយល់ព្រមនៅក្នុងឆ្នាំនេះ តាមសំណើររបស់ពួកគេ។ «ប្រសិនជាប្រាសាទត្រូវបានដាក់បញ្ជូលក្នុងបញ្ជីបេតិកភណ្ឌ យើងអាចរំពឹងទុកថាភ្ញៀវទេសចរនឹងមកទស្សនាប្រាសាទកាន់តែច្រើនឡើងៗ ហើយយើងក៏រំពឹងទៀតដែរថានឹងមានអ្នកទេចរមកពីប្រទេសថៃ។ ប៉ុន្តែ ប្រសិនជា ប្រាសាទមិនត្រូវបានដាក់បញ្ជូលក្នុងបញ្ជីបេតិកភណ្ឌ នោះភ្ញៀវទេសចរប្រហែលជាត្រូវឆ្លងកាត់តាមប្រទេសកម្ពុជា ដើម្បីអាចទៅទស្សនាប្រាសាទ...»។ រហូតមកទល់សព្វថ្ងៃនេះ ផ្លូវធ្វើដំណើរតាមច្រកប្រទេសថៃ ទៅកាន់ប្រាសាទដែលមានអាយុកាលរាប់រយសតវត្សមួយនេះ មានសភាពងាយស្រួលជាងតាមច្រកប្រទេសកម្ពុជា។
ទោះជាយ៉ាងណា សារព័ត៌មានបាងកកប៉ុស្តិ៍ បានចេញផ្សាយអត្ថបទកាលពីថ្ងៃព្រហស្បតិ៍ ទី៣ កក្កដានេះ ដោយជឿជាក់ថា គ្មានអ្វីចោទជាបញ្ហាដល់បេក្ខភាពនៃប្រទេសកម្ពុជានោះទេ។ ជាការពិតណាស់ សារព័ត៌មានថៃប្រចាំថ្ងៃមួយនេះ បានសរសេរថា នៅលើមូលដ្ឋានលិខិតមួយច្បាប់របស់ប្រធានការិយាល័យអង្គការយូណេស្កូប្រចាំទីក្រុងបាងកក សេចក្តីសម្រេចរបស់តុលាការរដ្ឋបាលមិនអាចលុបចោលនូវសេចក្តីប្រកាសរួមគ្នាមួយ ដែលចុះហត្ថលេខាដោយតំណាងនៃព្រះរាជាណាចក្រទាំងពីរ កាលពីថ្ងៃទី២២ ឧសភា នៅទីក្រុងប៉ារីស ដែលនៅក្នុងសេចក្តីប្រកាសនោះ ប្រទេសថៃបានយល់ព្រមគាំទ្រការចុះបញ្ជីប្រាសាទតែមួយគត់។
គណៈកម្មាធិការបេតិកភណ្ឌពិភពលោកគឺជាអ្នកចេញសេចក្តីសម្រេចចុងក្រោយ។ ចាប់ពីពេលនេះតទៅ គ្រប់គ្នាកំពុងតែផ្តោតចក្ខុទៅលើគណៈកម្មាធិការមួយនេះ ដែលនឹងចាប់ផ្តើមការងាររបស់ខ្លួន ខណៈពេលសម័យប្រជុំលើកទី៣២ ទើបតែបានចាប់ផ្តើម។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
