| ប្រាសាទព្រះវិហាររៀបចំពិធីរួចជាស្រេចសម្រាប់ការចុះ បញ្ជីប្រាសាទជាបេតិកភណ្ឌពិភពលោក |
| ដោយ រស់ ឌីណា | |
| ០៧-០៧-២០០៨ |
ដំណឹងរីករាយមិនទាន់ផ្លូវការមួយជុំវិញលទ្ធផលនៃការចុះបញ្ជីដាក់ប្រាសាទព្រះវិហារជាបេតិកភណ្ឌពិភពលោក បានធ្វើអោយប្រជាជនរស់នៅក្នុងរមណីដ្ឋានប្រាសាទព្រះវិហារសប្បាយរីករាយនិងរាំវង់ពេញមួយយប់កាលពីថ្ងៃអាទិត្យ ទី៦ កក្កដា នៅឯជើងប្រាសាទ។ លោក ហង្ស សុទ្ធ អគ្គលេខាធិការអាជ្ញាធរជាតិប្រាសាទព្រះវិហារបានពោលបញ្ជាក់នៅថ្ងៃច័ន្ទ ទី៧ កក្កដានេះ ថា តាមដំណឹងក្រៅផ្លូវការដែលទទួលបានពីក្រុមគណៈប្រតិភូខ្មែរនៅក្រុង កេប៊ិច កាលពីថ្ងៃអាទិត្យ ទី៦ កក្កដាថា សម្លេងចំនួន២០ទល់នឹងមួយ បានលើកដៃគាំទ្រដល់ការដាក់បញ្ជូលប្រាសាទព្រះវិហារទៅក្នុងបេតិកភណ្ឌពិភពលោក។
លោកបានបន្តទៀតថាមន្ត្រីនៃទីស្តីការគណៈរដ្ឋមន្ត្រីដែលជាគណៈប្រតិភូនៅប្រទេសកាណាដា តែងតែទាក់ទងប្រាប់ដំណឹងនៃការវិវត្តិនៃកិច្ចប្រជុំនោះប្រាប់ដល់លោក ដែលប្រចាំការនៅលើភ្នំប្រាសាទព្រះវិហារ។ បើតាមលោកហង្ស សុទ្ធ ប្រជាជនខ្មែរនៅទីនោះ មានភាពសប្បាយរីករាយមែនទែន ក្រោយពេលដែលលោកបានប្រកាសអោយដឹងពីដំណឹងនេះកាលពីថ្ងៃអាទិត្យ។ ដោយឡែក គេពុំឃើញក្រុមតវ៉ារបស់ថៃមានវត្តមាននៅទល់មុខប្រាសាទព្រះវិហារខាងទឹកដីថៃទៀតឡើយ ចាប់តាំងពីថ្ងៃអាទិត្យមកទល់ថ្ងៃច័ន្ទ ៦ កក្កដានេះ។ អគ្គលេខាធិការអាជ្ញាធរជាតិប្រាសាទព្រះវិហារបានគូសបញ្ជាក់ថា «កាលពីថ្ងៃសៅរ៍ គេឃើញមានបាតុករថៃជាងមួយរយនាក់ស្រែកតវ៉ា។ បើតាមដំណឹងដែលទទួលបាន គេគ្រោងបង្កើនចំនួននេះដល់ទៅ១០០០នាក់ នៅថ្ងៃអាទិត្យ តែទីបំផុតពួកគេបានបំបែកគ្នាអស់ហើយ ហើយនៅថ្ងៃច័ន្ទនេះ មានសល់តែមនុស្សស្លៀកពាក់សចំនួន៧នាក់ ក្នុងនេះស្រីប្រាំនាក់ និងប្រុសពីរនាក់ប៉ុណ្ណោះ ដែលនៅអង្គុយសមាធិនៅទីនោះ»។
លោក ហង្ស សុទ្ធ ក៏បានប្រាប់អោយដឹងដែរថានៅព្រឹកថ្ងៃច័ន្ទនេះ អភិបាលខេត្តស៊ីសាកេតរបស់ថៃបានចូលរួមធ្វើសន្និសីទកាសែតជាមួយបណ្តាញព័ត៌មានថៃ នៅទីតាំងដែលមានការតវ៉ា ហើយដែលបានចាក់ផ្សាយតមាទូរទស្សន៍ថៃ ត្រូវបានប្រជាពលរដ្ឋខ្មែរចេះថៃរស់នៅជើងប្រាសាទបកប្រែក្រៅ ផ្លូវការថាលោកអភិបាលខេត្តស៊ីសាកេតបានពន្យល់បញ្ហាជាច្រើនដល់ប្រព័ន្ធផ្សព្វផ្សាយថៃពីការចុះប្រាសាទព្រះវិហារក្នុងបញ្ជីបេតិកភណ្ឌពិភពលោកថា «ប្រាសាទព្រះវិហារជារបស់ខ្មែរ ការសុំបញ្ជូលប្រាសាទនេះ ជាបេតិកភណ្ឌពិភពលោកជាសិទ្ធិរបស់កម្ពុជា»។ លោកក៏សុំអោយប្រាសាទបាតុករថៃទាំងអស់យល់ពីហេតុផល កុំបង្កភាពល្អក់កករជាមួយប្រទេសជិតខាង និងធ្វើអោយប៉ះពាល់ដល់មិត្តភាពកម្ពុជា-ថៃ ពិសេសប្រជាជននៃប្រទេសទាំងពីរ»។
បើតាមលោកហង្ស សុទ្ធ បាតុករថៃទាំងនោះគឺជាក្រុមគណបក្សប្រឆាំងថៃប៉ុណ្ណោះ ហើយថ្មីៗ ទូរទស្សន៍ថៃមួយក៏បានទទួលការបំភ្លឺពីក្រសួងព័ត៌មានខ្មែរនៅភ្នំពេញដែរ ព្រមទាំងប្រជាពលរដ្ឋនៅភ្នំពេញ ដោយពួកគេយល់ថាគេពុំបានខឹងប្រទេសថៃឡើយ។
លោកមឿង សុន ប្រធានអង្គការមូលនិធិទ្រទ្រង់អរិយធម៌ខ្មែរ «ម.ទ.អ.ខ» បានប្រកាសនៅក្នុងសន្និសីទកាសែតនៅព្រឹកថ្ងៃច័ន្ទ ទី៦ កក្កដានេះថាអង្គការរបស់លោកមិនមានគំនិតធ្វើបាតុកម្មប្រឆាំងនឹងប្រទេសថៃឡើយ។ តែលោកសុំអោយសមាជិកទាំង២១នៃអង្គការបេតិកភណ្ឌពិភពលោក ដោយឈរលើគតិយុត្តិ មិនលាយឡំនឹងឥទ្ធិពលនយោបាយនៃប្រទេសដែលមានកម្លាំងនយោបាយជាងប្រទេសកម្ពុជា ដែលជាហេតុផលបង្ហាញពីការមិនគោរពអធិបតេយ្យភាពនៃប្រទេសជិតខាង។
លោកមឿង សុន បានគូសបញ្ជាក់ថា «ការដាក់ប្រាសាទព្រះវិហារជាបេតិកភណ្ឌពិភពលោកគឺមិនមែនសម្រាប់តែផលប្រយោជន៍ប្រទេសកម្ពុជា គឺវាជាផលប្រយោជន៍ដល់ពិភពលោក ពិសេសប្រទេសថៃ ដែលអាចស្រូបយកទេសចរមកទស្សនាប្រាសាទនេះដល់ទៅ៧០% រឺ៨០% ច្រើនជាងប្រទេសកម្ពុជាទៅទៀត ព្រោះច្រកចូលខាងប្រទេសថៃមានផ្លូវគមនាគមន៍ល្អ»។ លោកក៏ចង់ឃើញផងដែរពីការចូលរួមអភិវឌ្ឍន៍ប្រាសាទព្រះវិហារពីសំណាក់ប្រទេសថៃ។ ដូចនេះ លោកមឿង សុន បានអំពាវនាវដល់រដ្ឋាភិបាលថៃ ដែលបានប្រមូលរូបបដិមាករ និងផ្ទាំងសិលាផ្សេងៗក្នុងប្រាសាទព្រះវិហារ កាលលពីខ្លួនចូលកាន់កាប់កាលពី ឆ្នាំ១៩៥៤ មកអោយខ្មែរវិញ ដើម្បីយកមកដាក់តាំងនៅក្នុងសារមន្ទីរមួយកន្លែងដែលនឹងកសាងក្នុងរមណីយដ្ឋានប្រាសាទនេះ ដើម្បីប្រយោជន៍ទាំងសងខាង។
ជាមួយគ្នានេះដែរ ដើម្បីរៀបចំអភិវឌ្ឍន៍ តំបន់ប្រាសាទព្រះវិហារ អង្គការមូលនិធិទ្រទ្រង់អរិយធម៌ខ្មែរ គ្រោងនឹងកសាង "មន្ទីសង្រ្គោះសុខភាពសម្តេចឪ" នៅលើភ្នំប្រា សាទព្រះវិហារដើម្បីជួយព្យាបាលដល់ប្រជាពលរដ្ឋខ្មែរដែលរស់នៅទីនោះ ។
លោកបានបញ្ជាក់ថា «នៅថ្ងៃទីដប់ កក្កដាខាងមុខ យើងចូលក្រាបបង្គំគាល់សម្តេចឪ ក្នុងរឿងនេះ ហើយប្រសិនជាមានការអនុញ្ញាតិយើងនិងចាប់ផ្តើមសាងសង់ភ្លាម ព្រោះមូលនិធិមានថវិការ គ្រប់គ្រាន់ហើយ ដោយមានការជួយឧបត្ថមលើសប្បុរសជនខ្មែរ» ។
ដោយឡែក អង្គការមូលនិធិទ្រទ្រង់អរិយធម៌ខ្មែរបានរៀបចំគំរោង ជួយព្យាបាលដល់ប្រជាពលរដ្ឋ ខ្មែរនៅប្រាសាទព្រះវិហារ ជាមួយនិងក្រុមគ្រូពេទ្យ ស្ម័គ្រចិត្ត ដែលពួកគេនឹងធ្វើដំណើរទៅទីនោះ នៅថ្ងៃទី ១៨ កក្កដា ខាងមុខ ។ ម្យ៉ាងទៀតលោកមឿង សុន ក៏មានបំនងសុំការអនុញ្ញាតិពីសាលាក្រុង ភ្នំពេញដើម្បីរៀបចំពិធីរាំកំសាន្តនៅរមណីដ្ឋានវត្តភ្នំ នៅថ្ថៃ ទី ១០ កក្កដា ខាងមុខនេះប្រសិនជា ប្រាសាទព្រះវិហារខ្មែរត្រូវបានទទួលការគាំទ្រដល់ចុះបញ្ជីក្នុង បេតិកភ័ណ្ឌពិភពលោក ។ បើតាមកម្មវិធីនៃកិច្ចប្រជុំនៅទីក្រុងកេប៊ិច ប្រទេសកាណាដា ការប្រកាសលទ្ធផលនេះនឹងប្រកាសអោយដឹងនៅថ្ងៃទី ១០ កក្កដា វេលាម៉ោង ១៤ និង ៣០ នាទី នៅប្រទេសកាណាដា ។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
