| ភាពរំជើបរំជួលផ្នែកនយោបាយនៅប្រទេសថៃបន្ទាប់ពី ប្រាសាទព្រះវិហារត្រូវបានចុះក្នុងបញ្ជីបេតិកភណ្ឌ ពិភពលោក |
| ដោយ កាសែត | |
| ១១-០៧-២០០៨ |
បញ្ហាជ្រួលច្របល់ដែលកើតមានឡើងជុំវិញអ្នកនយោបាយថៃ នៅមិនទាន់បញ្ចប់នៅឡើយទេ ពាក់ព័ន្ធនឹងការចុះបញ្ជីប្រាសាទព្រះវិហារជាបេតិកភណ្ឌពិភពលោក ដែលបានប្រកាសជាផ្លូវការនៅថ្ងៃទី៧ កក្កដា នាទីក្រុងកេប៊ិច (ប្រទេសកាណាដា) ។ ទន្ទឹមនឹងលោក ណុបប៉ាដុន ប៉ាតាម៉ា រដ្ឋមន្ត្រីក្រសួងការបរទេសបានប្រកាសលាលែងចេញពីតំណែង បន្ទាប់ពីលោកបានត្រឡប់ពីទីក្រុងកេប៊ិច មកដល់ទីក្រុងបាងកក កាលពីថ្ងៃព្រហស្បតិ៍ ទី១០ កក្កដានេះ លោកនាយករដ្ឋមន្ត្រី សាមាក សុនដារ៉ាវេ (Samak Sundaravej) បានប្រកាសនៅថ្ងៃសុក្រថា លោកនឹងរៀបចំផ្លាស់ប្តូររដ្ឋាភិបាលរបស់លោកក្នុងពេលឆាប់ៗនេះ ជាលក្ខណៈទ្រង់ទ្រាយធំ។
ការលាលែងចេញពីតំណែងរបស់ប្រមុខការទូតថៃរូបនេះជាប់ពាក់ព័ន្ធទៅនឹងបញ្ហាប្រាសាទព្រះវិហារ។ រដ្ឋមន្ត្រីរូបនេះគឺជាគោលដៅនៃការរិះគន់យ៉ាងចាស់ដៃ ពីសំណាក់គណបក្សប្រឆាំងថៃ ជាពិសេសអ្នកទាំងនោះបានស្តីបន្ទោសរូបគាត់ បន្ទាប់ពីគាត់បានចុះហត្ថលេខាលើសេចក្តីប្រកាសរួមមួយ កាលពីថ្ងៃទី១៨ មិថុនា ជាមួយនឹងលោក សុខ អាន ឧបនាយករដ្ឋមន្ត្រីកម្ពុជា ដើម្បីគាំទ្រជាផ្លូវការចំពោះសំណើចុះបញ្ជីប្រាសាទព្រះវិហារ។ បន្ទាប់ពីមានអធិបញ្ជាជាលើកដំបូងរបស់តុលាការរដ្ឋបាល ដែលបានអំពាវនាវអោយរដ្ឋាភិបាលបញ្ឈប់ការគាំទ្រនេះ តុលាការធម្មនុញ្ញថៃបានរិនិច្ឆ័យ នៅថ្ងៃទី៨ កក្កដា ថាសេចក្តីប្រកាសរួមគ្នាខាងលើនេះមិនត្រឹមត្រូវនឹងរដ្ឋធម្មនុញ្ញរបស់ប្រទេសថៃឡើយ។ ការសម្រេចនេះធ្វើឡើងនៅប៉ុន្មានម៉ោង បន្ទាប់ប្រាសាទព្រះវិហារត្រូវបានចុះបញ្ជីជាផ្លូវការដោយគណៈកម្មាធិការបេតិកភណ្ឌពិភពលោក។
យោងតាមសារព័ត៌មានជាភាសាអង់គ្លេស បាងកកប៉ុស្តិ៍ នៅក្នុងអត្ថបទចេញផ្សាយកាលពីថ្ងៃសុក្រ ទី១១ កក្កដា ទោះបីជាលោក ណុបប៉ាដុន ប៉ាតាម៉ា បានលាលែងចេញពីតំណែងក៏ដោយ ក៏រដ្ឋមន្ត្រីរូបនេះត្រូវទទួលរងនូវការចោទប្រកាន់នៅចំពោះមុខសភា ដោយសមាជិកព្រឹទ្ធសភាមកពីគណបក្សប្រជាធិបតេយ្យ (គណបក្សប្រឆាំង)។ សភាថៃបានហាមឃាត់គាត់មិនអោយប្រឡូកក្នុងឆាកនយោបាយរយៈពេលប្រាំឆ្នាំ។ ទន្ទឹមនឹងនេះ ក្រមនីតិព្រហ្មទណ្ឌនៃគណៈកម្មាធិការជាតិប្រឆាំងអំពើពុករលួយអាចនឹងត្រូវបានតាក់តែងឡើង ដោយសាររដ្ឋមន្ត្រីរូបនេះបានគាំទ្របេក្ខភាពកម្ពុជា ដោយ«មូលហេតុពិសេស» និងផលប្រយោជន៍ផ្ទាល់ខ្លួន។ ម្យ៉ាងវិញទៀត គណបក្សប្រឆាំងថៃកំពុងដំណើរការនូវនីតិវិធីដូចគ្នានេះ លើករណីនាយករដ្ឋមន្រ្តី។
សព្វថ្ងៃនេះ តំណាងរាស្រ្តមកពីគណបក្សប្រជាធិបតេយ្យបានប្រកាសអោយដឹងថារដ្ឋាភិបាលថៃបានគាំទ្រសំណើចុះបញ្ជីប្រាសាទព្រះវិហាររបស់ភាគីកម្ពុជា ជាថ្នូរនឹងការសន្យាសម្រាប់ការជួញដូរប្រេង នៅតំបន់ឆ្នេរសមុទ្រកម្ពុជា។ គណបក្សប្រឆាំងក៏បានគូសបញ្ជាក់ផងដែរពីទំនាក់ទំនងរវាងរដ្ឋាភិបាលកម្ពុជា និងអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត់ត្រា (សវនការរបស់លោកថាក់ស៊ីន លើករណីអំពើពុករលួយ បានចាប់ផ្តើមនៅប្រទេសថៃ ហើយលោកបានធ្វើទស្សនកិច្ចមកកាន់ប្រទេសកម្ពុជា នាពេលថ្មីៗកន្លងទៅនេះ ដើម្បីវិនិយោគទុនលើគម្រោងសំខាន់ៗ នៅខេត្តកោះកុង)។ ការចោទប្រកាន់ខាងលើនេះត្រូវបានបដិសេធដោយរដ្ឋាភិបាលថៃ ក៏ដូចជាលោកហោ ណាំហុង រដ្ឋមន្ត្រីក្រសួងការបរទេសកម្ពុជា។
យោងតាមសារព័ត៌មាន បាងកកប៉ុស្តិ៍ លោក ណុបប៉ាដុន ប៉ាតាម៉ា មានប្រសាសន៍ការពារខ្លួនថា «បញ្ហាប្រាសាទព្រះវិហារ ត្រូវបានគេយកមកប្រើប្រាស់ជាលក្ខណៈនយោបាយ ដោយគ្មានមូលដ្ឋានច្បាស់លាស់និងការពិត។ ពេលវេលានឹងបង្ហាញថាអ្វីដែលយើងបានធ្វើ គឺដើម្បីការពារទឹកដីប្រទេសថៃ»។
តាមប្រភពដដែលនេះ លោកអាណូប៉ុង ប៉ាវចិនដា (Anopong Paojinda) រដ្ឋមន្ត្រីក្រសួងការពារជាតិថៃបានប្រកាសថា គាត់មិនមានបំណងទាល់តែសោះថានឹងប្រើប្រាស់កម្លាំង ដើម្បីបណ្តេញប្រជាពលរដ្ឋកម្ពុជា ដែលមករស់នៅតាមតំបន់ព្រំដែនជម្លោះ រវាងប្រទេសទាំងពីរ។ រដ្ឋាភិបាលថៃ «នឹងបន្ត» ទំនាក់ទំនងការទូតតទៅទៀត។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
