| ជម្លោះខ្មែរ-ថៃ ដោះស្រាយមិនទាន់ចេញអាស៊ាន អំពាវនាវអោយភាគីទាំងពីររក្សាភាពអត់ធ្មត |
| ដោយ ឈាង បុប្ផា, ស្ទេហ្វានី ហ្សេ (ភ្នំពេញ) និង ចង វីង (ព្រះវិហារ) | |
| ២១-០៧-២០០៨ |
ការចរចារនៅបន្ត យោងតាមសារព័ត៌មានអន្តរជាតិ Reuters ភាគីទាំងពីរបានជួបប្រជុំគ្នានៅស្រុក អារញ្ញយ៉ាបាថេត ខេត្តស្រះកែវ ប្រទេសថៃ ហើយបានបញ្ចប់នៅល្ងាចថ្ងៃច័ន្ទ ដោយមិនបានទទួលលទ្ធផលជាផ្លែផ្កាឡើយ។ ប៉ុន្តែ រហូតមកទល់ពេលនេះ ប្រទេសទាំងពីរនៅមិនទាន់ប្រើប្រាស់អំពើហឹង្សាណាមួយឡើយ ហើយនៅបន្តចរចារគ្នាតទៅទៀត។ នៅល្ងាចថ្ងៃច័ន្ទនេះ ភាគីកម្ពុជាមិនបានផ្សព្វផ្សាយព័ត៌មាន ជុំវិញការចរចារខាងលើនេះទេ។ លោក ខៀវ កាញារីទ្ធ អ្នកនាំពាក្យរដ្ឋាភិបាលកម្ពុជា បានបដិសេធមិនធ្វើអធិប្បាយផ្សេងៗ ទាក់ទិននឹងការចរចារនេះ។
ការរង់ចាំ ស្ថិតនៅក្នុងសភាពស្ងប់ស្ងាត់
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីទទួលបន្ទុកសំណុំរឿងប្រាសាទ ព្រះវិហារ បានបញ្ជាក់នៅល្ងាចថ្ងៃច័ន្ទ ទី២១ កក្កដានេះ ថា «នៅតាមព្រំដែន ភាគីទាំងពីរមានសភាពស្ងៀមស្ងាត់»។ នៅពេលថ្ងៃ ទាហានថៃមួយក្រុមតូចបានចាកចេញពីវត្តព្រះវិហារ។ គួររម្លឹកថា ទាហាននៃព្រះរាជាណាចក្រជិតខាងមួយនេះបានមកប្រមូលផ្តុំ នៅក្នុងវត្តមួយនេះ ចាប់តាំងពីថ្ងៃទី១៥ ខែកក្កដាមកម្ល៉េះ។ លោកផៃ ស៊ីផាន បានអោយដឹងទៀតថា ខណៈពេលជាមួយគ្នានេះផងដែរ ទាហានប៉ារ៉ាថៃដែលជាកងទ័ពពិសេសបានបោះទីតាំងនៅតាមជើងភ្នំ ហើយនឹងនៅតាមទ្វារច្រកព្រំដែន។
អ្នកនាំពាក្យរូបនេះបាន សង្កត់ធ្ងន់ថា ប្រទេសកម្ពុជាបានរក្សាគោលជំហររបស់ខ្លួន ដោយគិតដល់បញ្ហា «ការទូត» ជាអាទិភាព។ «បើទោះបីជាយើងបានពង្រឹងចំនួនកងទ័ពរបស់យើងប្រាកដមែនក៏ដោយ ក៏យើងមិនចង់ធ្វើសង្គ្រាមដែរ»។ អ្នកទទួលខុសត្រូវកម្ពុជារូបនេះបានគូសបញ្ជាក់ថា នៅថ្ងៃច័ន្ទនេះ ចំនួនទាហានថៃដែលដាក់ពង្រាយនៅលើទឹកដីខ្មែរ និងនៅលើទឹកដីថៃ បានកើនឡើងរហូតដល់ប្រហែលជា៤០០០នាក់ ដោយមានបំពាក់អាវុធធុនធំទៀតផង។ លោកបានបន្ថែមទៀតថា ភាគីសត្រូវក៏បានបញ្ជូនយន្តហោះចម្បាំងចំនួន២០គ្រឿង ចតនៅឆ្ងាយពីព្រំដែន នៅលើទឹកដីរបស់ពួកគេ ដើម្បីត្រៀមខ្លួនចូលប្រយុទ្ធ។
អាស៊ានត្រៀមជួយដល់ប្រទេសទាំងពីរ ដើម្បីដោះស្រាយបញ្ចប់ជម្លោះ
នាឱកាសកិច្ច ប្រជុំអន្តរក្រសួងលើកទី៤១នៃសមាគមប្រជាជាតិអាស៊ីអាគ្នេយ៍(អាស៊ាន) កាលពីថ្ងៃអាទិត្យ ទី២០ ខែកក្កដា នៅប្រទេសសិង្ហបុរី ជម្លោះរវាងប្រទេសកម្ពុជានិងប្រទេសថៃ ពាក់ព័ន្ធនឹងតំបន់ប្រាសាទព្រះវិហារ ដែលប្រទេសជិតខាងទាំងពីរបានទាមទារថាជាទឹកដីរបស់ខ្លួននោះ គឺជាប្រធានបទនៃកិច្ចប្រជុំ ដោយមិនអាចជៀសផុតបានឡើយ។
អាស៊ាន បានអំពាវអោយប្រទេសទាំងពីរគិតដល់សាមគ្គីភាពអាស៊ាន និងទំនាក់ទំនងនៃភាពជាអ្នកជិតខាងដ៏ល្អ និងត្រូវរង់ចាំការចរចារដែលនឹងត្រូវធ្វើឡើងនៅថ្ងៃច័ន្ទ ទី២១ កក្កដា រវាងភាគីទាំងពីរ នៅខេត្តស្រះកែវ ប្រទេសថៃ។
ខណៈពេលដែលទាហាន នៃជំរុំទាំងពីរបានប្រឈមមុខដាក់គ្នានៅព្រំដែន លោក Lee Hsien Loong នាយករដ្ឋមន្ត្រីសិង្ហបុរី បានប្រកាសថា «អាស៊ានមិនអាចនៅស្ងៀម ដោយមិនបានធ្វើអ្វីមួយនោះទេ»។
ប្រមុខរដ្ឋាភិបាលសិង្ហបុរី បានបញ្ជាក់ថា នៅល្ងាច ថ្ងៃអាទិត្យ ទី២០ ខែកក្កដា រដ្ឋមន្ត្រីក្រសួងការបទេសនៃប្រទេសសមាជិកទាំងដប់បានពិភាក្សា គ្នាពីបញ្ហានេះ និងបានសន្យាចំពោះប្រទេសកម្ពុជានិងប្រទេសថៃថារដ្ឋមន្ត្រីទាំងនោះ នឹង«ធ្វើការត្រួតពិនិត្យអោយបានខ្ពស់ និងគោរពកាតព្វកិច្ចអន្តរជាតិរបស់ខ្លួន» ដើម្បីដោះស្រាយជម្លោះនេះ ដោយធ្វើការ «ផ្សះផ្សារ»។ លើសពីនេះទៅទៀត រដ្ឋមន្ត្រី(ក្រសួងការបរទេស) បានត្រៀមនឹងគាំទ្រប្រទេសកម្ពុជាននិងប្រទេសថៃ ដើម្បីដោះស្រាយបញ្ហាអោយបានឆាប់រហ័ស ក្នុងករណីចាំបាច់»។ លោក Lee Hsien Loong បានបន្ថែមទៀតថាអាស៊ានមិនមែន ត្រឹមតែជាសមាគមដោះស្រាយបញ្ហាពាណិជ្ជកម្មនោះទេ ប៉ុន្តែ អាស៊ានក៏ជា «សមាគមចាស់ទុំ ត្រៀមជួយដោះស្រាយបញ្ហ ដើម្បីប្រយោជន៍រួមរបស់សមាគម»។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
