| គណៈប្រតិភូរដ្ឋសភាកម្ពុជាដឹកនាំដោយគណបក្ស សម រង្ស៊ី នឹងទៅកាន់ប្រាសាទព្រះវិហារ |
| ដោយ រស់ ឌីណា | |
| ២២-០៧-២០០៨ |
សម្តេច ហេង សំរិន ប្រធានរដ្ឋសភា បានយល់ស្របទៅនឹងគណៈប្រតិភូមួយនៃគណៈកម្មាធិការសភាទី៥ ដែលនឹងត្រូវបានដឹកនាំដោយលោក សុន ឆ័យ តំណាងរាស្រ្តមកពីគណបក្សប្រឆាំង ដើម្បីធ្វើដំណើរទៅកាន់កំពូលភ្នំប្រាសាទព្រះវិហារ នៅថ្ងៃសុក្រ ទី២៥ ខែកក្កដា ដែលនៅទីនោះ ទាហានខ្មែរនិងថៃកំពុងតែប្រឈមមុខដាក់គ្នា ។
លោក យឹម សុវណ្ណ តំណាងរាស្រ្តមកពីគណបក្សសម រង្ស៊ី បានពន្យល់នៅក្នុងសន្និសីទកាសែតមួយ នៅថ្ងៃអង្គារ ទី២២ កក្កដា ថា «យើងនឹងទៅត្រួតពិនិត្យស្ថានការណ៍នៅព្រំដែន ហើយយើងនឹងរាយការណ៍ពីលក្ខខណ្ឌលំបាកផ្សេងៗរបស់ទាហានខ្មែរដែលប្រចាំការនៅទីនោះ ដូចជា ការខ្វះខាតសំលៀកបំពាក់ ជាដើម»។
លោកសុន ឆ័យ បានបន្ថែមទៀតថា «យើងចង់កំណត់ខណ្ឌសីមាព្រំដែនរបស់ យើងនៅទីនោះ។ ខ្ញុំក៏ចង់ស្តាប់សំដីទាហានថៃ អំពីមូលហេតុនៃការឈ្លានពាននេះ ហើយចង់អោយពួកគេបង្ហាញខ្ញុំថាតើពួកគេមានកំណត់ទីតាំងព្រំដែននៅត្រង់ណា»។ លោកបានបញ្ជាក់ថាទស្សនកិច្ចនេះគឺជាកម្មវត្ថុនៃរបាយការណ៍មួយ ដែលនឹងយកទៅដាក់ទៅរដ្ឋសភា។ លោកបានបង្ហាញថា «យើងត្រូវតែរក្សាទំនាក់ទំនងនៃភាពជាអ្នកជិតខាងដ៏ល្អ ជាមួយនឹងប្រទេសថៃ ជាពិសេសរវាងគណបក្សប្រជាធិបតេយ្យរបស់យើង»។
តំណាងរាស្ត្រគណបក្សប្រឆាំងរូបនេះបានឆ្លៀតឱកាសនេះដើម្បីរិះគន់ដោយបើកចំហចំពោះការអំពាវនាវរបស់រដ្ឋាភិបាលកម្ពុជា ក៏ដូចជាស្ថានីយវិទ្យុជាតិនិងទូរទស្សន៍ស៊ីធីអ៊ិន អោយចូលរួមឧបត្ថម្ភជួយដល់ទាហាន ខ្មែរនិងអ្នកភូមិរស់នៅខេត្តព្រះវិហារ។ លោកបានពន្យល់មូលហេតុថា «រដ្ឋាភិបាលមានថវិកាដើម្បីជួយសង្គ្រោះដល់អ្នកទាំងនោះហើយ»។ លោកក៏បានសំដែងការសោកស្តាយចំពោះការៀបចំពិធីជាច្រើនដោយអាជ្ញាធរ ដើម្បីអបអរសាទរដល់ការដាក់ប្រាសាទព្រះវិហារនៅក្នុងបញ្ជីបេតិកភណ្ឌពិភពលោក កាលពីថ្ងៃទី៧ កក្កដា។ តាមគំនិតរបស់លោក ពិធីអបអរនេះបានដាស់អារម្មណ៍ចងចាំ និងដុតកំហឹងរបស់ប្រជាជនថៃអោយរឹតតែខ្លាំង។
ទោះជាយ៉ាងណា លោកសុន ឆ័យ ក៏អរគុណដល់សម្តេចនាយករដ្ឋមន្ត្រីហ៊ុន សែន ដែលបានរាយការណ៍ព្រឹត្តិការណ៍នេះប្រាប់ដល់ស្ថាប័ននានានៃអង្គការសហប្រជាជាតិ «ដើម្បីអោយគេបានដឹងលឺថាប្រទេសថៃបានឈ្លានពានទឹកដីកម្ពុជា»។ គណបក្សសម រង្ស៊ីប្រាថ្នាចង់អោយមានការដោះស្រាយជម្លោះ «លើឆាកអន្តរជាតិ» ប៉ុន្តែ បានណែនាំថាជម្លោះព្រំដែនដីគោក និងដែនសមុទ្រ រវាងប្រទេសទាំងពីរគួរតែត្រូវលើកយកមកដោះស្រាយ មួយលើក នៅក្នុងកិច្ចចរចារទាំងនេះ។ លោក សុន ឆ័យ បានបោះពាក្យទៅរដ្ឋាភិបាលថា «ប្រសិនជាគេត្រូវការអ្នកចរចារថ្មី គេអាចស្វែងរកនៅក្នុងជួរគណបក្សសម រង្ស៊ី!»
តំណាងរាស្រ្តសភារូបនេះបានសំដែងការព្រួយបារម្ភថា «មនុស្សមួយចំនួន»នៅកម្ពុជា ចង់ជម្រុញអោយកើតមានសង្គ្រាមរវាងប្រទេសទាំងពីរ។ លោកបានស្នើដល់រដ្ឋាភិបាលក្រុងភ្នំពេញកុំអោយអនុវត្តគំនិតនេះ ប៉ុន្តែត្រូវបង្ហាញថា «ប្រទេសកម្ពុជាដែលជាប្រទេសមានសុខសន្តិភាព គឺជាជនរងគ្រោះពីសំណាក់ប្រទេសថៃ»។ ក្រៅពីនេះ តំណាងរាស្រ្តគណបក្សប្រឆាំងរូបនេះបានលើកឡើងថាការកាត់ផ្តាច់ទំនាក់ទំនងការទូតជាមួយនឹងប្រទេសថៃអាចបង្កជាផលវិបាកដ៏ធ្ងន់ធ្ងរ។ «លោកបានលើកឧទាហរណ៍ករណីប្រទេសចិន ដែលមានទំនាក់ទំនងដ៏ល្អជាមួយនឹងប្រទេសថៃ ក៏ដូចជាប្រទេសកម្ពុជា... ។ ដូច្នេះ ប្រសិនជាយើងចង់រក្សាភាពជាដៃគូបែបនេះ យើងត្រូវគិតពិចារណាអោយបានល្អិតល្អន់...»។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
