| រដ្ឋមន្ត្រីការបរទេសកម្ពុជាសង្កត់ធ្ងន់ថា "យើងគួរស្នើ សុំអន្តរាគមន៍ពីអ.ស.ប ជាជាងធ្វើសង្រ្គាមនឹងគ្នា" |
| ដោយ ដួង សុខា | |
| ២៥-០៧-២០០៨ |
បន្ទាប់ពីមានការផ្សាយសារលិខិតផ្ញើជូនជនរួមជាតិខ្មែរ របស់សម្តេចនាយករដ្ឋមន្ត្រី ហ៊ុន សែន នៅស្ថានីយ៍ទូរទស្សន៍ជាតិកម្ពុជា (ទទក) នៅក្នុងសន្និសីទកាសែតមួយ នៅថ្ងៃសុក្រ ទី២៥ កក្កដានេះ លោករដ្ឋមន្ត្រីក្រសួងការបរទេសបានអះអាងថាកិច្ចប្រជុំ«ទ្វេភាគី»នឹងធ្វើឡើងនៅខេត្តសៀមរាប នៅថ្ងៃច័ន្ទទី២១ កក្កដាខាងមុននេះ ជាមួយនឹងរដ្ឋមន្ត្រីក្រសួងការបរទេសថៃ ដើម្បីដោះស្រាយជម្លោះព្រំដែននៃប្រទេសទាំងពីរ។
លោកបានបញ្ជាក់ថាលោកបានជួបពិភាក្សាជាមួយឯកអគ្គរាជទូត-រដ្ឋទូតប្រទេសជាសមាជិកអចិន្ត្រៃយ៍ទាំងប្រាំនៃក្រុមប្រឹក្សាសន្តិសុខនៃអង្គការសហប្រជាជាតិ (សហរដ្ឋអាមេរិក សហព័ន្ធរុស្ស៊ី ចិន បារាំង និងចក្រភពអង់គ្លេស) ដើម្បីពិភាក្សាជាមួយអ្នកការទូតទាំងនោះ ជុំវិញការវិវត្តន៍ចុងក្រោយនៃជម្លោះរវាងប្រទេសកម្ពុជានិងប្រទេសថៃ ដែលបានកើតមានឡើងចាប់តាំងពីថ្ងៃទី១៥ កក្កដាមក។
លោក ហោ ណាំហុង បានបន្ថែមទៀតថា «ដូចអស់លោកបានដឹងហើយថា រហូតមកទល់ពេលនេះ យើងមានការអត់ធ្មត់អតិប្បរមា» ហើយជំហានថ្មីនេះបង្ហាញពីឆន្ទះរបស់ប្រទេសកម្ពុជា ក្នុងការដោះស្រាយបញ្ហានេះ។
«ខ្ញុំបានជម្រាបប្រាប់ដល់ឯកអគ្គរាជទូត-រដ្ឋទូតទាំងប្រាំប្រទេសថាយើងមិនបានស្នើសុំអោយមានការលុបចោលការកោះប្រជុំក្រុមប្រឹក្សាសន្តិសុខនោះទេ ប៉ុន្តែ យើងគ្រាន់តែ «សុំព្យួរជាបណ្តោះអាសន្ន» ដើម្បីរង់ចាំមើលពីលទ្ធផលនៃកិច្ចប្រជុំទ្វេភាគី។ បន្ទាប់មកទៀត ខ្ញុំបាននិយាយទៅកាន់អ្នកការទូតទាំងនោះថាប្រទេសកម្ពុជាបានត្រៀមខ្លួនទទួលយកបេសកជនពិសេសមកពីប្រទេសវៀតណាម និងឥណ្ឌូណេស៊ី ដើម្បីដោះស្រាយជម្លោះនេះនៅក្នុងក្របខ័ណ្ឌអាស៊ាន ដូចមតិមួយចំនួនបានជម្រុញយើងអោយធ្វើ មុននឹងឈានដល់អង្គការសហប្រជាជាតិ»។
ប្រមុខការទូតកម្ពុជារូបនេះបានអោយដឹងទៀតថា នៅចុងបញ្ចប់នៃកិច្ចពិភាក្សាជាមួយនឹងអ្នកការទូតទាំងនោះ លោកបានចោទជាសំណួរមួយទៅកាន់អ្នកទាំងនោះ ថា៖ «ប្រសិនជាយើងមិនអាចរកបានដំណោះស្រាយពីកិច្ចប្រជុំទ្វេភាគី រឺ តាមរយៈការសម្របសម្រួលរបស់អាស៊ាន តើប្រទេសកម្ពុជាត្រូវធ្វើយ៉ាងដូចម្តេច? យល់ស្របអោយថៃរស់នៅជាអចិន្ត្រៃយ៍លើទឹកដីកម្ពុជា ដោះស្រាយបញ្ហាដោយអាវុធ រឺទទូចសុំជំនួយពីក្រុមប្រឹក្សាសន្តិសុខនៃអង្គការសហប្រជាជាតិ ផ្នែកទៅតាមធម្មនុញ្ញរបស់អង្គការនេះ?
លោកហោ ណាំហុង បានសន្និដ្ឋានថា «យើងគួរស្នើសុំអន្តរាគមន៍ពីអ.ស.ប ជាជាងធ្វើសង្រ្គាមជាមួយគ្នា»។ លោកមានភាពជឿជាក់ថាឯកអគ្គរាជទូត-រដ្ឋទូតទាំងនោះយល់អំពីគោលគំនិតរបស់គាត់ «តាមរយៈការបញ្ចេញទឹកមុខរបស់ពួកគេ»។ រដ្ឋមន្ត្រីរូបនេះសង្ឃឹមដោយក្តីជឿជាក់ថា ការពិភាក្សានៅថ្ងៃច័ន្ទខាងមុខនេះនឹងអាចដោះស្រាយបញ្ហានេះបាន។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
