| កម្ពុជានិងថៃសន្យានឹងដកកម្លាំងទាហានខ្លះ ចេញពីតំបន់ប្រាសាទព្រះវិហារ |
| ដោយ រស់ ឌីណា | |
| ១៤-០៨-២០០៨ |
ចាប់តាំងពីមានការព្រមព្រៀងគ្នារវាងប្រទេសកម្ពុជានិងថៃ កាលពីថ្ងៃទី២៨ កក្កដា ជុំវិញការដកកម្លាំងទាហានចេញពីតំបន់ប្រាសាទព្រះវិហារ គេសង្កេតឃើញថាមិនទាន់មានការដកកម្លាំងណាមួយពីសមរភូមិ ដែលទាហាននៃព្រះរាជាណាចក្រទាំងពីររាប់រយនាក់កំពុងប្រឈមមុខដាក់គ្នាយ៉ាងតានតឹង នោះទេ។ ស្ថានការណ៍អាចនឹងធូរស្រាល នៅក្នុងរយៈពេលប៉ុន្មានថ្ងៃខាងមុខនេះ។
លោកនាង ផាត រដ្ឋលេខាធិការក្រសួងការពារជាតិ និងជាប្រធានលេខាធិការដ្ឋាននៃគណៈកម្មាធិការព្រំដែនខ្មែរ-ថៃ ហើយនឹងជាប្រធានគណៈកម្មាធិការដោះស្រាយវិវាទប្រាសាទព្រះវិហារ បានប្រកាសនៅថ្ងៃព្រហស្បតិ៍ ទី១៤ សីហានេះថា ព្រះរាជាណាចក្រទាំងពីរបានយល់ព្រមដកកម្លាំងទាហានមួយផ្នែកខ្លះ មុនថ្ងៃប្រជុំពិភាក្សាថ្មីមួយ រវាងប្រមុខការទូតទាំងពីរ នៅហួរហីន ប្រទេសថៃ នៅថ្ងៃច័ន្ទ ទី១៨ សីហាខាងមុខនេះ។
ការសម្រេចចិត្តរួមនេះធ្វើឡើងនៅថ្ងៃពុធ ទី១៣ សីហា រវាងមេបញ្ជាការកងទ័ពនៃប្រទេសទាំងពីរ នៅក្នុងកិច្ចប្រជុំ «ជាលក្ខណៈមិត្តភាព»មួយ នៅខេត្តសុរិន្ទ ប្រទេសថៃ ដើម្បីផ្តល់ឱកាសជោគជ័យដ៏ល្អប្រសើរមួយដល់ការចរចារទាំងនេះ។
នៅក្នុងសន្និសីទកាសែតមួយ លោកនាង ផាត បានបញ្ជាក់ថាចំនួនកម្លាំងទាហាននៃប្រទេសទាំងពីរនឹងត្រូវកាត់បន្ថយ អោយ«មានចំនួនអប្បបរមា»។ លោកបានបដិសេធប្រាប់ពីតួលេខពិតប្រាកដ «ដើម្បីជៀសវាងនូវរាល់ជម្លោះទាំងឡាយ» ហើយអាវុធធុនធំអាចនឹងលែងមាននៅត្រង់តំបន់ជម្លោះ។
ទាហានថៃនឹងត្រូវចាកចេញពីវត្តព្រះវិហារ ដែលស្ថិតនៅជើងភ្នំប្រាសាទ។ លោកនាង ផាតបានបន្ថែមទៀតថា នៅទីនោះសព្វថ្ងៃ ពួកគេមានគ្នាប្រហែលជា២០០នាក់ ដែលនៅប្រចាំការ ហើយការបោះតង់អនាធិបតេយ្យក្នុងព្រៃនឹងត្រូវបញ្ឈប់ ហើយចាប់ពីពេលនេះទៅ ទាហាននឹងត្រូវប្រមូលផ្តុំជាក្រុម អោយមានរបៀបរយល្អ នៅក្នុងជំរុំ។ លេណដ្ឋានដែលភាគីទាំងពីរបានជីកនឹងត្រូវលុបដីបំពេញវិញ។ លោកបានបញ្ជាក់ថា « ផ្នែកយោធា បើជីកលេណដ្ឋាន មានន័យថាត្រៀមប្រយុទ្ធ។ នេះគឺជាសញ្ញាមិនល្អទេ!»។
ប្រតិបត្តិការដកកងទ័ពនេះនឹងត្រូវគ្រប់គ្រងដោយថ្នាក់ដឹកនាំជាន់ខ្ពស់នៃប្រទេសនីមួយៗ។ តំបន់ប្រាសាទព្រះវិហារ នឹងនៅសល់ត្រឹមតែ «មនុស្សមួយក្រុមតូច» បំពាក់ដោយអាវុធធុនស្រាល ដែលនឹងរង់ចាំលទ្ធផលនៃកិច្ចប្រជុំថ្ងៃច័ន្ទ ទី១៨ សីហា។ លោកនាង ផាត បានចាត់ទុកការសម្រេចបាននេះថា «ជាជោគជ័យ សម្រាប់ប្រទេសជាតិ និងប្រជាជនកម្ពុជា»។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
