| សហជីពកម្ពុជាចង់រៀបចំបាតុកម្មមួយ ដើម្បីថ្កោល ទោសប្រទេសថៃ |
| ១៤-០៨-២០០៨ |
លោករ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងលោកជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា បានប្រកាសនៅថ្ងៃព្រហស្បតិ៍ ទី១៤ សីហានេះ ពីគោលបំណងរបស់ខ្លួន ក្នុងការរៀបចំបាតុកម្មមួយនៅទីក្រុងភ្នំពេញ នៅថ្ងៃទី១៧ សីហា ដើម្បី«ទាមទារអោយប្រទេសថៃបញ្ឈប់ការឈ្លានពានទឹកដីកម្ពុជា និងស្នើសុំអោយទាហានថៃដកកងទ័ពចេញពីទឹកដីកម្ពុជាវិញ»។
ប្រធានទាំងពីររូបនេះបានប៉ាន់ស្មានថានឹងមានអ្នកចូលរួមចំនួន៣០០នាក់ បើទោះបីជាសាលាក្រុងមិនទាន់យល់ព្រមចំពោះសំណើរៀបចំបាតុកម្ម «អហឹង្សា» នេះក៏ដោយ។ ក្បួនដង្ហែនឹងចាប់ផ្តើមចេញពីអតីតវិមានរដ្ឋសភាចាស់ ដោយធ្វើដំណើរឆ្លងកាត់មុខស្ថានទូតថៃយ៉ាងប្រុងប្រយ័ត្ន។
លោករ៉ុង ឈុន បានពន្យល់នៅទីស្នាក់ការរបស់សហជីពសេរីកម្មករកម្ពុជាថា «យើងចង់បង្ហាញប្រាប់ជនជាតិថៃថា ប្រជាជនខ្មែរមិនមែននៅសង្ងំស្ងៀមដោយមិនបានធ្វើអ្វីសោះនោះទេ ហើយយើងមិនសប្បាយចិត្តចំពោះស្ថានការណ៍បែបនេះ»។ លោកបានអំពាវនាវដល់រដ្ឋាភិបាលកម្ពុជា អោយដាក់ពាក្យបណ្តឹងទៅកាន់អង្គការសហប្រជាជាតិ។
«យើងមានគោលបំណងស្រាយបំភ្លឺនៅចំពោះមុខរដ្ឋាភិបាលថា បាតុកម្មនេះមិនមែនរៀបចំឡើងប្រឆាំងនឹងរដ្ឋាភិបាលនោះទេ ហើយក៏មិនបានបម្រើផលប្រយោជន៍អោយគណបក្សនយោបាយ រឺក្រុមណាមួយដែរ ប៉ុន្តែ វាស្តែងចេញពីឆន្ទះប្រជាពលរដ្ឋដែលយកចិត្តទុកដាក់ការពារអធិបតេយ្យភាពជាតិ»។
បាតុកម្មនេះគ្រោងនឹងរៀបចំធ្វើឡើង នៅមុនថ្ងៃជួបប្រជុំរវាងរដ្ឋមន្ត្រីក្រសួងការបរទេសកម្ពុជានិងថៃ ស្តីពីបញ្ហាប្រាសាទព្រះវិហារ។ សហជីពបាននិយាយការពារខ្លួនថាបាតុកម្មនេះមិនមែនជាការបង្កជម្លោះនោះទេ។ ទោះជាយ៉ាងណា ប្រធានសហជីពទាំងពីរបាននិយាយថា យើងមានសង្ឃឹមតិចតួចណាស់ពីការចរចារនៅថ្ងៃច័ន្ទខាងមុខនេះ ព្រោះការចរចារពីរលើកកន្លងមកមិនទទួលបានជោគជ័យអ្វីឡើយ។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)