| ព្រះវិហារៈ អ្នកការទូតកម្ពុជានិងថៃនឹងពិភាក្សាផ្លូវការ នៅថ្ងៃអង្គារ ទី១៩ សីហា |
| ដោយ រស់ ឌីណា | |
| ១៨-០៨-២០០៨ |
ការចរចាររវាងរដ្ឋមន្ត្រីក្រសួងការបរទេសថៃនិងកម្ពុជាស្តីពីជម្លោះនៅតំបន់ប្រាសាទព្រះវិហារ និងកាន់តែទូលំទូលាយជាងនេះ ស្តីពីការបោះបង្គោលព្រំដែនរវាងព្រះរាជាណាចក្រទាំងពីរ នឹងចាប់ផ្តើមនៅថ្ងៃអង្គារ ទី១៩ សីហា នៅហួរហីន ប្រទេសថៃ បន្ទាប់ពីជំនួបមួយរវាងអ្នកការទូតទាំងពីរ ដែលគ្រោងធ្វើឡើងនៅថ្ងៃច័ន្ទ ទី១៨ សីហានេះ។
នៅព្រឹកថ្ងៃច័ន្ទនេះ មុននឹងចេញដំណើរបនិ្តច លោកហោ ណាំហុង រដ្ឋមន្ត្រីក្រសួងការបរទេសកម្ពុជាបានប្រកាសថាលោកនឹងជួបប្រជុំជាលក្ខណៈឯកជន ជាមួយនឹងគណៈប្រតិភូកម្ពុជា នៅពេលទៅដល់ប្រទេសថៃ នៅមុនអាហារពេលល្ងាចជាមួយនឹងភាគីថៃ ។ ដូចនេះ កិច្ចប្រជុំផ្លូវការនឹងត្រូវចាប់ផ្តើមនៅថ្ងៃអង្គារ។
យោងតាមប្រមុខការទូតកម្ពុជារូបនេះ គោលបំណងចំបងនៃការពិភាក្សានេះគឺដើម្បីធ្វើការដកកម្លាំងប្រដាប់អាវុធចេញពីតំបន់ប្រាសាទព្រះវិហារទាំងស្រុង ដែលមកទល់ពេលនេះគេសង្កេតឃើញថា នៅមានទាហានថៃដប់នាក់ប្រចាំការនៅក្នុងវត្តព្រះវិហារ និង២០នាក់ទៀតនៅជុំវិញវត្ត។ ការប្រជុំនេះធ្វើឡើងបន្ទាប់ពីជំនួបលើកទីមួយជាមួយនឹងលោក Tej Bunnag រដ្ឋមន្ត្រីក្រសួងការបរទេសថៃ កាលពីថ្ងៃទី២៨ កក្កដា នៅខេត្តសៀមរាប។
គណៈប្រតិភូកម្ពុជាក៏នឹងពិភាក្សាជាមួយនឹងសមាជិកគណៈកម្មាធិការព្រំដែនចម្រុះ ដើម្បីស្វែងរកដំណោះស្រាយ ក្នុងការបោះបង្គោលព្រំដែនខ្មែរ-ថៃ និងចាប់ផ្តើមប្រតិបត្តិការរួមគ្នា ក្នុងការដោះមីន។
ពាក់ព័ន្ធនឹងបញ្ហាឈ្លានពានប្រាសាទតាមាន់ពីសំណាក់ប្រទេសថៃ លោករដ្ឋមន្ត្រីបានបញ្ជាក់ថាលោកត្រៀមនឹងស្វែងរកវិធានការណ៍មួយជាមួយនឹងប្រទេសថៃ «ដោយយោងតាមច្បាប់និងនីតិវិធី» នៅក្នុងបរិយាកាស «ដ៏មានទំនុកចិត្តជាលក្ខណៈមិត្តភាព»មួយ។ លោកបានគូសបញ្ជាក់ថា «យើងបានចាប់ផ្តើមដកកម្លាំងប្រដាប់អាវុធចេញពីវត្តប្រាសាទព្រះវិហាររួចរាល់ហើយ។ យើងនឹងដកកម្លាំងទាហានចេញទាំងស្រុង នៅពេលក្រោយ ហើយវានឹងលែងមានបញ្ហានៅប្រាសាទព្រះវិហារទៀតហើយ។ ដូច្នេះ យើងអាចនឹងដឹកនាំការពិភាក្សាមួយផ្សេងទៀត ជុំវិញបញ្ហាប្រាសាទតាមាន់»។
លោកហោ ណាំហុង បានអះអាងថា «កិច្ចប្រជុំនៅថ្ងៃទី២៨ កក្កដា នៅខេត្តសៀមរាប អាចនឹងជាជំហានដ៏សំខាន់មួយ ឆ្ពោះទៅរកដំណោះស្រាយនៃជម្លោះរបស់យើង។ ខ្ញុំជឿជាក់ថាកិច្ចប្រជុំនៅថ្ងៃទី១៩ សីហានេះ នឹងវិវត្តន៍ ឈានទៅរកដំណោះស្រាយទាំងស្រុង។ ប៉ុន្តែ យើងត្រូវធ្វើពីមួយជំហានទៅមួយជំហាន»។
ម្យ៉ាងវិញទៀត រដ្ឋមន្ត្រីក្រសួងការបរទេសកម្ពុជានឹងត្រូវចូលជួបព្រះមហាក្សត្រថៃ Bhumibol Adulyadej បន្ទាប់ពីកិច្ចប្រជុំជាមួយនឹងលោកTej Bunnag ។ លោកហោ ណាំហុង បានគូសបញ្ជាក់ថា «ប្រទេសថៃនិងប្រទេសកម្ពុជាគឺជាព្រះរាជាណាចក្រជិតខាង […] ។ ដូច្នេះ ជម្លោះព្រំដែនគឺជារឿងធម្មតា ព្រោះករណីនេះក៏កើតមាននៅប្រទេសផ្សេងទៀតផងដែរ ពោលគឺនៅគ្រប់ទីកន្លែងទូទាំងពិភពលោក។ ជានិច្ចកាល យើងអាចដោះស្រាយបញ្ហានេះបានតាមរយៈច្បាប់។ ខ្ញុំនឹងទូលថ្វាយព្រះមហាក្សត្រថៃថាប្រទេសយើងទាំងពីរនឹងដោះស្រាយបញ្ហានេះ ជាលក្ខណៈមិត្តភាព»។
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
